ATHƐSALONIANAƐ NSENDƐ 5 - Sherbro New Testament Portions

Ŋa che bɛmpani ha hun Bɛɛ

¹ Kɛ ko mɛŋkɛ ni nɛnthɛ, anyami, ŋa biɛni len gbi la ha gbalni konɔkoɛ.

² Haliwɔ ŋan ayɛn ŋa siɛ hɔɛ Bɛɛ biha hun sɔŋgɔma nɔ dwiyɛ ichɔl lɛ.

³ Yɛ ayin ŋa wɔɛ, “Mbɔs ni paa ma lɔɛ”, ni gbundɛ likith hɔ ŋae bɔnth sɔŋgɔma yɛ nɔma wɔ che thɔkɔtok gbemɔɛ, ni kimɔ biɛni ha chelɔ.

⁴ Kɛ ŋa cheni rithiay, anyami, ha hɔɛ yɛ vɛ wolnɔni mɔɛ nɔ dwiyɛ.

⁵ Haliwɔ han gbi ŋa apuma cheche ni apuma hɔɛyɛ; hi chendɛ anya ichɔl o rithi.

⁶ Labiɛ lɛ hi ma lɔl, sɔŋkɔma anya tilaŋ, kɛ hi chea chɛnthilɛ ni sɔbɛ

⁷ Haliwɔ ŋanɛ ŋa lɔl ichɔl lɛ, ni ŋanɛ ŋa yil lɛ ŋa che yilɛ ichɔl lɛ.

⁸ Kɛ, yɛ hi anya ipal lɛ, hi chea sɔbɛ, ni hi tɔy ya laanɛ ni chɔŋmalen kendɛ yen paa kethɛ , ni bɔɔ pɛmdɛ ŋhɔɛ kithgbɔl lol lɛ.

⁹ Haliwɔ Hɔbatokɛ chuwɔ hini su ŋa thenɛki ishilin wɔay, kɛ hi ha sɔthɔ lol Bɛɛ Jisɔs Kraystay,

¹⁰ wɔ wu ha hindɛ chelɛ hi ma bɛ che lɛli o lɔl hi bɔ che ni wɔn.

¹¹ Labiɛ lɛ ŋa thɛthɛ ni ni ŋa bɛmani athɔma nɔɛ ha ŋan sɛm kath, kendɛ hɔ ŋa haɛ.

Mɛyŋ mɛkindɛ ni lɛyŋ mɛkindɛ

¹² Kɛ hi nɔ thɛlɛni, anyami, ŋa ka limani ko ŋanɛ ŋa ha mpanth ŋan thiyeŋdɛ ni ŋa nɔ atokɛ Bɛɛay yɛ ni ŋa nɔ mɛy yɛ,

¹³ ni ŋa ka ŋa manili bom nchɔŋmalenay ha mpanth ma ŋaɛ. Ŋa che mbɔsay han ndɛndɛ thiyeŋ.

¹⁴ Ni hi nɔ thɛlɛni, anyami, ŋa mɛy ŋanɛ ŋa yemani ha mpanthɛ, ŋa thɛthɛ ŋanɛ ŋa gbɔl thijɛthillɛ, ŋa bɛmani a jɛthjɛthɛ, ha bi muyu ni han gbi.

¹⁵ Ŋa keɛ lɛ nɔ gbi muŋgɔni iwɔy ha iwɔy, kɛ ŋa keɛ lɛ ŋa haa ikɛlɛŋ ko ŋan ndɛndɛ ni ko nɔ-o-nɔ.

¹⁶ Ŋa che mɛmiɛni mɛŋkɛ hɔn gbi,

¹⁷ Ŋa sɛli bɔnɔbul,

¹⁸ ŋa wɔŋ chɔŋsɛkɛ ki len gbi; haliwɔ lanɔ ki la Hɔbatokɛ yema ha ŋandɛ Krayst Jisɔsay.

¹⁹ Ŋa ma nyumi jɛmdi Min Charaŋdɛ,

²⁰ ŋa ma thɛkɛ kechee kɛndanɔɛ,

²¹ kɛ ŋa hɛl len-o-len; ŋa yɛthi jali yegbe kath,

²² ŋa kosini iwɔy gbi.

²³ Ha Hɔbatokɛ mbɔsɛ wɔnayɛn ha nɔ charaŋ naythindɛ gbi; ni ha minsa nɔɛ ni min ihɔlɔŋdɛ ni jal thi nɔɛ thache thɔndɔ charaŋ ni ibiɛ nthɛkɛ mɛŋkɛ hɔ Bɛɛ Jisɔs Krayst wɔ hundɛ.

²⁴ Wɔnɛ wɔ velɛ nɔɛ wɔ tiŋtiŋ, ni bi ha hala.

²⁵ Anyami ŋa sɛliɛ hi.

²⁶ Ŋa lɛiŋɛ hi anya hiɛ ka gbaŋa chɔŋmalen.

²⁷ Ya nɔ thɛlɛni ka Bɛɛ ni pɔ kaŋ rayo ki ko anya hiɛ ŋan gbi.

²⁸ Ha wɔŋɔ Bɛɛ hiɛ Jisɔs Krayst chema nɔ.