TIMOTHI NSENDƐ 4 - Sherbro New Testament Portions

Anya toŋgiɛ mbolɛ

¹ Yɛlayoɛ Min Charaŋdɛ hɔla theŋgtheŋg lɛ mɛkinday, apum ŋa bi ha hok hiŋk laanɛay ŋaye lɔŋ nui ko minsa mbolɛ ni toŋgi min sa wɛiyɛ,

² hiŋk anya kaŋga pɔ hɔlaɛ ko anya mbol lɛ ŋa ntenɛ ma ŋaɛ ma koŋ suskɔni gbiɛ,

³ ŋa thapa libi, ni thapa cosini hiŋk njeɛ ma Hɔbatokɛ bɛmpaɛ, ma ha sɔthɔ ka chɔŋsɛkɛ, ka ŋanɛ ŋa laanɛ ni si rɔŋdɛ

⁴ Haliwɔ yen dɛ gbi ŋɔ Hɔbatokɛ bɛmpaɛ ŋhɔ yegbe, ni beyen ŋɔ chen ha hɛm yɛ ŋɔ sɔthɔni ni chɔŋsɛkɛ;

⁵ haliwɔ kɔ koŋ che charaŋ ka ŋhɔk ma Hɔbatokɛ ni sɛliɛ.

Womnɔ yegbe ha Krayst Jisɔs

⁶ Yɛ mbɛ gbo sabatho ki anya laanɛ Hɔbatokɛ chee, mɔ bi ha cheɛ womnɔ yegbe ha Krayst Jisɔs, jo ŋje ma ŋhɔk ma laanɛɛ ni naythin toŋgi tiŋtiŋdɛ tha ŋa ŋkoŋ lemdɛ.

⁷ Ma bi len gbi ha hɛk mbɛnɛ ma biyɛni jali Hɔbatokɛ. Ndum ni ŋkɛn naythin Hɔbatokɛay.

⁸ Yɛlabɛ ha dum jal lɛ la li kɛlɛŋ ki naythindɛ gbi, jali Hɔbatokɛ la che li kɛlɛŋ naythinday gbi, sɔŋgɔma la yɛthiɛ kaŋgbe ha ihɔlɔŋ do ni ihɔlɔŋdɛ ŋɔ hundɛ.

⁹ Theliaŋdɛ kɔ tiŋtiŋ ni ha yɛthi ka li mani fuli.

¹⁰ Haliwɔ lanɛkiay hi ha mpanth ni hi chɔ kath, haliwɔ hi bi kithgbɔl hiɛ ko Hɔbatokɛ ihɔlɔŋdɛ, wɔ Nɔloliɛ ha nɔ-o-nɔ gbiɛ, teŋgateŋga ŋanɛ ŋa laanɛ.

¹¹ Ŋgbɔnda ni toŋgi ŋa ja lɛ ki.

¹² Ha nɔ bɛ ma fɛki fonikelimɔɛ, kɛ ncheɛ thambase ha ŋanɛ ŋa laanɛ ko theliaŋ ŋaɛ, ŋchekin ma ŋaɛ, nchɔmalenay, laanɛay, ni naythin che charaŋday.

¹³ Ni ya wɔm bɛ hun, ŋkeɛ pɔ kaŋha Ray Hɔbatokɛ faŋay, ko thɛkɛsi, ko toŋgi.

¹⁴ Ma maɛ wɔŋɔɛ kɔ biɛ, kɔ pɔ ka kamɔ ntheŋ ma ŋkɛndaɛ ma ŋa theliɛ yɛ kump ŋgbakoɛ ka gbaŋg thipiya hɔm atok.

¹⁵ Mpɛni jali handɛ ki, wɔŋni ŋkɛn ko jalilan, chelɛ ŋan gbi ŋa ke kɔ che nɔɛ.

¹⁶ Bɛkininkɛn nten ni ko lanɛ la mɔ toŋgiɛ. Yɛthini ko lanɛ vɛ, yɛ ha gbo lanɛ ki mɔ lolini ni ŋanɛ ŋa mɔ lɔŋɔ nuiyɛ.