1 Bakolinto 16 - Sukuma New Testament 2000

Būsoogi kūlwa kūtwalīla beela

¹ Ali lūūlū, ū mhayo gwa kūsooga kūlwa kūbagunaana beela, na a bing'we ītagi gīt'ūmo nakajiwīlīla kanisa ja Galatia.

² Būlī lūshikū lo kwandya mu nyuma būlī ūmò wing'we ayūfunya shose-shose gīt'ūmo kwīlūkīlwa kwakwe kūlī, ītizūbiza gīkī ūlū nalashike ko hū ng'wandye kūsooga.

³ Ūlū nalize ko mukūsola abo mulababone bigeleelilwe nabatūme ī Yelusalemu, baje na nyalūba kūshitwala ī shakwinha shing'we.

⁴ Ūlū yūbeelela nū nene naje, nakūja hamò nabo.

Kūhela mihayo ya ng'endo

⁵ Nalībītīla Makedonia, hūna ūlū nalīnge ko ī Makedonia nakwiza ūko mulī.

⁶ Hamo nīyo nakūlenda hamò ning'we, nūlīmalīla kwenūko ī likanza lya mbeho ya mu shiyaga, mulanigunaane nū mu lūgendo lwane hose-hose ūko najile.

⁷ Kwike ī haha natūtogagwa ū kūmubona ū kūnū najile, nguno nalisagīlwa kūshinga ning'we ikanza ūlū ūzunya ū Seeba.

⁸ Nakwikala Efeso kūshisha ikanza lya Pentekosite;

⁹ nguno napandīkile ng'wanya ntaale gwa kūtūmama, nūūlū īkī balīho bilwisha bingī.

¹⁰ Ū Timoteo ūlū alize ū kū bing'we nanghanagi, atizūbiza wa kwikala wisūsa-sūsaga kūlwa booba; nguno nū ng'wene ntūmami wa nīmo go ng'wa Seeba, gīt'ūmo nakwītīlaga dūhū ū nene.

¹¹ Hūna lūūlū atizigela nūūlū ūmò wing'we wa kūndalaha. Mulangunaane ashoke mhola ū kūūnū nalī, nguno ū nene pye na a badūgū abo balīko ū kūūnū tūnindīīlile.

¹² Ū ndūgū wise ū Apolo nakanomba no, gīkī ize ko hamò na a badūgū; alīyo jalī jitī nghūmbū jakwe kwiza ī haha, akwiza ūlū alapandīke ng'wanya.

Mihayo ya kūlanga

¹³ Ilanghanagi ng'wīmīīle mu kūzunya, hama ipandagi chanda muhandatīle;

¹⁴ pyī ī mihayo ying'we ībize mu būtogwa.

¹⁵ Hama hangī nalīmulanja badūgū mumane gīkī, ī kaya ya ng'wa Stefana īl'itwajo lya kwandya ū mu Akaya; nīyo bifunya benekīlī kūlwa kūbagunaana beela.

¹⁶ Na lūūlū bizagi na widohya ū kū banhū ba mbika yenīyo, nūūlū kūlī ūngī ose-ose ūyo akūsangīlaga ū mu nīmo nū mu wilwisha.

¹⁷ Na hangī nalī na būyegi kūlwa kwiza kwakwe ū Stefana, hamò nū Fotunato; pyī nū Kaiko, nguno banishikīlīgīgije īyo mukaleba ho.

¹⁸ Baagūzalanije ū moyo gwane, pyī nī ying'we. Hūna lūūlū, a banhū gītī benaba īng'wigeleelilwe mubitegeleje chiza.

¹⁹ Jilīmugīsha ī kanisa ja Asia; ū Akula nū Piliska, hamò nī kanisa īyo īlī mu kaya yabo balīmugīsha no mulī Seeba.

²⁰ Pye a badūgū balīmugīsha. Igīshagi būlī ng'wene na biye mu kwibbipa kwela.

²¹ Nene Paulo namugīsha mu nkono gwane.

²² Ūlū alīho munhū atantogilwe Seeba leka azung'we. Malanasa!

²³ Shigongo sha ng'wa Seeba Yesu shibize hamò ning'we.

²⁴ Ū būtogwa bone būlī hamò ning'we pye a bose mulī Kilisto Yesu: Alichene.