1 Bakolinto 12 - Sukuma New Testament 2000

Shakwinha sha ng'wa Moyo

¹ Bing'we bang'wise, ū nene natatogilwe ng'wikale mutīmanile ī ya shakwinha sha ng'wa Moyo.

² Mumanile gīkī aho ng'walī mutaalī banhū ba mahanga ng'watwalanījiagwa hose-hose kū shikolo sha kūlamiwa īsho shitayombaga.

³ Hūna lūūlū natogilwe kūmulanja gīkī, atīho munhū wa kūhaya mulī Moyo wa ng'wa Mulungu gīkī, “Ū Yesu azumilwe!” Na atūdūla munhū ose-ose kūhaya gīkī, “Ū Yesu alī Seeba;” ūlū ītī mu katongeelele ka ng'wa Moyo Ng'wela.

⁴ Hūna lūūlū, ī shakwinha sha ng'wa Moyo shilīho sha mbika ningī, alīyo ū wei hū ng'wene dūhū.

⁵ Hama nī mbika ja katūmamīle najo jilī ningī, alīyo ū Seeba hū ng'wene dūhū.

⁶ Nī milīmo īlīho ya mbika ja shinabūyaga, alīyo ū Mulungu ūyo akībeejaga ī yose mu bose, hū ng'wene dūhū.

⁷ Kwike būlī munhū akinhagwa gīt'ūmo kalī katongeelele ka ng'wa Moyo, kūlwa kūgunaana.

⁸ Nguno ū mu kinhīle ka ng'wa Moyo, ūngī akwinhwa masala, alīyo ūngī winhwa būdūla bo kwitegeleja, gīt'ūmo alatogelwe ū Moyo ng'wenūyo.

⁹ Hama ūngī ū mu kinhīle ka ng'wa Moyo akwinhwa kūzunya, na ūngī shakwinhwa sha kūpīja, ū mulī Moyo ng'wenūyo dūhū.

¹⁰ Na ūngī kwīta milīmo ya būdūla, ūngī būhangi, ūngī kwīyitegeleja myoyo, ūngī mbika ja ndīmi, ūngī būdūla bo kūshomeleja ndīmi.

¹¹ Alīyo pyī ī yenīyī akībeejaga Moyo ūmò ng'wenūyo dūhū; akangabīlaga būlī munhū heeke-heeke gīt'ūmo atogelilwe wei ng'wenekīlī.

Shigemenghejo sha mīlī na mabudīka gago

¹² Ū mhayo gwenūyū gūbizile gīt'ūmo mīlī gūmò gūlī na mabudīka mingī, alīyo a mabudīka a mingī genayo galī mīlī gūmò; h'ūmo alī nū Kilisto.

¹³ Nguno pye a bose tūbatīījiwe mu mīlī gūmò mulī Moyo ūmò, tūbize tūlī Bayudaya, nūūlū tūlī banhū ba mahanga; tūbize tūlī basese, nūūlū tūlī mu wiyabī: hama pye a bose tūkang'wishiwa shakūng'wa sha ng'wa Moyo ūmò ng'wenūyo.

¹⁴ Ū mīlī gūtī ibudīka līmò dūhū, gūlī na mabudīka mingī.

¹⁵ Ū lūpambala nūūlū lūkahaya gīkī, “Ū nene natī wa mīlī īkī natī nkono;” ī yenīyo ītī nguno ya kūlwīta looye ū kūbiza ibudīka lya mīlī.

¹⁶ Nūūlū ū gūtū ūlū gūhaya gīkī, “Ū nene natī wa mīlī īkī natī liso,” ī yenīyo nayo ītī nguno ya kūgwīta gooye ū kūbiza ibudīka lya mīlī.

¹⁷ Ī gīsī ū mīlī ū gose ūlū ni gūlī liso dūhū, ū kwigwa ni kūlī halī? Nūūlū ni gwabiza gwa nīmo gwa kwigwīla dūhū, ū kūnunghīlwa ni gūkadūlīkanaga ginehe?

¹⁸ Alīyo ū Mulungu agatūūlile a mabudīka ū mu mīlī, būlī lyene ūmo atogelilwe wei ng'wenekīlī.

¹⁹ Angū, ū mīlī ūlū ni gūlī ibudīka līmò dūhū, ū mīlī gwenekīlī ni gūlī ha kī?

²⁰ Alīyo ī haha a mabudīka ga mīlī galī mingī, lelo ū mīlī gūlī gūmò dūhū.

²¹ Nose ī liso lītūdūla ū kūgūwīla ū nkono gīkī, “Natī na nguno nangho;” nū ntwe gūtūdūla ū kūjiwīla ī mhambala gīkī, “Natī na nguno ning'we.”

²² Nīyo a mabudīka ga mīlī ayo gakabonekanaga gītī galī malebu-lebu, h'ayo gigeleelilwe gabize ho!

²³ Na a yayo tūkagiganikīlaga gīkī gatī n'ikūjo ū mu mīlī, nago a genayo tūgatūūlīlile ikūjo itaale kūtinda. Nūūlū a mabudīka gise ayo gatī na wiza bose-bose, tūgagaliilile no;

²⁴ lelo ayo galī na wiza, a gene tūtī na nguno ya kūgakoya-koyela. Alīyo ū Mulungu agadimanije pye a mabudīka ga mīlī: ayo galī na būgehelwa ūginha ikūjo itaale kūtinda.

²⁵ Nguno ya gīkī būtizūbiza ho būgabanīki ū mu mīlī, alīyo būbize ho widīlīji; būlī ibudīka lidīlīle na lichalyo.

²⁶ Ībize gīkī ūlū ibudīka līmò lyūsaata, pye na a gangī gasangīle nalyo ū mu kūsaatwa; nūūlū līmò lyago linhwa ikūjo, na a gangī gasangīle ū ng'wikūjo lyenīlo.

²⁷ H'ūmo mulī na a bing'we, mulī mīlī go ng'wa Kilisto, na mabudīka ga mīlī gokwe.

²⁸ Ū Mulungu ahelile ū mu kanisa; a ba kwandya batūng'wa, ba kabīlī bahangi, ba kadatū balangi, hūna babeeja ba milīmo ya koolecha būdūla, na bangī balī na shakwinhwa sha kūpīja, bangī sha būgunaani, bangī sha būsugi, na bangī mbika ja ndīmi.

²⁹ Angū, pye balī batūng'wa? Pye balī bahangi? Pye balī balangi? Pye bakabeejaga milīmo ya koolecha būdūla?

³⁰ Pye balī na shakwinhwa sha kūpīja? Pye bakayombaga mu ndīmi jingī? Pye badūgije kūshomeleja?

³¹ Na nghana shikoobagi ī shakwinhwa; kwike ū nene leki nang'oolekeje ī nzīla ī yawiza kūtinda.