ATHƐSALONIANAƐ NSENDƐ 4 - Sherbro New Testament Portions

Ŋkaɛ ma hini Hɔbatokɛ gbɔl lɛ

¹ Mɛkindɛ ni gbi, anyami, hinɔ hɔm ni hinɔ thɛlɛni ilel Bɛɛ Jisɔsay, sɔŋgɔma ha koŋ kaŋ hiŋg hindɛ hɔ ŋa ha che ni hɔ ŋa ha hini Hɔbatokɛ gbɔl lɛ, sɔŋgɔma hɔ ŋala gbo haɛ, ŋa kɔ che ha chela ha.

² Haliwɔ ŋa si mɛy yɛ kɔ hi kanɔ ha satɔkin Bɛɛ Jisɔsɛ.

³ Haliwɔ la Hɔbatokɛ yema laɛ, chenɔ charaŋdɛ: ni ŋa hɛthni hiŋg lichoŋdal;

⁴ ni ŋa si hɔ ŋa ha gbisiŋ nɔma ŋa ndelmawɔɛ ka che charaŋay ni limaniɛ,

⁵ nchen ka theni ichɛk ŋanɛ ha laanɛniɛ ŋa sini Hɔbatokɛ.

⁶ Ni nɔ gbi che ha kwe isɔn thɔm wɔɛ, ni ma sɔkba pɛnte wɔɛ halanɔki, haliwɔ Bɛɛ wɔ muŋgɔ lanɔ ki gbiay, kendɛ hi koŋ nɔ mɛy fuliɛ.

⁷ Haliwɔ Hɔbatokɛ velɛ hini ha iche charaŋ, kɛ ha che charaŋ.

⁸ Labiɛ nɔɛ gbi wɔ fɛkiɛ gbo lanɔ kiɛ, fɛkiɛ ni ayin kɛ Hɔbatokɛ, wɔ kanɔ Min wɔ Charaŋdɛ.

⁹ Kɛ ha chɔŋmalen ha anya nɔɛ che chaŋ pɔ gbala ko-nɔ-ko, haliwɔ Hɔbatokɛ koŋ nɔ kaŋ ha han chɔŋnilen

¹⁰ ni la rɔŋ ŋa chɔŋ anya nɔɛ gbi len Masidoniako. Kɛ hi nɔ thɛlɛni, anyami, ŋa hala mɛŋkɛ hɔngbi,

¹¹ ŋa hɛl ha ŋan che pempem, ŋa bi bisin ko ŋalinɔɛ gbo, ni ŋa ha mpanth ka piathi nɔɛ, kendɛ hi gbɔnda nɔɛ;

¹² chelɛ ŋa bɔ gbɔnda manili ŋanɛ ha laanɛniɛ che, ni ŋa ma fani be nɔ.

Hun Bɛɛ

¹³ Kɛ hi che nɔ la matha, anyami, ha ŋanɛ ŋa koŋ wuiyɛ, chelɛ ŋa chen taŋ sɔŋkɔma ŋanɛ ŋa biɛni kithgbɔllɛ.

¹⁴ Haliwɔ kendɛ hi laanɛ lɛ Jisɔs wu ni muni poɛ, ni lacheɛ, Jisɔsay, Hɔbatokɛ bi ha chima wɔni ŋanɛ ŋa koŋ wuiyɛ.

¹⁵ Ha lanɔki la hi nɔ wɔmɛ ka hɔk Bɛɛ, lɛ hin hibi mu ihɔlɔŋdɛ, hi koŋ le haŋ mɛŋkɛ Bɛɛ wɔ hundɛ, hi chen bi ŋa sɛm ŋanɛ ha koŋ wuiyɛ chee.

¹⁶ Haliwɔ Bɛɛ wɔnayɛn bi ha thol hiŋg arijana ka taŋ gbɔnda, ni vel sɛmthache malkaɛ, ni lom thakɛm Hɔbatokɛ. Ni ŋanɛ ha wu Kraystayɛ ŋa peŋgɛ poɛ;

¹⁷ ni hin hi bi mu ihɔlɔŋdɛ, hi leɛ, hi bi ha thaŋni fenaɛy ni ŋan ha bɔnth Bɛɛ ihɛnday; hibi ŋa che mɛŋkɛ hɔn gbi ni Bɛɛ.

¹⁸ Labiɛ ŋa thɛthɛ ni ka ŋhɔko ki.