JƆN NSENDƐ 4 - Sherbro New Testament Portions

Min charaŋ tiŋtiŋdɛ ni ha mbollɛ

¹ Anya ŋchɔmalen, ŋa ma laanɛ min gbi, kɛ ŋa hɛl minsɛ ni ŋa ke lagbondɛ ŋa ha Hɔbatokɛ; haliwɔ ŋkɛnda ambollɛ a gbe ŋa koŋ honi hɔlɔay.

² Ka lanɛ ki ŋa si Mindɛ wɔ ha Hɔbatokɛ: mindɛ gbi wɔ si gboɛ lɛ Jisɔs Krayst koŋ hun jal layɛ wɔ ha Hɔbatokɛ,

³ mindɛ gbi wɔ si ni gbo Jisɔsɛ cheni ha Hɔbatokɛ ni min boŋsua Kraystɛ wɔ ki, wɔ ŋa koŋ theyɛ lɛ wɔ bi ha hundɛ, ni yɛlayoɛ wɔ lɔ ni hɔlɔay.

⁴ Apuma tata, ŋa ha Hɔbatokɛ, ni ŋa koŋ nyum min boŋsua Kraystɛ; haliwɔ wɔnɛ wɔ nɔayɛ wɔ bomba chaŋ wɔnɛ wɔ hɔlɔayɛ.

⁵ Ŋa ha hɔlɔɛ, labiɛ la ŋa hɔɛ la ha hɔlɔɛ, ni hɔlɔɛ ŋɔ ha lɔŋɔ nui.

⁶ Hi ha Hɔbatokɛ. Nɔɛ gbi wɔ si Hɔbatokɛ wɔ lɔŋ nui kohiko, ni nɔɛ wɔ cheni ha Hɔbatokɛ chen lɔŋ nui kohiko. Ka lanɛ ki hi si min rɔŋdɛ ni min iche rɔŋdɛ.

Hɔbatokɛ wɔ nchɔmalen

⁷ Anya nchɔmalen, hi chɔŋniyalen; haliwɔ nchɔmalen ma ha Hɔbatokɛ, ni nɔɛ gbi wɔ chɔŋlendɛ wɔ gbemni Hɔbatokɛ ni si Hɔbatokɛ.

⁸ Nɔɛ gbi wɔ chɔŋɔnilendɛ sini Hɔbatokɛ; haliwɔ Hɔbatokɛ wɔɛ nchɔmalen.

⁹ Lanɛ kiay nchɔmalen ma Hɔbatokɛ ma toŋgiɛni hin thiyeŋ, lɛ Hɔbatokɛ wom Taa wɔ bulɛ hɔlɔay, chelɛ hi bɔ che wɔnay.

¹⁰ Lanɛ kiay la nchɔmalen, la chendɛ lɛ hi chɔŋ Hɔbatokɛ len kɛ lɛ wɔŋ wɔ chɔŋ hi len ni wom Taa wɔɛ ha cheɛ nɔ theyɛnɛki ha iwɛi hiɛ.

¹¹ Anya nchɔmalen, yɛ Hɔbatokɛ chɔŋ hi gbo len fuli, hin bɛ fuli hi ha chɔŋniyalen.

¹² Be nɔ gbi ka mu keni Hɔbatokɛ; yɛ hi chɔŋniya gbo len; Hɔbatokɛ wɔ hi cheay ni nchɔmalen ma wɔɛ ma koŋ che pɛɛ hinay.

¹³ Ka lanɛ ki hi siɛ lɛ hi wɔay ni wɔ hiay, haliwɔ koŋ hi ka ŋa wɔ Mindɛ.

¹⁴ Ni hi koŋ ke ni hi wɔŋ li sei lɛ Baaɛ koŋ wom Taa wɔɛ ha cheɛ Nɔloliɛ hɔlɔɛ.

¹⁵ Nɔɛ gbi wɔ si gboɛ lɛ Jisɔs wɔ Tak Hɔbatokɛ, Hɔbatokɛ wɔ wɔnay, ni wɔn wɔ Hɔbatokɛay.

¹⁶ Labiɛ hi si ni hi laanɛ nchɔmalendɛ ma Hɔbatokɛ bi ha hin dɛ. Hɔbatokɛ wɔɛ nchɔmalen, ni nɔɛ wɔ gbo nchɔmalenayɛ wɔ Hɔbatokɛay, ni Hɔbatokɛ wɔ wɔnay.

¹⁷ Kiay lɔ nchɔmalen ma koŋ pɛɛ hinay, chelɛ hi bɔ bi kithgbɔl ha hɔɛ thoŋgaɛ, haliwɔ ŋɔ wɔ yɛ vɛ hi hɔlɔ kiay.

¹⁸ Ŋkwath ma cheni nchɔmalenay, kɛ nchɔmalen pɛɛ ma tho ŋkwath. Haliwɔ ŋkwath ma bi ha ha len ni ŋgbathil, ni nɔɛ wɔ ha ŋkwathɛ biyɛni nchɔmalen pɛɛ wɔnay.

¹⁹ Hi chɔŋlen, haliwɔ wɔ peŋgɛ hi chɔŋlen.

²⁰ Nɔɛ gbi wɔ hɔ gboɛ, “Ya chɔŋ Hɔbatokɛ len”, ni mith pɛnte wɔɛ, wɔɛ nɔ mbol; haliwɔ yɛ nɔɛ gbi wɔ chɔŋɔni gbo pɛnte wɔɛ lendɛ wɔ koŋ keɛ, chen bɔ chɔŋ Hɔbatokɛ len wɔ keniɛ.

²¹ Ni sabaɛ ki hɔ hi bi hiŋg wɔnɛ, lɛ wɔnɛ wɔ chɔŋ Hɔbatokɛ len dɛ wɔ ha chɔŋ pɛ pɛnte wɔɛ len.