ATHƐSALONIANAƐ MƆƐKƐ TIŊDƐ 2 - Sherbro New Testament Portions

Nɔ Kafaɛ

¹ Yɛlayo ha hun Bɛɛ hiɛ Jisɔs Krayst ni ŋhɔ hi bi ha dikilni ha bɔnth wɔɛ, hinɔ thɛlɛni, anyami,

² chen ha pakni kɛkɛ ntenɛ ma mɔay, lama cheɛ ka min ihɔlɔŋdɛ o hɔk, o ray hɔ ŋa hɔɛ hi gbalaɛ, ha ŋa suŋguthani ha hɔɛ lɔkɔ Bɛɛ koŋ hun.

³ Ha nɔ gbi ma nɔ dikbolmin naythindɛ gbi; hɔyɛ vɛ chen hun, chaŋ kaŋganiɛ le hunɔ, ni pɔye si nɔ ikweyɛlendɛ, wɔnɛ wɔ koŋ che ha shimjɛmdɛ,

⁴ wɔ bɔŋsua wɔye thɛŋg ni nkɛn ko hɔbatokɛɛ gbi o ko yendɛ gbi pɔ sɛli kohɔkoɛ, ni wɔye kwe ichɛli wɔɛ kil Hɔbatokay, wɔye chamɛ lɛ wɔn wɔɛ Hɔbatokɛ.

⁵ La leɛnɔni ntenɛ lɛ ya hɔmɔnɔ lanɔki gbi mɛŋkɛ ya ka che ni handɛ?

⁶ Ni ŋa si la wɔ ni thapaɛ yɛlayo chelɛ pɔ wɔ toŋgi mɛŋk wɔay.

⁷ Haliwɔ kabande ikweyɛlendɛ koŋ tipɛ haa mpanth, ni nɔɛ wɔɔ gbo thapaɛ wɔlabɔ haa haŋ si hokɔ nayɛbɔl.

⁸ Ni yɛlayo pɔe ke nɔ ikweyɛlendɛ, ni Bɛɛ Jisɔs wɔwɔye di ka ihɛŋ wɔ ŋyɔhɔllɛ ni shimiɛ wɔ ka toŋgini wɔɛ ni hun wɔɛ.

⁹ Hun nɔ ikweyɛlendɛ ka fɔsa min sɔyandɛ bi ha bi fɔsaɛ gbi ni thambasey mbol ni kabande mbol,

¹⁰ ni ka kafa dik anyin bolmin ha ŋanɛ ŋa bi ha rimdɛ, haliwɔ ŋa yomɔni ha chɔŋ tiŋtiŋdɛ len ni ŋa sɔthɔ lol.

¹¹ Labiɛ Hɔbatokɛ wom fɔsa ike tiŋtiŋ, chelɛ ŋa lanɛ lanɔ la mbolɛ,

¹² chelɛ pɔ baŋ ŋanɛ gbi ŋa lanɛni tiŋtiŋdɛ ilɔ kɛ ŋa the iche tiŋtiŋdɛ pɛthɛ.

Pɔ koŋ nɔ chu su ha sɔthɔ lol

¹³ Kɛ hi ŋa bi chɔŋsɛkɛ ko Hɔbatokɛ mɛŋkɛ hɔn gbi ha ŋan, anyami ŋa Bɛɛ chɔŋlendɛ, haliwɔ Hɔbatokɛ koŋ nɔ chu su hiŋg tipɛkɛ ha ŋan sɔthɔ lol, ka thɔk charaŋ Mindɛ ni laanɛ tiŋtiŋday.

¹⁴ Ko lanɔ la velɛnɔ ka womdi hi yegbeɛ, chelɛ ha bɔ sɔthɔ gbɛŋ Bɛɛ hiɛ Jisɔs Krayst.

¹⁵ Labiyɛ, anyami, ŋa sɛm kath ni ŋa yɛthi mbɛnɛɛ ma ha kaŋa hiŋg hindɛ, lachengbo ka ŋhɔk ma hi nyɔhɔl lɛ la cheɛ ka ray hɔ hi gballɛ.

¹⁶ Yelayowɛ ŋa Bɛɛ hiɛ Jisɔs Krayst wɔnayɛn ni Hɔbatokɛ Baahi; wɔ chɔŋhilendɛ ni ka hi thɛthɛ chɔŋgba ni kithgbɔl yegbe ka wɔŋɔ wɔɛ,

¹⁷ ŋa thɛthɛ gbɔl thi nɔɛ ni ŋa bɛ tha ki mpanth ni hɔk yegbe gbi.