JƆN NSENDƐ 2 - Sherbro New Testament Portions

¹ Apuma mi atataɛ, ya gbal lanɛ ki konɔ ko chelɛ ha chen ha iwɛi; kɛ yɛ nɔ gbi ha gbo iwɛi, hi bi nɔ thɛlɛni Baa, Jisɔs Krayst nɔ tiŋtiŋdɛ;

² ni wɔn wɔɛ nɔɛ wɔ thenɛki ha iwɛi hiɛ, ni chen gbo ha ha hiɛ kɛ ha iwɛi hɔlɔɛ hɔn gbi.

³ Ni ka lanɔki hi bɔ bi lanɛɛ lɛ hi si wɔ, yɛ hi thɔŋgul saba thi wɛ.

⁴ Wɔnɛ wɔ hɔɛ “ya si wɔ” kɛ yɛthiyɛni saba thi wɛ wɔ nɔ mbol, ni tiŋtiŋdɛ chen wɔnay;

⁵ kɛ nɔɛ gbi wɔ thɔŋgulɔ gbo hɔk wɔɛ, rɔŋ nɔɛ kiyay chɔŋmalen ha Hɔbatokɛ ma mpɛɛ. Ka lanɛ ki hi bɔ lanɛɛ lɛ hi wɔnay:

⁶ nɔɛ wɔ hɔɛ wɔ che wɔnayɛ wɔ ha gbɛɛ paopa nay thin bulay tha Jisɔs bɛ gbɛɛ.

Saba Sanaɛ

⁷ Anya ŋchɔmalen, ya che nɔ gbala saba sana, kɛ saba bɛn ŋɔ ŋa bi hiŋg tipɛkɛ; saba bɛn dɛ kɔ hɔkɛ kɔ ha koŋ theɛ.

⁸ Kɛ ya nɔ gbala saba sana, kɔ rɔŋ Wɔnay ni ŋanay, haliwɔ rithiɛ kɔ chaŋ ni cheche rɔŋdɛ kɔ bɛ mithil.

⁹ Nɔɛ wɔ hɔɛ wɔ checheayɛ ni mith pɛnte wɔɛ wɔ rithiay thuŋ.

¹⁰ Nɔɛ wɔ chɔŋ pɛnte wɔɛ len dɛ wɔ checheay, ni kɔnay len gbi chen bɔ ha ha pɛmplɛ.

¹¹ Kɛ nɔɛ wɔ mith pɛnte wɔɛ wɔ rithiay ni wɔ gbɛ rithiay, ni sini ko lɔ wɔ kɔɛ, haliwɔ rithiɛ koŋ gbiŋgith hɔl thi wɔɛ.

¹² Ya ni gbal konɔko, apuma tata, haliwɔ iwɛi nɔɛ koŋ may ni satokin wɔn.

¹³ Ya gbal konɔko, mbaa, haliwɔ ŋa si wɔ wɔ hiŋg tipɛkɛ. Ya gbal konɔko, ndaŋgbaŋ, haliwɔ ha koŋ buŋ nɔ wɛiyɛ. Ya gbal konɔko, apuma, haliwɔ ŋa si Baaɛ.

¹⁴ Ya gbal konɔko, mbaa, haliwɔ ŋa si wɔ wɔ hiŋg tipɛkɛ. Ya gbal konɔko, ndaŋgbaŋ, haliwɔ ha adumɔ, ni hɔk Hɔbatokɛ kɔnɔ ŋanay, ni ŋa koŋ buŋ nɔ wɛiɛ.

¹⁵ Ŋa ma chɔŋ hɔlɔɛ len o yensɛ ŋɔ hɔlɔayɛ. Yɛ nɔ gbi chɔŋ gbo hɔlɔɛ len, ŋchɔmalen ha Baaɛ cheni wɔniay.

¹⁶ Haliwɔ yendɛ gbi ŋɔ hɔlɔayɛ, ŋgbel-ŋgbel ma jalɛ ni ŋgbel-ŋgbel ma hɔlthɛ ni thɛŋgthihɔl ihɔlɔŋdɛ, hɔ cheni ha Baaɛ kɛ ŋɔ ha hɔlɔɛ.

¹⁷ Ni hɔlɔɛ ŋɔ chaŋ, ni ŋgbel-gbel ma lan; kɛ wɔnɛ wɔ ŋa la Hɔbatokɛ yemaɛ bi ha che ha chɔŋgba

Nɔ ŋchenkɛ ha Krayst

¹⁸ Apuma, mɛŋk mɛkin dɛ hɔɛ; ni kendɛ ŋɔ ŋa koŋ theɛ kɛ boŋsua Kraystɛ wɔ hunɛ, kɛ yɛlayoɛ aboŋsua Kraystɛ agbe ŋa koŋ hun; labiyɛ hi siɛ lɛ mɛŋk mɛkindɛ ŋɔɛ.

¹⁹ Ŋa hokɔ hinay, kɛ ŋa ka cheni ha hin; haliwɔ yɛ ha ka gbo koŋ che ha hin, ha ma kan koŋhi kɔmani; kɛ ha ka koŋ kɔni, lɛ labɔ toŋginiɛ lɛ ŋan gbi ŋa cheni ha hin.

²⁰ Kɛ Nɔ Charaŋdɛ koŋ nɔ pɔlɔ, ni ŋan gbi ŋa sila.

²¹ Ya gbal ko nɔ ko, la chendɛ haliwɔ ŋa sini rɔŋdɛ, kɛ haliwɔ ŋa si kɔ, ni ŋa siɛ lɛ be mbol ma cheni rɔŋday.

²² Hina wɔɛ nɔ mbola kɛ wɔnɛ wɔ hɛmɛ lɛ Jisɔs wɔɛ Kraystɛ? Ki wɔɛ boŋsua Kraystɛ, nɔɛ wɔ hɛm Baaɛ ni Taaɛ.

²³ Nɔɛ wɔ hɛm Taaɛ biyɛni Baaɛ. Nɔɛ wɔ si gbo Taaɛ bi Baaɛ bɛ.

²⁴ Ha lanɛ la koŋ theɛ hiŋg tipɛkɛ la che mɔay, yɛ la koŋ theɛ hiŋg tipɛkɛ la mɔ gboay, ni mɔ ye che Taay ni Baay.

²⁵ Ni lanɛ ki la wɔ koŋ kweyɛ kaŋgbe ŋa hin, ihɔlɔŋ chɔŋgba.

²⁶ Ya gbal lanɛ ki konɔko ha ŋanɛ ŋa nɔ dik bolmindɛ;

²⁷ kɛ pɔlɔɛ kɔ ŋa sɔthɔɛ hiŋk wɔndɛ kɔnɔay. Ni pɔ chenɔ pɛ toŋgi, haliwɔ kendɛ pɔlɔ wɔɛ kɔ nɔ toŋgi len gbi, ni la rɔŋ, ni kɔ cheni mbol, kendɛ hɔ kɔ koŋ nɔ toŋgiɛ, ŋa che wɔnay.

²⁸ Ni yɛlayowɛ, apuma tata, ha che wɔnay, chelɛ yɛ bi ha toŋginiɛ hi bɔ bi kithgbɔl ni hi chen chokulni hiŋg wɔn ka ndap yɛ wɔ hundɛ.

²⁹ Yɛ si gboɛ lɛ wɔn wɔ tiŋtiŋday, mɔ bɔ bi lanɛ lɛ nɔɛ gbi wɔ ha gbo jali tiŋtiŋdɛ gbemni wɔnay.