1 Bakolinto 1 - Sukuma New Testament 2000

Kūgīsha na kūlūmba

¹ Nene Paulo, ūyo nakitanwa kūbiza ntūng'wa wa ng'wa Kilisto Yesu, kūlwa būtogwa bo ng'wa Mulungu; na ndūgū wise Sostene.

² Kū kanisa ya ng'wa Mulungu īyo īlī Kolinto, banhū abo beejiwa mulī Kilisto Yesu, bitanwa kūbiza beela; na a bose abo bakūlitanaga lina lya ng'wa Seeba wise Yesu Kilisto, ūyo alī Seeba wabo na wise.

³ Shigongo na mhola shibize hamò ning'we kūfuma kūlī Mulungu Sīswe, na kūlī Seeba wise Yesu Kilisto.

⁴ Nakūnūmbaga ū Mulungu wane gwa-gwa-gwa kūlwa nguno ying'we, kūlwa shigongo īsho wang'winha mulī Kilisto Yesu.

⁵ Nguno ū mulī we mulī na būsabi būtaale, ū mu kalūngalūngīle nū mu witegeleja bose,

⁶ gīt'ūmo būkaanīji bo ng'wa Kilisto bomalile koolechiwa mu bing'we.

⁷ Nguno mutī na būgehelwa mu shakwinhwa shose-shose aho mutaalī mulīlindīīlile ī likanza lya koolechiwa kwa ng'wa Seeba wise Yesu Kilisto.

⁸ Nīyo h'ūyo akūmuhandatīja kūshisha kū būkalīkījo, mubize mutī na shilingo ū mu lūshikū lo ng'wa Seeba wise Yesu Kilisto.

⁹ Ū Mulungu ng'wene nsanyiwa, ūyo wang'witana a bing'we kwingīla mu būsangī wa Ng'wana wakwe Yesu Kilisto Seeba wise.

Būgabanīki mu kanisa

¹⁰ Bing'we badūgū bane, nalīng'wikūmbīlīja mu lina lya ng'wa Seeba wise Yesu Kilisto, gīkī mubize na widomanīja ū mu kalūngalūngīle. Yaya ū kūbiza na būgabanīki ū mu bing'we! Ni ībizage ho gwīnda ū mu maganiko ging'we nū mu kalomanīle king'we.

¹¹ Nguno badūgū bane, ū nene naamanyiwe na banhū ba ha ng'wa Kiloe gīkī, būlīho wilemeelwa ū mu bing'we.

¹² Ūyo nalīgūhaya gūlī gīkī, būlī ng'wene ū mu bing'we akūhayaga: ūyū gīkī, “Ū nene nalī o ng'wa Paulo,” na ūngī, “Ū nene nalī o ng'wa Apolo,” na ūngī hangī, “Nalī o ng'wa Kefa,” hama na ūngī hangī gīkī, “Ū nene nalī o ng'wa Kilisto!”

¹³ Bing'we, ū Kilisto wagabanīkile? Ū Paulo akakong'wa ha nsalaba kūlwa nguno ying'we? Nūūlū mukabatīījiwa mu lina lya ng'wa Paulo?

¹⁴ Nalī na būyegi nguno natamatīīgije nūūlū ūmò wing'we, ūlū atī Kilispo na Gayo dūhū.

¹⁵ Hūna lūūlū munhū ose-ose atīko kūhaya gīkī mukabatīījiwa mu lina lyane.

¹⁶ Na bangī abo nakababatīīja baalī ba mu kaya ya ng'wa Stefana; natamanile ūlū balīho na bangī ba kūkīla a ha benabo abo nababatīīja.

¹⁷ Nguno ū Kilisto atanitūmile ū nene kūja nūbatīīja, alīyo kūja nūlomeela Nghūlū Jawiza; nīyo hangī ītī mu mihayo ya masala-sala, gūtizūsūūkīlījiwa ū nsalaba go ng'wa Kilisto.

Būdūla bo ng'wa Mulungu na masala gakwe

¹⁸ Īkī ū mhayo gwa nsalaba gūlī gwa būchilū-chilū ū kū banhū abo bajile mu kūyagala, alīyo ū kū bise abo tūlī bapījiwa, būlī būdūla bo ng'wa Mulungu.

¹⁹ Nguno yandīkilwe gīkī, “Nakūgakenaagūla a masala ga ba masala, nū witegeleja wa bitegeleja.”

²⁰ Ali lūūlū, alī halī ū wa masala? Alī halī ū nangi? Alī halī ū nghalalī ū mu shikū īji? Angū, ū Mulungu atagagalūkije a masala ga mu sī kūbiza būchilū-chilū?

²¹ Nguno a ba mu sī balemeelilwe ū kūng'witegeleja na masala gabo ū Mulungu ū mu masala gakwe, īkī ū wei ū Mulungu gūkanyeja gwa kūbūtūmamīla ū būchilū-chilū ūbo būkūlomeelagwa kūbapīja abo bakūzunyaga.

²² Alīyo a Bayudaya bagongile shimanīkījo, a Bayunani bachooji ba masala.

²³ Kwike a bise tūkūnomeelaga Kilisto ūyo akakong'wa ha nsalaba, mhayo ūyo gūkūbipamyaga a Bayudaya, hama ū kū banhū ba mahanga gūlī gwa būchilū-chilū.

²⁴ Alīyo ū kū basolwa, ni babizage Bayudaya nūūlū Bayunani, ū Kilisto alī būdūla bo ng'wa Mulungu na masala ga ng'wa Mulungu.

²⁵ Nguno ū būchilū-chilū bo ng'wa Mulungu, būlī na masala kūtinda a masala ga banhū, nū būgokolo bo ng'wa Mulungu nabo būlī na nguzu kūtinda ī nguzu ja banhū.

²⁶ A bing'we badūgū bane mumanile gīkī, aho mulitanwa baalī batī bingī ū mu bing'we a ba masala ga mu mīlī, na a ba būdūla baalī batī bingī, pye na a babo bigelile kūkūjiwa nabo baalī batī bingī.

²⁷ Alīyo ū Mulungu abasolile a bachilū-chilū ba mu sī, gīkī abadimye minala a ba masala, nī shikolo ī shigokolo ū mu sī nasho shilī shisolwa shakwe, gīkī ashidimye minala ī sha nguzu.

²⁸ Na hangī ū Mulungu ashisolile ī shikolo sha mu sī ī shigokolo, nī shisho shidalahilwe, īsho shitīho; gīkī ashidimye minala īsho shilīho.

²⁹ Ū mu gīko atūdūla kwilonga ose-ose wa kwikumīlīja ū kūlī Mulungu.

³⁰ Hūna lūūlū a bing'we mulī bakwe ū mulī Kilisto Yesu, ūyo kūlwa nguno yise wītwa kūbiza masala ga kūfuma kūlī Mulungu, hamò na būtūngīlīja na wela na būkomooji;

³¹ ībize gīt'ūmo gwandīkilwe gīkī, “Ū ng'wikumīlīja, ni ikumīlījage mulī Seeba.”