TIMOTHI NSENDƐ 5 - Sherbro New Testament Portions

Lanɛ la ŋa ha ha ko ŋanɛ ha laanɛ

¹ Ma hɔl laŋgbaŋ bɛn kɛ ŋthelema wɔ ka limani kendɛ mɔ theli ki baaɛ. Ŋyoŋ ŋdaŋgbaŋdɛ kendɛ mpɛnte,

² amaa bɛn ken ŋyaa, ŋwanthɛmdɛ ken ŋwante naythin charaŋday gbi.

³ Ŋwɔŋ li mani ko mboraɛ.

⁴ Yɛ bora bi gbo apuma o apumanthetha, ŋa ha le kaŋha pɛiŋ jali ŋa li haɛ ko Hɔbatokɛ ko ram ŋaɛ ni wɔŋ paka pum ko abɛna ŋa; haliwɔ lanɛ ki la kɔkani Hɔbatokɛ chee.

⁵ Wɔnɛ fuli wɔ boraɛ, ni wɔ ye le ha ndelmawɔ, koŋ bɛ kithgbɔl wɔɛ ko Hɔbatokɛ ni ka sɛliɛ ni ŋkɛn ni sɛli ichɔl ni ipal;

⁶ yɛlabɛ bora wɔ woth jali hɔlɔɛ bol lɛ wɔ wu yɛlabɛ wɔ lɛliɛ.

⁷ Gbɔnda lanɛ ki, che lɛ ŋa chen bi ha bi nthɛkɛ.

⁸ Yɛ nɔ gbi kani gbo anyawɔɛ, ni thɛmbɛthɛmbɛ ŋa wɔ ram dɛ, koŋ hɛm laanɛ ni wɔ wɛi chaŋ nɔ ibiɛ laanɛ.

⁹ Ŋtɔm ma boraɛ wɔ koŋ chaŋ nɛn thi koŋaŋyara, wɔ koŋ cheɛ nɔma gbisiŋhɛ ki nɔpukan bulɛ;

¹⁰ ni pɔ ha wɔŋ sei li yegbe ha jaliwɔ haɛ yegbeɛ, kendɛ wɔnɛ wɔ koŋ dum apumaɛ, wɔ toŋgi ikɛlɛŋ, thɔk bɛŋthi anya charaŋdɛ, bɛmani ŋanɛ ŋa thenɛkiɛ, ni wɔŋniŋkɛn ha ha ikɛlɛŋ naythinday gbi.

¹¹ Kɛ ŋa ma tɔma mbora ŋwanthɛmdɛ, haliwɔ yɛ ŋa koŋ theni ichɛk ma gbisiŋdɛ ŋa yɛ thimni hiŋk Krayst,

¹² ni ŋa ye bi ŋthɛkɛ ha simi kaŋgbe ŋa nsendɛ.

¹³ Lababɛcheɛ lanɛ, ŋa pɛni ha cheɛ anya iyema ha len, ŋa chaŋchaŋ hiŋk hoŋ o hoŋ, ni chen gboɛ anya iyema ha len kɛ anya thelekɛ ni anya jalemɛ, theli la ŋa chen ha theliɛ.

¹⁴ Labiɛ ya yema mbora ŋwanthɛmdɛ gbisiŋ, ŋa gbem apuma, ŋa lɛli ichɛli ŋaɛ atok, ni ŋa ma ka nɔ ŋcheŋgɛ mɛŋk ha poli ŋa.

¹⁵ Haliwɔ apum ŋa koŋ bɛ chaŋchaŋ min Ŋsɔyandɛ veleŋ.

¹⁶ Yɛ nɔma laanɛ wɔ bi anyawɔɛ ŋa mboraɛ, wɔ ha bɛmaŋani; ha woth ŋaɛ kɔ ma che kump Hɔbatokɛ bol, chelɛ la bɔ bɛmani ŋanɛ ŋa mboraɛ fuliɛ.

¹⁷ Ha ni ŋgbakoɛ ŋa ha mpanth ŋkɛlɛŋdɛ ŋa sɔthɔ mani li leŋgiɛ, thɛmbɛthɛmbɛ ŋanɛ ŋa ha mpanth ma thɛkɛsi ŋhɔk ma Hɔbatokɛ ni toŋgiɛ;

¹⁸ Haliwɔ Ray Hɔbatokɛ ŋɔ hɔɛ, “Ma gbiŋgith mindɛ ni sum naa yɛ wɔ yuk ŋkɔs ma ŋyikiɛ”, ni, “Nɔ ha mpanthɛ wɔ ha sɔthɔ paka ha mpanth ma wɔɛ.”

¹⁹ Chɔlnɛn ma kwe la pɔ hɔ ha gbakoɛ chaŋ mbi ŋsei atiŋ o ara.

²⁰ Kɛ ha ŋanɛ ŋa gbɛnthilni iwɛiyɛ, ŋa ha hɔl athɔmaŋaɛ gbi chee, chelɛ ŋanɛ gbi ŋa leɛ ŋa bi ha che ŋkwathay.

²¹ Hɔbatokɛ chee ni Krayst Jisɔs ni malkaɛ ha pɔ kweɛ ya nɔ ni gbɔnda ha ŋan yɛthi saba thɛ ki ha iŋɛthiɛ yen gbi, hani be lan hiŋk iŋɛthiɛ.

²² Ma lɛni ka gbaŋg thi pia, o ma bɛ thi pia ki iwɛi nɔ tilaŋ; ŋthuŋgul ni ŋkɛn charaŋ.

²³ Ma gbo pɛ kul mɛn man kɛn, kɛ ŋkwe mɔɛ nton ha satokin kunɛ mɔɛ ni nɛki mɔ bɔnɔbulɛ.

²⁴ Iwɛi anya pum ŋɔ leiŋ, ŋɔ tɛk su ko thoŋgaɛ, kɛ iwɛi anya tilaŋ ŋɔ keni thi chee.

²⁵ Labiɛ mpanth ŋkɛlɛŋ ma keni leiŋ; ni yɛlabɛ yɛ ma chen keniɛ, ma chen bɔ mathini.