JƆN NSENDƐ 3 - Sherbro New Testament Portions

Apuma Hɔbatokɛ

¹ Ke ŋchɔmalen mbomdɛ ma Baaɛ koŋ hi kaɛ, chelɛ pɔ hi velɛ apuma Hɔbatokɛ; ni vɛ hiɛ. Yendɛ ŋɔ bi hɔlɔɛ hɔ si hi niɛ haliwɔ hɔ si wɔni.

² Anya ŋchɔmalen, hi apuma Hɔbatokɛ yɛlayoɛ; la panmu toŋgini ŋɔ hi bi ha cheɛ, kɛ hi siɛ yɛ wɔ toŋginiɛ hi bi ha che kendɛ wɔn, haliwɔ hi bi ha ke wɔ kendɛ ŋɔ wɔ yɛ.

³ Ni nɔɛ gbi wɔ bɛ gbo kithgbɔl wɔnayɛ wɔ hani charaŋ kendɛ hɔ wɔ charaŋdɛ.

⁴ Nɔɛ gbi wɔ ha gbo iwɛiɛ wɔ ikweɛ saba; iwɛi hɔɛ ikweɛ saba.

⁵ Ŋa siɛ lɛ ka toŋgini ha kwe iwɛi, ni wɔnay iwɛi ŋɔ chelɔni.

⁶ Nɔɛ gbi wɔ wɔnayɛ chen ha iwɛi; nɔɛ gbi wɔ ha iwɛiɛ ke wɔn mu o si wɔn mu.

⁷ Apuma tata, ha nɔ gbi ma nɔ dik bolmin. Nɔɛ gbi wɔ ha gbo ja tiŋtiŋdɛ wɔ naythin tiŋtiŋday, kendɛ Jisɔs wɔnbɛ wɔ tiŋtiŋdayɛ.

⁸ Nɔɛ gbi wɔ ha gbo iwɛiɛ wɔ ha min dɛ; haliwɔ min dɛ koŋ ha iwɛi hiŋg tipɛkɛ. Yendɛ hɔ bi Tak Hɔbatokɛ ka toŋgini ha simi mpanth ma min dɛ.

⁹ Nɔɛ gbi wɔ Hɔbatokɛ gbemdɛ chen ha iwɛi; haliwɔ che Hɔbatokɛ kɔwɔay, ni chen bɔ ha iwɛi haliwɔ wɔ gbemni Hɔbatokɛ.

¹⁰ Ka lanɛ ki ŋanɛ ŋa apuma Hɔbatokɛ ŋa bɔ keni, ni ŋanɛ ŋa apuma min dɛ; nɔɛ gbi wɔ hani gbo tiŋtiŋ dɛ, ni nɔɛ gbi wɔ chɔŋɔni pɛnte wɔɛ len dɛ cheni ha Hɔbatokɛ.

Ŋa chɔŋ ni len

¹¹ Haliwɔ wom dɛ lɔki lɔ ŋa koŋ theɛ hiŋg tipɛkɛ, lɛ hi ha chɔŋniyalen,

¹² ni hi ma che kendɛ Ken wɔ ka che wɛiyɛ ni di pɛnte wɔɛ. Ni yɛ bi ni di wɔa? Haliwɔ jaliwɔ li ha la ka che li wɛi ni ha li pɛnte wɔɛ la ka che tiŋtiŋ.

¹³ Ŋa ma kabani, anya mi, lɛ hɔlɔɛ mith nɔ.

¹⁴ Hi siyɛ lɛ hi koŋ chaŋ hiŋg li wu hi koŋ pɔŋni ihɔlɔŋday, haliwɔ hi chɔŋ anya hiɛ len. Nɔɛ wɔ biɛni gbo nchɔmalendɛ wɔ li wuay.

¹⁵ Nɔɛ gbi wɔ mith gbo pɛnte wɔɛ wɔ nɔ diɛ nɔ, ni ŋa siɛ lɛ nɔ diɛ nɔ gbi biɛni ihɔlɔŋ chɔŋgba wɔnay.

¹⁶ Ka lanɛ kiay hi si ŋchɔmalen, Jisɔs wɔŋ ihɔlɔŋ wɔɛ ha hin; ni hin bɛ hi ha wɔŋ hɔlɔŋ thihiɛ ha anya hiɛ.

¹⁷ Kɛ yɛ nɔ gbi bi gbo ŋyek ma hɔlɔɛ ni ke pɛnte wɔɛ biɛni, kɛ kathaliya gbɔl wɔɛ ŋa wɔn, hɔ ŋchɔmalen ma Hɔbatokɛ ma che wɔnaya?

¹⁸ Apuma atata, hima bi ŋchɔmalen ŋhɔkay o theliaŋ day kɛ ki jalihay ni rɔŋday.

Thɛthɛ gbɔl Hɔbatokɛ che

¹⁹ Ka lanɛ ki hi bi ha siɛ lɛ hi ha rɔŋdɛ, ni hi bi kith gbɔl wɔn che

²⁰ mɛŋk kɛ gbi hɔ gbɔl thihiɛ tha poliɛ hi gboɛ; haliwɔ Hɔbatokɛ wɔ bomba chaŋ gbɔl thihiɛ, ni si len-o-len gbi.

²¹ Anya ŋchɔmalen, yɛ gbɔl thihiɛ tha poliɛ hi ni gbo, hi bi kithgbɔl Hɔbatokɛ che;

²² ni hi sɔthɔ hiŋg wɔn lendɛ la hi yiɛ, haliwɔ hi thɔŋgulɔ saba thi wɔɛ ni hi haa lanɛ la wɔ hini gbɔl lɛ.

²³ Ni saba wɔɛ hɔ ki, lɛ hi ha bi laanɛ ko ilel Taa wɔɛ Jisɔs Krayst ni hi chɔŋniyalen kendɛ ŋɔ ko hi gbɔndaɛ.

²⁴ Ŋanɛ gbi ŋa yɛthiɛ gbo saba thi wɔɛ ŋa wɔnay, ni wɔn wɔ hanay. Ni ka lanɛ ki hi siɛ lɛ wɔ hiay, ka Min Charaŋdɛ ŋɔ koŋ hi kaɛ.