TIMOTHI NSENDƐ 6 - Sherbro New Testament Portions

¹ Ha ŋanɛ gbi ha kek woklay ŋa kwe ŋsɛmthache ma ŋaɛ anya limani, chelɛ ilel Hɔbatokɛ ni toŋgiɛ kɔ chen simjɛm.

² Ŋanɛ ŋa bi ŋsɛmthacheɛ ŋa laanɛ ŋa chen ha fɛki ŋa ha yɛ ŋa bɛ kump bul layɛ; kɛ la cheɛ ŋa ha ha mpanth ŋyegbe haliwɔ ŋanɛ ŋa sɔthɔ ka mpanth ma ŋaɛ ŋa anya laanɛ ni anya nchɔmalen. Toŋgi ni gbɔnda ja li ha ki.

Toŋgi mbol ni bali tiŋtiŋ

³ Yɛ nɔ gbi toŋgiɛ gbo ja tilaŋ ni la kɔkani ni ŋhɔk ma tiŋtiŋ ma Bɛɛ hiɛ Jisɔs Krayst ni toŋgiɛ kɔ kɔkan naythin Hɔbatokɛ.

⁴ Wɔ thɛŋgthiwɔl ni ŋsɔlɔk, sini be len; chɔŋ thoŋga len ni jali ŋhɔ ki ŋhɔk, ma chi chith, ibiɛ lomthibul, simijɛm, ŋtɛnkɛn,

⁵ ni chɛŋg chɛŋg ka ŋsuŋktha anyin thiyeŋ ŋa biyɛni itɛnin dɛ ni yemani si rɔŋdɛ, ŋa tɛnini lɛ jali Hɔbatokɛ la ha sɔthɔ bɛrɛ.

⁶ Bɛrɛ bom kɔ lɔ ki jali Hɔbatokɛay ka hinigbɔl;

⁷ kɛ hi chiɛni yen hɔlɔoay, ni hi chen bɔ kwe yen hiŋk hɔlɔoay;

⁸ kɛ yɛ hi bi gbo ŋje ni tɔya, ka lanɛ ki hi bi ha bi hinigbɔl.

⁹ Kɛ ŋanɛ ŋa ŋgbelŋgbel ha che baliyɛ ŋa pɔŋni nsɔyan kunɛ, ni chokoth kunɛ, ŋa pɔŋni ki jali ibiɛ nten gbe ni ŋa thenɛki ŋgbelŋgbel ha sɔthɔ bali la pɔŋ anyin ha simi ni simjɛm.

¹⁰ Kɛ ŋchɔmalen ma fe ma thiŋg ha ja wɛi gbi; hiŋk kokiti ŋgbelŋgbel lo lɔ anya pum ŋa koŋ hok hiŋk laanɛay ni ŋa simgbɔl ŋjɛm ka imɔl.

La ya ha ha ŋa ndelmamiɛ

¹¹ Kɛ ha hɔm, nɔki Hɔbatokɛ, ŋkosini lanɛ ki gbi, bɛ nten ma mɔɛ tiŋtiŋday, ŋche Hɔbatokɛay, laanɛ, ŋchɔmalen, yɛthini kath, mbɔsay.

¹² Ŋchɔ chɔthi yegbeɛ laanɛay; yɛthini ki ihɔlɔŋ chɔŋgbaɛ lɔ pɔ ka vel mɔɛ yɛ laŋni yegbe ŋsei agbe cheɛ.

¹³ Hɔbatokɛ che wɔ wɔŋ ihɔlɔŋ ko yen-o-yen gbi, ni ki Krayst Jisɔs thambasei Pɔŋtɔs Paylet chee lɔ ha laŋni yegbeɛ,

¹⁴ ya nɔ gbɔnda ŋa thɔŋgul sabaɛ ha ibiɛ thi path ni nthɛkɛ haŋ ni Bɛɛ Jisɔs Krayst hun;

¹⁵ ni lanɛ ki la bi ha toŋgini yɛ mɛŋk ayɛndɛ ka ruba ni nɔ fɔsa ikɛn, sɛmthache ŋsɛmthacheay ni Bɛɛ a bɛɛayɛ,

¹⁶ wɔn kɛn gbo wɔ chen bi ha wuɛ ni wɔ ko checheɛ kɔ nɔ chen bɔ fɛtɛ, kɔ nɔ gbi kamu keniɛ o bi ŋa keɛ. Li mani che ko wɔ ko ni fɔsa chɔŋgbaɛ. Vɛlache.

¹⁷ Ha anya balia hɔlɔoay, gbɔnda ŋa ha ma che gbɔl thukul, ni ma bɛ kithgbɔl ko bali thanthɛn kɛ ko Hɔbatokɛ wɔ hi ka bali ni yen o yen gbi ha the pɛthɛ.

¹⁸ Ŋa ha ha ikɛlɛŋ, ŋa pɛɛka ka mpanth yegbe, ŋka ka gbɔl mɔɛ gbi ni ha poɔni ni athɔma mɔɛ,

¹⁹ ha ŋa ŋyini ha ndelmaŋa ŋkibaŋ yegbe ha gbɛŋ thichee, chelɛ ŋa bɔ yɛthini ihɔlɔŋ ŋɔ ihɔlɔŋ fuliɛ.

²⁰ O Timothi, mpa la pɔ ko mɔ bɛ fiɛ. Ŋkosini theliaŋdɛ kɔ chendɛ theliaŋ Hɔbatokɛ ni thoŋga mbolɛ kɔ pɔ vel bi nten dɛ,

²¹ kɛ ha jalɛ ki apum ŋa koŋ bin ni gballɛ kɔ naythin laanɛay. Wɔŋɔ Hɔbatokɛ kɔ che nɔ.