TIMOTHI NSENDƐ 2 - Sherbro New Testament Portions

Thubi kil hɛnday

¹ Jali nsendɛ layɛ, ni ya gbɔnda chelɛ sɛliɛni nkɛn, sɛli, sɛliɛ anyin ni chɔŋsɛkɛ kɔ ha che ha nɔ-o-nɔ,

² ha abɛɛya ni ŋanɛ gbi ŋa sɛm thi bom-bom dayɛ, hi ŋa che pem ni ihɔlɔŋ mbɔs, naythin Hɔbatokɛay ni limaniay ni naythindɛ gbi.

³ Ki la liyegbe, ni la che likɔkani Hɔbatokɛ nɔloliɛ hiɛ chee,

⁴ wɔ theni ichɛk nɔ-o-nɔ sɔthɔ lol ni ha bi nten ma rɔŋdɛ.

⁵ Haliwɔ Hɔbatokɛ bul wɔ lɔɛ, ni laŋ bul yeŋthi Hɔbatokɛ ni anyin, laŋgbaŋdɛ Krayst Jisɔs.

⁶ Wɔ wɔŋ ni ŋkɛn kendɛ nɔ velia ha nɔ-o-nɔ, thambaseyɛ ka hun mɛŋk kɛlɛŋday,

⁷ Ha lanɛ ki la pɔ ka kweɛ mi nɔ thɛkɛsiɛ ni lemnɔ, nɔ toŋgiɛ ko ŋanɛ ha laanɛni hiŋg laanɛ ni rɔŋdɛ. Ya ni hɔ tiŋtiŋdɛ, ya chen fothi mbol.

⁸ Ya ŋgbelŋgbel lɛ ko gbi lɔ apukan ha yɛ, ŋa ha sɛliɛ ka thɛŋg piyathi charaŋ, ibiɛ gbɔl thukul ni ŋhɔ.

⁹ Ni amaɛ bɛ ŋa ha yolni mɛsɛ ni ka nten, ni tɔya kɛlɛŋ, chen ka nlok ma ndiŋ o ndɔŋ o nyek mithilɛ tɔya fe gbe

¹⁰ kɛ ka jaliha yegbe kendɛ amaɛ ŋa hɔ jalɛ la ŋa laanɛ.

¹¹ Ha nɔma kaŋ ha che pem ka hinilɛ.

¹² Ya yomɔni be nɔma toŋgi o ha bi fɔsa apukan atok; wɔ ha che pem.

¹³ Haliwɔ Adam wɔ pɔ ka bɛmpa nsen, ni Iv;

¹⁴ ni pɔ ka sɔyɛni Adam kɛ nɔmaɛ wɔ pɔ ka sɔyɛni wɔ ye cheɛ nɔ simiɛ saba.

¹⁵ Kɛ gbemɔ apuma kɔ bi ha loli nɔma, yɛ kɔ gbo chee laanɛay ni nchɔmalen ni che charaŋ, ka mɛsɛ.