JƆN NSENDƐ 1 - Sherbro New Testament Portions

Hɔk ihɔlɔŋ dɛ

¹ Lanɛ la ka che hiŋg tipɛkɛ, la hi koŋ theɛ, la hi koŋ ke ka hɔl thi hiɛ, la hi koŋ lɛli atokɛ ni hi koŋ bɛŋ ka piya thihiɛ, la vɛlɛni hɔk ihɔlɔŋ dɛ

² pɔ ka toŋgi ihɔlɔŋdɛ, ni hi ke ŋɔ, ni hi wɔŋ li sei, ni hi cham konɔko ihɔlɔŋ chɔŋgbaɛ ŋɔ ka che ni Baaɛ ni pɔ ka toŋgi ŋɔ kohiko

³ lanɛ la hi koŋ keɛ ni hi theɛ la hi pɛ cham konɔkoɛ chelɛ ŋa bi binthiman ni hin; ni binthiman hiɛ kɔ ni Baaɛ ni Ta wɔɛ Jisɔs Krayst.

⁴ Ni hi ni gbal lanɛ ki chelɛ iŋɔɛ hiɛ pɛ thiŋ.

Hɔbatokɛ wɔ cheche

⁵ Wom lɛ lɔ ki lɔ hi koŋ theɛ hiŋg wɔn ni cham lɔ konɔko, lɛ Hɔbatokɛ wɔɛ cheche ni wɔnay rithi gbi kɔ che lɔ ni.

⁶ Yɛ hi hɔ gboɛ hi binthiman ni wɔn yɛ hi gbɛɛ rithiayɛ, hi fothi mbol ni hi chen gbɛ tiŋtiŋday;

⁷ kɛ yɛ hi gbɛɛ gbo checheay, kendɛ ŋɔ wɔ checheayɛ, hi bi binthiman ni athɔmahiɛ, ni ŋkɔŋ ma Jisɔsɛ Ta wɔɛ ma hi dinthi hiŋg iwɛi hiɛ gbi.

⁸ Yɛ hi hɔ gboɛ hi biɛni iwɛi, hi diniŋkɛn bolmin, ni tiŋtiŋdɛ kɔ cheni hinay.

⁹ Yɛ hi lanigbo iwɛi hiɛ, wɔ tiŋtiŋ ni rɔŋ, ni wɔ bi ha may iwɛi hiɛ ni dinthiɛ hi hiŋg iche naythin tiŋtiŋday gbi.

¹⁰ Yɛ hi hɔ gboɛ hi hani iwɛi, hi wɔ piŋgiɛ nɔ mbol, ni hɔk wɔɛ kɔ cheni hinay.