JƆN NSENDƐ 5 - Sherbro New Testament Portions

Nyum hiɛ hɔlɔɛ atok

¹ Nɔɛ gbi wɔ laanɛ gboɛ lɛ Jisɔs wɔɛ Kraystɛ, wɔ komɔ Hɔbatokɛ, ni nɔɛ gbi wɔ chɔŋ gbo abɛnay len dɛ chɔŋ komɔɛ len.

² Ka lanɛ ki hi siɛ lɛ hi chɔŋ apuma Hɔbatokɛ len, yɛ hi chɔŋ gbo Hɔbatokɛ len ni hi kweɛ saba thi wɔɛ.

³ Haliwɔ nchɔmalen ma Hɔbatokɛ ma kiɛ, ha hin kweɛ saba thi wɔɛ. Ni saba thi wɔɛ tha cheni dis.

⁴ Haliwɔ yendɛ gbi hɔ gbemni Hɔbatokɛ nyum hɔlɔɛ; ni laanɛ hiɛ kɔ fɔsa nyum hɔlɔɛ.

⁵ Hina wɔɛ nɔɛ wɔ nyum hɔlɔɛ kɛ nɔɛ wɔ laanɛ kɛ Jisɔs wɔ Tak Hɔbatokɛ?

Li sei ha Jisɔs Krayst

⁶ Wɔn wɔ ki wɔ hun ka mɛndɛ ni ŋkɔŋdɛ, Jisɔs Krayst, chen ka mɛndɛ gbo kɛ ka mɛndɛ ni ŋkɔŋdɛ. Ni Min Charaŋdɛ wɔɛ sei, haliwɔ Min Charaŋdɛ wɔɛ rɔŋdɛ.

⁷ Ŋseiɛ ŋa ara,

⁸ Min Charaŋdɛ, mɛn dɛ, ni ŋkɔŋ dɛ; ni araɛ ki ŋa lomthibul.

⁹ Yɛ hi kweyɛ gbo sei li anyin, sei li Hɔbatokɛ lɔ chaŋ che li bom; haliwɔ Hɔbatokɛ koŋ cheɛ sei ha Taa wɔɛ.

¹⁰ Nɔɛ wɔ laanɛ gbo Tak Hɔbatokɛ bi sei lɛ wɔnay. Nɔɛ wɔ lanɛni gbo Hɔbatokɛ koŋ wɔ piŋgiɛ nɔ mbol, haliwɔ biɛni lanɛ ko sei lɛ lɔ Hɔbatokɛ wɔŋ ha Taa wɔɛ.

¹¹ Ni sei lɛ lɔ ki, lɛ Hɔbatokɛ ka hi ihɔlɔŋ chɔŋgba, ni ihɔlɔŋ do ki hɔ Taa wɔay.

¹² Nɔɛ wɔ bi Taaɛ bi ihɔlɔŋ; nɔɛ wɔ biyɛni Tak Hɔbatokɛ biyɛni ihɔlɔŋ.

Ihɔlɔŋ chɔŋgba

¹³ Ya gbal lanɛ ki konɔko ŋan ŋa bɛ lanɛɛ ilel Tak Hɔbatokɛay, chelɛ ŋa siɛ lɛ ŋa bi ihɔlɔŋ chɔŋgba.

¹⁴ Ni kithgbɔllɛ kɔ kiɛ kɔ hi bi wɔnayɛ, lɛ yɛ hi yiyɛ gbo ha yen gbi sɔŋgɔma hɔ yema laɛ wɔ hi theɛ.

¹⁵ Ni yɛ hi si gboɛ lɛ wɔ hi theɛ ko lanɛ gbi la hi yiɛ gboɛ, hi siɛ hi koŋ sɔthɔ yendɛ hɔ hi yiɛ wɔɛ.

¹⁶ Yɛ nɔ gbi ke gbo anyin ŋa ha iwɛiyɛ hɔ che ŋa diɛ, bi ha yi, ni Hɔbatokɛ bi ha ka ihɔlɔŋ ha ŋanɛ ŋa iwɛi ŋaɛ hɔ che ŋa diɛ. Iwɛi hɔlɔ hɔ ŋa diɛ; ya hɔndɛ nɔ wɔ ha sɛli ha lan.

¹⁷ Jali wɛi gbi la iwɛi, kɛ iwɛi hɔlɔ hɔ chen diɛ.

¹⁸ Hi siɛ lɛ nɔɛ gbi wɔ gbemni Hɔbatokɛ chen ha iwɛi, kɛ Tak Hɔbatokɛ wɔ wɔ thɔŋgul, ni nɔ kafa che wɔ bɛŋ.

¹⁹ Hi siɛ lɛ hi ha Hɔbatokɛ, ni hɔlɔɛ gbi hɔ fɔsa nɔ kafay.

²⁰ Ni hi siɛ lɛ Tak Hɔbatokɛ koŋ hun ni koŋ hi ka sa nten, ha si wɔ wɔn wɔ tiŋtiŋ; ni hi wɔnay wɔn wɔ tiŋtiŋ, Taa wɔay Jisɔs Krayst. Ki wɛ Hɔbatokɛ tiŋtiŋdɛ ni ihɔlɔŋ chɔŋgba.

²¹ Apuma tata, ŋa kosini ithɔm.