1 Bakolinto 14 - Sukuma New Testament 2000

Shakwinhwa sha ndīmi jingī, na būhangi

¹ Ū būtogwa ū wene būkoobagi mu welwa-ngholó, kwike nī shakwinha sha ng'wa Moyo mubize na nghūmbū nasho; ī no-no-no ū būdūla bo kūhanga.

² Nguno ūyo akayombaga mu ndīmi jingī atayombaga na banhū, akayombaga na Mulungu. Atīho ū wa kūng'witegeleja, īkī akayombaga mu moyo mihayo ya mbisīla.

³ Alīyo ūyo akahangaga ū ng'wene akawīlaga banhū, akabazengaga na kūbagunaana na kūbalūngūja.

⁴ Ūyo akayombaga mu ndīmi jingī akizengaga wei ng'wenekīlī, lelo ūyo akafunyaga būhangi, ū ng'wene akabazengaga abo balīmo ū mu kanisa.

⁵ Natogilwe na a bing'we mudūle ū kūlūngalūnga mu ndīmi jingī, alīyo ī no-no-no mudūle kūyūhanga. Nguno ū nghangi alī ntaale kūnkīla ūyo akayombaga mu ndīmi jingī, numho ūlū ūfunya na būshomeleja kūlwa kwīzenga ī kanisa.

⁶ Ī gīsī badūgū bane, ūlū niza ū kū bing'we hūna nandya kūyomba mu ndīmi jingī, nakūmugunaana ginehe ūlū natayombile ning'we mu koolecha hape, nūūlū nūleka kūng'wenhela mhayo gwa witegeleja nūūlū būlomeeji, nūūlū būlangi?

⁷ Nūūlū ī shikolo īsho shitī na būpanga īsho shikalīlaga gītī nangale nūūlū ndono, ūlū shitikīla-kīlile a kalīlīle, shikūmanīka ginehe īsho shilīfuulwa nūūlū kūtūlwa?

⁸ Ī gīsī nūūlū ndūlilū ya kūja kū būlūgū yūlīla būyaga-būyaga, nani ūyo adūgije kūbūūcha shilanga kūja kū būlūgū?

⁹ H'ūmo gūlī nū kū bing'we, ūlū ūtafunije mhayo gwa kūmanīka ū mu lūlīmi lwako, gūdūgije kūmanwa ginehe ūyo ūlīgūhaya? Angū ūkūbiza gītī ūkūyombaga mihayo ya kūjimīlīla mu lūyaga dūhū!

¹⁰ Ū mu sī galīho malaka ga mbika na mbika, alīyo lītīho nūūlū līmò īlo lītī na makūlū galyo.

¹¹ Hūna lūūlū ū nene ūlū natūgūmanaga ūyo gūlīfuma ng'wilaka ilebe, nakūbiza nalī ngeni ū kūlī nghayi, nū wei ū nghayi akūbiza ngeni ū kūlī nene.

¹² Na a bing'we h'ī gīko; īkī muhahaalīlile shakwinha sha ng'wa Moyo, komeelagi ū kūkooba mushikwīje no-no-no; mubize na būdūla bo kwīzenga ī kanisa.

¹³ Ali lūūlū ūyo akūyombaga mu lūlīmi lūngī, ni alombage adūle nū kūshomeleja.

¹⁴ Nguno ūlū nalīlomba mu lūlīmi lūgeni, moyo gwane dūhū gūkūbiza gūlīlomba, lelo a maganiko gane gakūbiza gatī na matwajo.

¹⁵ Ī gīsī numho ginehe ho a henaho? Nakūlomba ū mu moyo, alīyo nū mu masala gane nakūlomba; nakwīmba ū mu moyo, nū mu masala gane nakwīmba.

¹⁶ Ūlū ītī chene numho gūkūja ginehe ūlū ūlīkumīlīja mu moyo? Ū munhū ūyo atamanile adūgije ginehe ū kwizunīlīja nū būkumīlīja wako ī gīkī, “Alichene,” ūlū atūmanaga īyo ūkwīyombaga?

¹⁷ Na nghana ī chene ū bebe ūlīkumīlīja, alīyo ū ng'wiyo atūzengagwa!

¹⁸ Ū nene nalīnūmba ū Mulungu, nguno nane nakayombaga ū mu ndīmi ī jingī, nīyo kūmuheeba pye a bing'we.

¹⁹ Alīyo ūlū nalī mu kanisa īlī hambū-hambū nūūlū nagelele kūyomba mihayo ītanò ū mu masala gane, kūlwa kūbazenga a bichane; kūtinda kūyomba mihayo shihūmbī ikūmi mu lūlīmi.

²⁰ Badūgū bane, yaya ū kūbiza baana ū mu maganiko, alīyo ū kū yabūbi bizagi beleele; lelo ū mu maganiko kūlagi.

²¹ Ū mu shilagīlo yandīkilwe gīkī, “A banhū benaba nakūyomba nabo mu ndīmi jingī, na mu milomo ya banhū bangī, alīyo nahene batūniigwa;” alīhaya Seeba!

²² Nose hū kūhaya gīkī, ī ndīmi jilī shimanīkījo, ītī kū bazunya, alīyo kū banhū abo batī bazunya; lelo ū būhangi ū wene būtīho kūlwa banhū abo batī bazunya, būlīho kūlwa bazunya.

²³ Ī gīsī ī kanisa ī yose ūlū yibilingaga, hūna pye a bose bandya kūlūngalūnga mu ndīmi jingī, hama bingīla mo na banhū abo batitegelegije nūūlū batī bazunya, batiganika gīkī ng'wasalaga?

²⁴ Alīyo ū munhū ūyo atī nzunya, nūūlū ūyo atitegelegije, ūlū wingīla ūmusanga pyī mulīfunya būhangi, a bose bakūnkaanīla; pye bakūnamula.

²⁵ Ī mihayo ya mbisīla īyo īlī mu ngholó yakwe īkūfunījiwa ha ng'wape; ū mu gīko akwinama atuje mazwi anamye Mulungu, kūnū alīhaya gīkī, “Nghana ū Mulungu alī hamò ning'we!”

Yose yītwe mu kwihela kwawiza

²⁶ Bing'we badūgū bane, ī gīsī tūhaye ho kinehe? Ūlū ng'wibilingaga būlī ng'wene alī na mhayo; ūyū alī na lyīmbo, ūngī būlangi, ūngī akundūlīlilwe mhayo nebe, ūngī būlūngalūngi mu lūlīmi lūngī, ūngī būshomeleja! Yītagi pyī ī yose yenīyī mu mbika ya kwizenga.

²⁷ Ūlū balīho balūngalūngi ba mu ndīmi jingī, balūngalūnge babīlī nūūlū badatū dūhū, nīyo mu kwibalīīlwa, hama abize ho na nshomeleja.

²⁸ Alīyo ūlū atīho nshomeleja ū mu kanisa, ū nūngalūngi ahuumūle, ayombe wei ng'wenekīlī dūhū na Mulungu.

²⁹ Banhū babīlī nūūlū badatū bahange, lelo a bangī badegeleke mu kūwitegeleja ū būhangi wabo.

³⁰ Hama ūlū ūngī ūkundūlīlwa mhayo, ū wa kwandya igashe ahuumūle.

³¹ Nguno mudūgije kūfunya ū būhangi pye a bose, kwike ng'wilekela-lekela, pye a banhū balangwe na kūlūngūjiwa.

³² Ī myoyo ya būhangi īkabigwaga a bahangi;

³³ nguno ū Mulungu atī wa nsambo, alī wa mhola. Ūmo bakwītīlaga mu kanisa ja beela hose pye,

³⁴ a bakīma ni bahuumūlage ū mu kanisa; nguno batazunīlījiwe ū kūyomba, alīyo bidohye gīt'ūmo shihayīlile ī shilagīlo.

³⁵ Ūlū batogilwe kwilanga mhayo gose-gose, ni bababūjage bagoshi babo kū kaya, nguno gūlī mhayo gwa soni ū nkīma ū kūyomba mu kanisa.

³⁶ Kolaga hamo ū mhayo go ng'wa Mulungu gūfumile kū bing'we? Nūūlū gīkī gwagelela kū bing'we dūhū ū kūshika?

³⁷ Ūlū munhū alībona gīkī alī nghangi nūūlū akatongeelagwa na Moyo, ni ayitegelejage īyo nalīng'wandīkīla gīkī īlī shilagīlo sha ng'wa Seeba.

³⁸ Alīyo ū munhū ūlū atatogilwe kūmana, ni ikalage gīko mu būtūmana.

³⁹ H'īyo lūūlū badūgū bane, bizagi na nghūmbū nago ū mhayo gwa kūhanga, alīyo nū gwa kūlūngalūnga mu ndīmi jingī yaya ū kūgūhangīja.

⁴⁰ Kwike pyī ī mihayo yītwe chiza na mu kwihela kwawiza.