TIMOTHI NSENDƐ 1 - Sherbro New Testament Portions

¹ Pɔl, lemnɔ Krayst Jisɔsɛ, hiŋk la Hɔbatokɛ hɔɛ, nɔloliɛ hiɛ ni Krayst Jisɔs kithgbɔl hiɛ,

² ko Timothi, komɔmi gbemɛ ayɛndɛ ko laanɛ: Wɔŋɔ Hɔbatokɛ, keyendapan, ni mbɔs hiŋk Hɔbatokɛ Baaɛ ni Bɛɛ Krayst Jisɔs.

Mɛyŋ ha kɛŋgiyɛni mbolɛ

³ Kendɛ ya gbɔnda nɔɛ yɛ ya ka che kɔni Masidonia koɛ, ntelɛ Ɛphisɔs ko, chelɛ, mɔ bɔ gbɔnda anya pum ŋa ma toŋgi jali Hɔbatokɛ li tilaŋ,

⁴ ŋa ma binthima jali mbɛnɛ ni gbal ram la biɛni mɛkindɛ la chi thoŋgaɛ la chen chi kaŋ Hɔbatokɛ kɔ laanɛayɛ;

⁵ ni kithgbɔl gbɔnda hiɛ kɔ nchɔŋmalen ma hokɔ hiŋk gbɔl charaŋ ni bolɛ yegbe ni laanɛay.

⁶ Anya pum yɛ ŋa hɛthni hiŋk lanɛ kiayɛ ŋaye pɔŋni ko theliaŋ yaiyai,

⁷ ŋani ŋgbelŋgbel ha toŋgi sabaɛ, ibiɛ saa nten ko lanɛ la ŋa hɔɛ o lanɛ la ŋa thekɛndɛ la rɔŋdɛ.

⁸ Yɛlayoɛ hi siɛ kɛ sabaɛ ŋɔ yegbe, yɛ nɔ ŋa ŋɔ kendɛ saba ŋɔ hɔɛ,

⁹ ki la sa nɔ gbo nten, kɛ pɔ bɛni saba ha ŋanɛ ŋa tiŋtiŋdayɛ kɛ ha ŋanɛ ŋa chen kwe sabaɛ ni ikweyɛ lendɛ, ha ŋanɛ ha sini Hɔbatokɛ ni anya kafaɛ, ŋanɛ ha iche charaŋdɛ ni iche jali Hɔbatokɛay ha ŋanɛ ŋa diy mbaaɛ ni ŋyaaɛ, ha nɔ diyɛ anyin,

¹⁰ hanɛ ŋa biyɛni bisin ni sabaɛ, apukanaɛ ha bi athɔma ha apukanɛ, anya wɔŋgulɔ anyin ken awok, anya mbolɛ, ŋanɛ ha gbethani mbolayɛ, ni lanɛ gbi la cheni naythin Hɔbatokɛ,

¹¹ la kɔkani ni womdi yegbeɛ lɔ bi gbɛŋ ko Hɔbatokɛ rubandɛ la komi kaɛ.

Chɔŋ sɛkɛ ha yendapan Hɔbatokɛ

¹² Ya chɔŋ sɛkɛ ko wɔnɛ wɔ kami fɔsa ha lanɛ ki, Krayst Jisɔs Bɛɛ hiɛ, haliwɔ thoŋka mi tiŋtiŋday ni toŋgimi ko mpanth ma wɔay,

¹³ yɛlabɛ ya ka che fothi mbol, ni poli ni sɔl wɔ; kɛ kemi yendapani haliwɔ yaka sini la ya haɛ ni ibiyɛ laanɛ,

¹⁴ ni wɔŋɔ Bɛɛ hiɛ kɔ mi ye gbiŋgith ka laanɛ ni nchɔmalendɛ ma Krayst Jisɔsɛ.

¹⁵ La pɔ hɔɛ la rɔŋ ni la ha laanɛ fuli, lɛ Krayst Jisɔs ka hun hɔlɔoay ha loli anya kafaɛ. Ni yaŋ ya anya kafaɛ cheɛ;

¹⁶ Kɛ ya sɔthɔ ke yendapan ha lanɛki, chelɛ, ya cheɛ nɔ nsendɛ, Jisɔs Krayst yɔn toŋgi muyu wɔ yegbeɛ ha thambasei ko ŋanɛ ŋa ka che ha bɛ laanɛ wɔnay ha ihɔlɔŋ chɔŋgbaɛ.

¹⁷ Ko Sɛmthache chɔŋgbaɛ, wɔ chen wuɛ, wɔ chen keniɛ, Hɔbatokɛ wɔn kɛn gbo, bi limani ni gbɛŋ ha hɔlɔ chɔŋgba ni chɔŋgba. Vɛlache.

¹⁸ Jaloki la ya mɔ ni kaɛ, Timothi, taa mi, kendɛ ŋhɔk ma kɛndaɛ ma vɛlɛmɔndɛ, landa kamɔ gbɔl kathil, ni chɔ chɔthi yegbeɛ,

¹⁹ mbi laanɛ ni bolɛ yegbe. Ha hɛm itɛnin, anya pum ŋa koŋ simi laanɛ ŋaɛ,

²⁰ ŋan thiyeŋ Haymineɔs ni Alɛkzandra, ŋa ya koŋ wɔŋ ko min sɔyandɛ chelɛ ŋa bɔ kaŋ ŋa ma simi nɔ jɛm.