Yowani 7 - Seysyo No Tao

Si Yeso a kada wari na

¹ Makarahan am nilivolivon ni Yeso o peycyeylilyan na do Cyadidi. So ji na rana kei no kangay na do Yotay, ta naknakmen da no tao do Yotay si Yeso a zakaten.

² Makeykai rana o ipamarimaring da so kanen no tao do Yotay do kapakanakem da so ineynapo da a nimeyvahay do sarwap no kakwa pa am

³ maniring sira wari na ni Yeso jya am, “To mo na ngaroi do jya kangay mo do Yotay, ta pakacittan da no macilocilolo jimo dang so vazay mo.

⁴ No kakzeben o kapakateneng da do kataotao no tao am ji naywa o vazay. No si manoyong o kapeyvazay mo so mapeyzokab a vazay am patwawen mo do karwarwan no tao. Ta ori o ipakateneng da jimo no aro a tao.”

⁵ O ikakman da sang da wari na am ji da pa nganoyngi si Yeso.

⁶ Maniring jira si Yeso am, “Beken a araraw na pa ya no kapatwaw ko so vazay ko. Am inyo am apya jinyo.

⁷ Ji da macioyai inyo no tao do karawan. Am pacioyyan da yaken, ta ji ko nitayo o ciring ko jira do raraten da.

⁸ Angay kamo a mamaring so kanen. Jyabo kangay ko sicyaikwaya. Ta beken a araraw na pa ya no yangay ko.”

⁹ Mateyka ni Yeso o ciring na ipanci jira am todavezed pa do Cyadidi.

Macipamaring so kanen si Yeso

¹⁰ Mangay rana sira wari na ni Yeso am mangay macipamarimaring so kanen si Yeso. Am ji mapacita do tao.

¹¹ No kapamaring da so kanen no tao do Yotay am nimakapya sira komala si Yeso.

¹² Tatasa o meyyahhahes do aro a tao a mazyak ni Yeso. Amyan so manci nya apya. Amyan so manci nya yamanlita so tao.

¹³ Am ji dadkeci do karwarwan no tao a patwawen o apya vazay na, ta ikanyahey da o panipanirsirngen da no tao do Yotay.

¹⁴ Ji pa ngavos o ipamaring da so kanen am mangay si Yeso do rako a panaralayan a mangnanao so tao.

¹⁵ Isavasavak da no panipanirsirngen da no tao do Yotay. Maniring sira am, “Asyo o tao eya yateywara so ciring a yajya nimeyvatvatek asyo.”

¹⁶ Maniring si Yeso am, “Beken a monganay jyaken o yako ipangnanao, ta yamonganay ori do yanitomovoy jyaken.

¹⁷ No manoyong o tao a mangononong do apyahen ni Ama ta do to am katenngan na o ka yaken na, ka si Ama ta do to no nanao.

¹⁸ O mapagaz so ciring do kataotao na am manoyong o akman sang a mapazway. Am o tao a makza no kazwazway da so nimapahanhan sya am manoyong o akman sang a jyalas.

¹⁹ Si Moyse rana am nitoro na jinyo o iwawalam ni Ama ta do to. Am yabo jinyo o yamanoyong a yamangozay jya. Ikongo nyo naknakman so nyo kawakwak jyaken.”

²⁰ Maniring sira o aro a tao am, “Ka kovotan eya an? Sino yamwakwak jimo.”

²¹ Maniring si Yeso am, “Ipisa ko pa nimeyvazay so rako a vazay do ipeywalam no tao am niyak nyo.

²² Am nipanci na inyo ni Moyse a amyongkad do kataotao nyo. Am beken a nimapo ji Moyse o kayongkad do kataotao, ta nimapo do ineynapo nyo. Ta yanyo yongkadan o ananak nyo do yaipeywalam no tao.

²³ No si myan so tao a amyongkad do anak na do ipeywalam no tao, do kahap na so iwawalam ni Moyse am ikongo nyo oyyan nyaken no yako mangiwakwak so tao do ipeywalam no tao.

²⁴ Iptad nyo na o kapanci nyo nyaken a meyraraten a tao. Ta to nyo na peyyana do onowned nyo o kapya na, karahet na no vazay ko.”

Misayya si Yeso?

²⁵ Maniring o tatasa ka tao do Yelosaleng am, “Beken a oya o yada naknakmen eya wakwaken asyo?

²⁶ Asyo yabo tao a yamwoya nya. Yameyzezyak do karwarwan no tao. Ala da katenngan no panipanirsirngen o na ka Misayya an?

²⁷ Am no mai o Misayya am jyabo tao a makateneng do kapwan na. Am si Yeso rana am tamo todamimin a yakatenngan o yana nikapwan.”

²⁸ No kano nang am mangnanao si Yeso do rako a panaralayan. Maniring a amlolos am, “Kamo manoyong a yamakateneng jyaken? So nyo ipakateneng do yako nikapwan? Beken a ko to meynakman ko kai. Ta yana nitovoy yaken ni Ama ta do to. So na jyalasi ni Ama ta do to. Am yanyo jyatenngi si Ama ta do to.

²⁹ Ko katenngan si Ama ta do to, do yako kanimapo jya. So ika iya na no yanitomovoy jyaken.”

³⁰ Karahan am naknakmen da rakpen am abo tao a manapet jya, ta beken a araraw na pa no irakep da sya.

³¹ Am amyan do aro a tao ang so omanoyong jya. Maniring sira am, “No si mai o Misayya am arwaro pa o peyvazain na vazay a yongkad no kayapo na ji Ama ta do to a kano tao eya?”

Manovoy sira so pamzaten da tao amrakep si Yeso

³² Mamizing da no tao a macyagom do Vadisay o kazyak da ni Yeso am mapahanhan sira kano panipanirsirngen no mapatanatanang so nakem da si Ama ta do to so mamzamzat a mangay amrakep si Yeso.

³³ Maniring si Yeso am, “Yalikey rana o ipacikaop ko jinyo a kapeysinaoli ko na mangay do yanitomovoy jyaken do karawan.

³⁴ Kalahen nyo yaken am ji nyo a kala yaken, ta o angayan ko am ji nyo angai.”

³⁵ Maniring sira o panipanirsirngen da no tao do Yotay do kadwan jira am, “Do wanjin na angayan a ji tamo makakalai sya. Yamangay saon a yameyvahay do Sila a amnanao sira so kasina ta no inawan?

³⁶ Na ipanci tamo kakala sya am ji tamo a kala. Ji tamo a tokod kono o angayan na. Ikeykongo peypeypangayan no ciring na ang.”

Akmey atbod o Seyzi a yapwan no to meyyonong a ikavyay no tao

³⁷ Ney makdeng na o pangavosan da mamaring so kanen. No kano nang am meytatanek si Yeso. Maniring a amlolos am, “No mawaw a tao am mai jyaken amyop.

³⁸ Ta akman so domket do Seysyo a ciring, ‘Omanoyong jyaken am amyan so akmey atbod a ranom a jyates a amvoyog do onowned na pakahapan da no tao so to meyyonong a ikavyay no pahad da.’ ”

³⁹ O ciring ni Yeso am pakacirngen na do omanoyong jya do kapakahap da so Seyzi. No kano nang am ji pa nimeygegcin o Seyzi do omanoyong jya tao, ta ji pa nimakaranes o azwazway na a nimirwa a mavyay a meycyakavat do teyngato si Yeso.

Meykataretarek a ciring da si Yeso

⁴⁰ Mamizing da o ciring ni Yeso no aro a tao am maniring o karwan da am, “Yamanoyong oya tamo nanalahen a panoyonoywan na so ciring ni Ama ta do to.”

⁴¹ Amyan jira ang so manci nya Misayya. Am maniring sira o kadwan jira am, “Ta to na apoi no Misayya do Cyadidi!

⁴² Ta maniring do Seysyo am macikownongan ji Tawey o Misayya. Am mangay malikey do mina ili na ni Tawey a meyngaran so Podiheng.”

⁴³ Ori o nipeyhatay da so onowned a ji macipaswasovoy.

⁴⁴ Naknakmen da no karwan da rakpen si Yeso am abo tao a manapet jya.

Ji da nganoyngi si Yeso no panipanirsirngen no tao do Yotay

⁴⁵ Meysinaoli sira o mamzamzat a tao do panipanirsirngen no mapatanatanang so nakem da si Ama ta do to a kano tao a macyagom do Vadisay am maniring sira am, “Ikongo nyo ji maciralai ji Yeso a yai.”

⁴⁶ Maniring sira o mamzamzat am, “Ji namen pa nimakamizing so akman sito so ciriciring.”

⁴⁷ Maniring sira o tao a macyagom do Vadisay am, “Na to litai pa inyo no nang?

⁴⁸ Manngwa, yamyan so panipanirsirngen a kano tao a macyagom do Vadisay a yaomanod jya?

⁴⁹ Peydednan na sira no peyoyaoyyan na ni Ama ta do to omanoyong jya tao. Ta da jyatenngi o iwawalam ni Moyse.”

⁵⁰ Amyan jira ang so meyngaran so Niketemo. Iya rana ori am nimangay na nipacici si Yeso no kakwa pa. Maniring jira am,

⁵¹ “Beken a iwawalam ta o kato mancyan no tao a meyraraten a jya nimamizing so ciring a jya nimacita meyraraten.”

⁵² Maniring sira am, “Yaka tao do Cyadidi saon. Cita pala do Seysyo. Jyabo o yasa ka panoyonoywan na so ciring ni Ama ta do to a nimapo do Cyadidi a.”

⁵³ [Mamimin sira o aro a tao amrateng rana do kavahayan da.