ATHƐSALONIANAƐ MƆƐKƐ TIŊDƐ 1 - Sherbro New Testament Portions

¹ Pɔl, Silvanɔs, ni Timothi, Ko kil sɛli anya Thɛsalonikakoɛ ni Hɔbatokɛay Baahi ni Bɛɛ Jisɔs Krayst:

² Wɔŋɔ konɔko ni mbɔs hiŋg Hɔbatokɛ Baaɛ ni Bɛɛ Jisɔs Krayst.

Hɔɛ thoŋgaɛ yɛ Krayst bi ŋa hundɛ

³ Hi ŋa bi chɔŋsɛkɛ ko Hɔbatokɛ mɛŋkɛ hɔn gbi ha ŋan, anyami, sɔŋkɔma hɔ la ha cheɛ, haliwɔ laanɛ nɔɛ koŋ bɛrɛni bom ni nchɔŋmalendɛ ma ŋa bi ha athɛma nɔɛ ma bɛrɛni.

⁴ Labiɛ hin bɛ hi koloni ha han kil thi sɛli Hɔbatokɛay ha yɛthi nɔ kathɛ ni laanɛ ŋgbathil ma nɔay gbi ni thenɛkiyɛ kɔ ŋa muyuɛ.

⁵ Ki laɛ thambasey ha thoŋga tiŋtiŋ Hɔbatokɛ, chelɛ ŋa bɔ che yegbe ha bɛɛli Hɔbatokɛ, la ŋa theɛ nɛkiɛ

⁶ yɛ Hɔbatokɛ koŋla ke likɛlɛŋ ha paka ka theynɛki ko ŋanɛ ŋa nɔ theynɛkiyɛ

⁷ ni chi hini gbɔl ha hin ko ŋan ha thenɛkiɛ, yɛ pɔ toŋgi Bɛɛ Jisɔs hiŋg arijana ka malkaa wɔ adumɔɛ jɛmdi jothɔɛ

⁸ wɔe muŋgɔ ka thenɛki ko ŋanɛ ŋa sini Hɔbatokɛ ni ko ŋanɛ ŋa lɔŋɔni nui ko Womdi Yegbe Bɛɛ hiɛ Jisɔs.

⁹ Ŋa bi ha thenɛki ŋgbathil ma chɔŋgbaɛ ni pɔ ŋaye thapa ha ke Bɛɛ ni hiŋg gbɛŋ wɔ fɔsaɛ

¹⁰ yɛ bi ŋa hun hɔɛ yɛ vɛɛ ha pɔn ka wɔ gbɛŋ anya wɔ charaŋdɛ, ni ha pɔn kabani ha wɔn gbi ni ŋanɛ ŋa laanɛ, haliwɔ ŋa laanɛ thambasey hiɛ konɔko.

¹¹ Mɛkindɛni gbi hi nɔ sɛliɛ mɛŋk gbi, chelɛ Hɔbatokɛ hiɛ wɔ nɔ ha yegbe ha vel wɔɛ, ni wɔye koŋ haa itɛnin nɔ yegbeɛ ni mpanth ma laanɛɛ ka fɔsa wɔɛ,

¹² chelɛ ilel Bɛɛ hiɛ Jisɔs hɔ bi gbɛŋ ŋanay, ni ŋan wɔnay, kendɛ wɔŋɔ Hɔbatokɛ hiɛ ni Bɛɛ Jisɔs Krayst.