JƆN MƆƐKƐ RAƐ 1 - Sherbro New Testament Portions

¹ Nɔ bɛndɛ ko Gayɔs nɔ chɔmalendɛ, wɔ ya chɔŋlen tiŋtiŋdayɛ.

² Anyami chɔmalen ya sɛli chelɛ len gbi la kɔ kɔni yeŋkɛlɛŋ ni hɔm ni ha ŋche liveay, ya siyɛlɛ la che yeŋkɛleŋ ni minnɔ ihɔlɔŋdɛ.

³ Ya mɛmiɛni li bombayɛ mpɛnte apum ŋa muɛ ni ŋa wɔŋ tɔk kɛlɛŋ ko thambasay tiŋtiŋ ihɔlɔŋ mɔy, kendɛ ni la rɔŋ kɛ ŋa lem tiŋtiŋday.

⁴ Mɛmini bom chaŋa ki che lɔ ni, ha theyɛ lɛ apumamdɛ ŋa lem tiŋtiŋdɛ.

Pɔ tɔŋkɔ Gayɔs

⁵ Anya chɔmalen la tiŋtiŋ yɛ ŋa wɔŋni ha len gbi ko mpɛnteɛ ki thɛmbɛ thɛmbɛ anyan,

⁶ Ŋa koŋ wɔŋ li thamba sei koŋ ŋchɔmalen ma nɔɛ kump Hɔbatokɛ chee. Mɔ la ha ikɛlɛŋ yɛ ŋwom gbo bia ŋay kendɛ la kɔkani.

⁷ Haliwɔ ŋa koŋ hɔni ha sabu wɔɛ ni ŋa kweyɛni yen ibɛ ko mpɛnteɛ.

⁸ Labiɛ hi ha wɔŋ bɛmani paopa ko anya chevɛ, chelɛ yi bɔ cheɛ anya hakani mpanth tiŋtiŋday.

Dayotrifɛs ni Dɛmɛtrius

⁹ Ya koŋ gbal len ko kump Hɔbatokɛ; kɛ Dayotrifɛs wɔ chɔŋleŋ ŋa bɛniŋkɛn nsendɛ, kweyɛ ni la ya wɔ wɔm dɛ, kamini limani ko sɛmthache limdɛ.

¹⁰ Chelɛ yɛ ya hun gbo, ya nɔ lemɛ la wɔ ŋaɛ, ko simi ni ka ŋhɔk ŋwɔy. Ni hinɛn gbɔl ka lanɛ vɛ, yomɔni ha gbaŋa mpɛntenɛ ni wɔ ye pɛ thapa ŋanɛ ŋa yema ŋa gbaŋaɛ ni tho ŋa hiŋg kump Hɔbatokɛay.

¹¹ Anya chɔmalen, ŋa ma nɛmɛni iwɛi kɛ ŋa nɛmɛni ikɛlɛŋ. Nɔ ha ikɛlɛŋ wɔɛ nɔk Hɔbatokɛ; nɔ ha iwɛi kenmu Hɔbatokɛ.

¹² Nɔ gbi wɔ hɔ tɔkɔ kɛlɛŋ Dɛmitriɔsɛ, ni hiŋg kɔ na yɛni, ni ŋa siɛ lɛ sei limdɛ lɔ rɔŋ.

Ŋlɛn mɛkindɛ

¹³ Ya bi ligbe ha gbal ko mɔ ko, kɛ ya che yema gbalka ni mɛn gbalkaɛ;

¹⁴ ya bi kithgbɔl ha ke nɔ kɛkɛo, ni yi ni vɛlɛni ha theli.

¹⁵ Mbɔs ma che ko nɔ ko. Nthɛmbayɛ ŋa nɔ lɛyŋ. Ŋa lɛyŋ nthɛmbaɛ ŋan gbi.