1 Bakolinto 11 - Sukuma New Testament 2000

¹ Bizagi balondeeji bane gīt'ūmo nū nene nalī nondeeji wa ng'wa Kilisto.

Kūkundīkīja ntwe ikanza lya kūlamya

² Nalīmukumīlīja īkī mukūnizūkagwa mu yose, nīyo na a malange ayo nakang'winha mugadimile.

³ Kwike natogilwe mumane gīkī ū Kilisto alī ntwe gwa būlī ngosha, al'ū ntwe gwa nkīma ng'wene ngosha, hama ū ntwe go ng'wa Kilisto alī Mulungu.

⁴ Būlī ngosha ūlū alīlomba nūūlū alīhanga alīyo ū ntwe gokwe gūkundīkīgije, akūbiza alīgūgoola ū ntwe gokwe.

⁵ Alīyo būlī nkīma ūlū alīlomba, nūūlū alīhanga ū ntwe gokwe gūbiza gūtakundīkīgije, ū ng'wene akūbiza alīgūgoola ū ntwe gokwe, ū mu gīko akūbiza atikīlile nū yūyo amoogilwe.

⁶ Nguno ū nkīma ūlū atagūkundīkīgije ū ntwe gokwe ni asūnzūūlagwe ī nzwīlī jakwe, alīyo ūlū alībona minala ū kūjisūnzūūla ī nzwīlī jakwe nūūlū kūjimooga, ni agūkundīkījage ū ntwe gokwe.

⁷ Ū ngosha ū ng'wene atigeleelilwe ū kūgūkundīkīja ū ntwe gokwe, nguno alī būlolelo n'ikūjo lya ng'wa Mulungu, alīyo ū nkīma ū ng'wene alī ikūjo lya ngosha.

⁸ Īkī ū ngosha atafumile mulī nkīma; ū nkīma h'ūyo afumile mulī ngosha.

⁹ Hama ū ngosha ataseemilwe kūlwa nkīma; ū nkīma h'ūyo akaseeng'wa kūlwa ngosha.

¹⁰ Na lūūlū kūlwa nguno yenīyī, na kūlwa nguno ya bamalaika, shing'wigelile ū nkīma ooleche ū kū ntwe būlolelo bo kūbiza ha sīlīlī ya būsugi.

¹¹ Kwike nahene ū mulī Seeba atīho ngosha ūlū atīho nkīma, hama atīho nkīma ūlū atīho ngosha.

¹² Nguno gīt'ūmo nkīma afumile mulī ngosha, h'ūmo īlī nū kūlī ngosha; nanghwe akabyalagwa na nkīma, alīyo ī shose shifumile kūlī Mulungu.

¹³ Nūūlū a bing'we benekīlī lamulagi, mulībona ībeelelile ū nkīma anombe ū Mulungu alīyo atagūkundīkīgije ū ntwe gwakwe?

¹⁴ Ī gīsī, a kabūmbīlwe nako katoolekejaga gīkī gūlī gwa soni ū ngosha ūlū ūbiza na nzwīlī ndīhu?

¹⁵ Lelo ū nkīma ūlū ūbiza na nzwīlī ndīhu, līl'ikūjo ū kūlī we. Nguno ū nkīma akinhwa nzwīlī ndīhu ja kūnkundīkīja.

¹⁶ Ūlū alīho ose-ose ūyo atogilwe halalī, a bise tūtī na shīmīle shilī gīko, nūūlū nī kanisa ja ng'wa Mulungu.

Kwīkūja sangīla

¹⁷ Alīyo ū mu mhayo ūyū, ū gwene natūmukumīlījaga. Nguno ū kwibilinga kwing'we kūtī na solobo yose-yose, ūlū ītī kwiyingīja mu makoye dūhū!

¹⁸ Īkī ī soolo ya mhayo naliigwa gīkī, ūlū ng'wibilingaga ū mu kanisa mukūbizaga na wisolanhya; nū nene nalīīta nagūzunya ū mhayo gwenūyū.

¹⁹ Nguno shiigelile būbize ho dūhū ū wikīla-kīji ū mu mhayo gwenūyo, hū bakūmanīka hape abo banukūlīlwe ū mu bing'we.

²⁰ Hū kūhaya a bing'we ūlū ng'wibilinga, mutibilingaga kūlwa shilīwa sha ng'wa Seeba.

²¹ Nguno būlī ng'wene akūlyaga shakwe dūhū, būtīho ū wilindīīji nūūlū hado: nose ūngī ashikile kūbiza atuubile, alīyo ūngī akūbbīzūkaga ndoso dūhū, okaleebagwa na kūleewa!

²² Mutī najo ī kaya ja kwigasha ng'walya na kūng'wa kwenūko? Nūūlū hamo mukwīdalahaga ī kanisa ya ng'wa Mulungu, nose mukūbizaga na nghūmbū ja kūbadimya minala abo batī na shikolo? Ī gīsī namukumīlīje, nūūlū namuwīle mhayo kī? Ū mu mhayo gwenūyū natūdūla ū kūmukumīlīja!

Kūtūūlwa sangīla

²³ Nguno īyo nakanukūla kūfuma kūlī Seeba h'īyo nane nakang'winha a bing'we; gīkī, ū Seeba Yesu akasola ngatī ū mu būjikū ūbo akalodeelwa.

²⁴ Aho walūmba ūgūmeganya; hūna ūhaya gīkī, “Ū gwenūyū gūlī mīlī gwane kūlwa nguno ying'we, mulīītage gīko kūlwa kūnizūkwa.”

²⁵ Bahayūmala ū kūlya, wīta gīko nī shikombe; nasho ūbinha kūnū alīhaya, “Ī shikombe īshi shilī ilagane ipya mu mininga gane, mulīītage gīkī gwa ūlū mulīng'wa kūlwa kūnizūkwa.”

²⁶ Nguno būlī ikanza ūlū mulīgūlya ū ngatī gwenūyū, nūūlū mulīshing'wa ī shikombe shenīshi, mukūkūkumūchaga ū kūcha kwa ng'wa Seeba kūshisha ize.

²⁷ Nose hū kūhaya būlī ng'wene ūyo ūgūlya ū ngatī, nūūlū ūshing'wa ī shikombe sha ng'wa Seeba mu mbika īyo ītigeleelilwe, akūbiza mu kwihīga kūlwa nguno ya mīlī go ng'wa Seeba na mininga gakwe.

²⁸ Alīyo būlī munhū ni igīsīlījage wei ng'wenekīlī hūna agūlye ū ngatī, nī shikombe ashing'we.

²⁹ Nguno ūyo akūlyaga na kūng'wa mu būtūgūdīlīla ū mīlī gwa ng'wa Seeba, ū ng'wenūyo akūlyaga na kūng'wa nsango gokwe wei ng'wenekīlī!

³⁰ H'ī nguno yene bingī ū mu bing'we balī bagokolo na basedeeku, na bangī bakūchaaga!

³¹ Alīyo ūlū ni twalī twihūgūla bise benekīlī, ni twaleka ū kūlamulwa.

³² Kwike ū Seeba ūlū ūtūlamula numho alītūhūgūla gīkī tūtizūlamulwa hamò na banhū ba mu sī.

³³ Ali lūūlū badūgū bane, ūlū ng'wibilingaga kūlya shilīwa kū būtongi bo ng'wa Seeba, ng'wilindīīla.

³⁴ Hama ūlū munhū atuubile ni alīīlage kū kaya, yaya ū kwibilinga kūlwa kūgwa mu nsango; ī yīngī nakwīgolanya ūlū nalize ko.