TIMOTHI MƆƐKƐ TIŊDƐ 2 - Sherbro New Testament Portions

Kugba nɔ yegbe ha Krayst Jisɔs

¹ Ni hɔm bɛ, tami, che dumɔ wɔŋɔ Hɔbatokay kɔ Krayst Jisɔsayɛ,

² ni la nkoŋ the hiŋg yaŋdɛ nsei agbe che kaŋ anya tiŋtiŋ ŋa bi ha bɔ kaŋ atilaŋdɛ.

³ Poɔni ngbathilay kendɛ kugbanɔ Krayst Jisɔs yegbe.

⁴ Kugbanɔ cheni wɔ che chɔthay yɛ si wɔ ye binthima chɔthɛ ni ja tilaŋdɛ, chelɛ wɔ hini nɔɛ wɔ bɛ wɔ kugbalayɛ gbɔl.

⁵ Pɔ chen pɔlɔ nɔ gbikɛni chaŋ ni koŋ gbikini ka sabathɛ.

⁶ Nɔ bɔ ha mpanth ma chɛkɛ wɔ ha peŋkɛ sɔthɔ ngbemaŋ ma sendɛ.

⁷ Lonbolɛ la ya hɔɛ, haliwɔ Bɛɛ bi ŋa ha si len samɔ nten len o len.

⁸ Lonbolɛ kɛ Jisɔs Krayst, po hiŋg wullay, hokɔ hiŋg ram Devidɛ, sɔŋgɔma ya thɛkɛsiɛ la Womdi Yegbeay

⁹ ha Womdi Yegbeɛ la ya theyɛ nɛki ni yae tuɛ gbekte kendɛ nɔ ha iwɛi. Kɛ hɔk Hɔbatokɛ chendɛ gbekte.

¹⁰ Labi ya muyu len o len ha satɔkin ŋanɛ ha Hɔbatokɛ kweyɛ, chelɛ hanbɛ ha sɔthɔ lol Krayst Jisɔsay ni gbɛŋ chɔŋgba lan.

¹¹ Theliaŋ dɛ kɔ tiŋtiŋ: “Yɛ hi koŋgbo wu ni Wɔn, ipɛ bi ihɔlɔŋ ni Wɔn

¹² yɛ hi muyuɔ gbo, hi pɛ bi ha che bɛɛlay ni Wɔn, yɛ hi hɛm Wɔ gbo, Wɔn bɛ Wɔ hi hɛm,

¹³ yɛ hi biyɛn gbo laanɛ, Wɔn wɔ le laanɛay haliwɔ, chen bɔ hɛm niŋkɛn.”

Nɔ haa mpanth kɛlɛŋ

¹⁴ Hok ŋa lanɔki bolɛ, ni mɛy ha Bɛɛ che ni ŋa kɛŋgiɛni thoŋga ha hɔkɛ, ma chen chi ja yegbe, chanŋgbo ha shimi ŋanɛ ŋama theyɛ.

¹⁵ Chɔ kathba ni Hɔbatokɛ bi hinigbɔl ha mɔm, kendɛ nɔ ha mpath wɔ cheni ha lapɛ, wɔ yɛthi hɔk tiŋtiŋdɛ yɛŋkɛlɛŋ.

¹⁶ Kɛŋgiɛni theliaŋ ibiɛ jali Hɔbatokɛ, haliwɔ kɔ gbo lam yɔk anyin iche Hɔbatokɛay,

¹⁷ ni theliaŋ ŋay kɔ sɔŋgɔma thothoɛ kɔ sɔmɔ jallɛ. Han thiyeŋ ŋa Hymenɔs ni Filetɔs.

¹⁸ Ŋa koŋ kɛŋgiɛni tiŋtiŋdɛ ni ŋae sɛm kath lɛ po hiŋg wullay koŋ chaŋ. Ŋa sɔkba laanɛ aŋya pum.

¹⁹ Kɛ ŋkibaŋ ma Hɔbatokɛ ma sɛmɛ kath, ni maye bi fɔsa wɔɛ: “Bɛɛ si a ŋawɔɛ” ni “Ŋa nɔ gbi wɔ velɛ ilel Bɛɛ hok hiŋg iwɛiay.”

²⁰ Kil bomdɛ kunɛ chen gboɛ ndɔŋ ni fe dinthɛ ma lɔɛ kɛ ni hathi beth ni thibɛ, ni thipum ha li mani thipum ha ibiɛ limani.

²¹ Yɛ nɔ gbi thɔni gbo charaŋ hiŋg lanɛ la biɛni limani wɔ bi ha ha mpanth ma limani, pɔ wɔ ye dinthi che charaɛ ni pɔɛ wɔ ye ka mpanth ha sɛmthache killɛ, bɛmpani ha mpanth yegbe gbi.

²² Labiɛ may jali fonikeyɛ ni nten ma mɔɛ ko jali tiŋtiŋdɛ, laanɛ, chɔŋmalen, ni mbɔs, binthimani ŋanɛ ŋa vel ilel Bɛɛ ka gbɔl charaŋdɛ.

²³ Ma bi len ha hamani bolmin, thoŋga ibiɛ nten; nsiɛ lɛ la chi ŋhɔ.

²⁴ Ni womnɔ Bɛɛ chen ha cheɛ nɔ ha ŋhɔ kɛ che ikɛlɛŋay ko nɔ-o-nɔ, nɔ toŋgiɛ ayin yegbe, nɔmuyuɔ,

²⁵ wɔ bɛ anya wɔ cheŋkɛ naythin tiŋtiŋ day ka limani. Hɔbatokɛ yɔn ha ni ŋa thekɛni ni ŋa ye muniveleŋ, ŋa ye hun si tiŋtiŋdɛ,

²⁶ ni ha yɔn hɛthni chokoth min wɛi yɛ, yɛ koŋ ŋa gbo kɔnth ŋa han ha la wɔn yemaɛ.