Yowani 6 - Seysyo No Tao

Nibsoy na ni Yeso o kakaliman na ranaw (5000) a tao

¹ Karahan am meypangay si Yeso do katovangan na no rako a meybebneng a ranom a meyngaran so Cyadidi. O ikadwa no ngaran no nang am Tipilyo.

² Macita da no aro a tao si Yeso a nimangiwakwak so tao am onotan da.

³ Mangay si Yeso a kano macinanao jya do tokon a mawalawalam do dang.

⁴ No kanang am masngen rana o kapamaring da so kanen no tao do Yotay do Iyeci.

⁵ Macita ni Yeso o aro a tao a mangay jya. Maniring ji Veydipo am, “Do wanjin pakasazangan ta so kanen no aro a tao ang a ipakan ta sira.”

⁶ O peycirngan na sang am ileylamdam na si Veydipo. Ta katenngan ni Yeso rana o ahahapan na sya.

⁷ Maniring si Veydipo am, “Tana meyvazay ko so kasisi no awan am ji pa makanet a ipanazang so ipakan so aro a tao ito.”

⁸ Maniring o asa ka macinanao jya meyngaran so Antele a kakteh ni Simong Pite am,

⁹ “Yamyan jya so asa ka kanakan a yanimeyotwan so yalima ka myanpaw a kano yadwa ka among. Am no si pongden do aro a tao am jyabo kaponged na jira.”

¹⁰ Maniring jira si Yeso am, “Pancyan kamo sira amlisna.” Am katamtamkan o yanan da. Karahan am mamimin rana sira amlisna. O vilang da no mahakay am kakaliman a ranaw (5000) sira.

¹¹ Hapen na ni Yeso o myanpaw a kasaray na nya ji Ama ta do to. Karahan am pongden da rana no macinanao jya do meykalyalipenpen a amlisna tao. Akman sang o among a nivonong da, kapakapya da rana koman.

¹² Mabsoy rana sira am maniring si Yeso do macinanao jya am, “Peykakasa kamo na o atda da. Ta ingbeywan.”

¹³ Karahan am peykakasahen da na o atda da do alima ka myanpaw ang. Peysinsinmowen da o ji da nimimina am nipno da o adwa so ikarwa a yala.

¹⁴ Macita da o mina vazay ni Yeso a yongkad no kayapo na ji Ama ta do to am maniring sira am, “Oya saon o da ipanci a yamai do teyrahem a panoyonoywan na so ciring ni Ama ta do to.”

¹⁵ Katenngan na ni Yeso sira toda ji ngamaog sya a panirsirngen da. Am ori o nikaveyvow na nimangay do tokon a tomayo nira.

No kalam na do ranom si Yeso

¹⁶ Maseyrem rana am mangay sira o macinanao jya do rako a meybebneng a ranom,

¹⁷ a kasakay da do tataloran a mangay do katovangan na ili a meyngaran so Cyapaynong. Mahep rana no kano nang am ji pa nimakaranes si Yeso jira.

¹⁸ Makarahan am to na nangsangan. To rana maciralay o paopaong na.

¹⁹ Amyan sira do karakwan no rako a meybebneng a ranom a mangaod o macinanao jya am macita da si Yeso a omalam do ranom a meypasngen jira. Macita da am manyahey sira.

²⁰ Maniring si Yeso jira am, “Ji kamo anyahey, ta yaken.”

²¹ Karahan am masaray sira mapazagpit si Yeso do tataloran da. So ji da nimeyyahahai a makaranes do angayan da hevek.

Kalahen da si Yeso no aro a tao

²² Ikadwa na araw am katenngan da no aro a tao si Yeso a jya nimacihza do macinanao jya. Ta nimacita da si Yeso a jya nimacikavang jira do tataloran no kakaod da sya no macinanao jya. Ta asa o tataloran a nimacita da do dang.

²³ Amyan so nimapo do Tipilyo a tataloran a manbong do masngen do nyahapan na ni Yeso so myanpaw a isaray ji Ama ta do to a nibsoyan na so aro a tao.

²⁴ Katenngan da no aro a tao o kabo ni Yeso a kano macinanao jya am mavang sira do tataloran a mangay do Cyapaynong a komala sya.

Akmey yopen a kano kanen si Yeso a yapwan no to meyyonong a ikavyay no pahad no tao

²⁵ Makala da si Yeso no aro a tao do katovangan no rako a meybebneng a ranom am maniring sira jya am, “Mo Mangnanao, no kango kai mo do jya.”

²⁶ Maniring si Yeso am, “To ko na macitangayan jinyo am o nyo kalan jyaken am beken a nyo kanimakacita so ko nipatwaw a yongkad do kanimapo ko ji Ama ta do to an. Ta nyo kakzeben o nyo kabsoy.

²⁷ Taosya o kaziknan nyo no ji mamayok a kanekanen. Ta apyapya pa o kaziknan nyo no kanen a yapwan no to meyyonong a ikavyay no pahad nyo. O kanen rana ori am yaken o yatomoro nya jinyo. Ta yaken a Nipamnekan na ni Ama ta do to a tao o tomoro no akman sang jinyo. Ta yarana amyan jyaken so oyowyat na ni Ama ta do to. Ori rana am yongkad na no yanitomovoy jyaken.”

²⁸ Maniring sira am, “Makongo namen a kanoyong namen a mahap so vazay na ni Ama ta do to.”

²⁹ Maniring si Yeso am, “O na kakzeben jinyo a vazay nyo ni Ama ta do to am anoyngan nyo yaken a nitovoy na ni Ama ta do to.”

³⁰ Maniring sira am, “No komwan am patwaw pala so yongkad mo a nimapo ji Ama ta do to. Ta ori o anoyngan namen jimo.

³¹ Nikoman sira o ineynapo namen so mana do kabwan no nihakawan no tao. Akman so ciring do Seysyo. Ta maniring am, ‘Nimapakas so kanen a apo do teyngato a nyakan da.’ ”

³² Maniring si Yeso jira am, “To ko na macitangayan jinyo am jya nimapakas so kanen si Moyse, ta o apo do teyngato a kanen am si Ama ta do to o nitomoro nya.

³³ O kanen rana yana nipakas ni Ama ta do to a yapo do teyngato am yapwan no to meyyonong a ikavyay no pahad no tao do karawan.”

³⁴ Maniring sira am, “Mo kahakay, inaoy si masangib mo a itoro jyamen o akman sang a kanen.”

³⁵ Maniring si Yeso jira am, “Yaken rana am akma koy kanen a ikavyay no pahad nyo. O mai jyaken a tao am to meyyonong rana jyakcin. Omanoyong jyaken am to meyyonong a jyawaw.

³⁶ Nipanci ko na jinyo. Nimacita nyo na yaken am nyo ji nganoyngi yaken.

³⁷ O pasngenen na jyaken ni Ama a tao am anoyngan da yaken a onotan. O mai jyaken a tao am ji ko likoji sira.

³⁸ Ta yaken rana am ko apo do teyngato. So ko ji to mangozai do nakenakem ko. Ta ko pangozayan o nakenakem no yanitomovoy jyaken.

³⁹ O nakenakem no yanitomovoy jyaken am apzatan ko sira o nipamnekan na ni Ama ta do to a macikaop jyaken. Sira rana ori am avyain ko sira no marateng rana o araraw no kapeykapyapinpin na ni Ama ta do to so tao.

⁴⁰ Ta o nakenakem ni Ama am mahap da o to meyyonong a ikavyay no pahad da no makateneng jyaken a kano omanoyong jyaken a tao, a kapeyvangon ko pa sira no makaranes rana o araraw no kapeykapyapinpin na ni Ama ta do to so tao.”

⁴¹ Ikazyak da si Yeso no tao do Yotay do kapeyciring na so kakma ney kanen a apo do teyngato.

⁴² Maniring sira am, “Beken a oya o anak ni Yoseyvo asyo? Tamo katenngan o inyapwan na. Am ikongo na pancyan no na kapo do teyngato.”

⁴³ Maniring si Yeso am, “Ji nyo a zyakan.

⁴⁴ No beken a si Ama a nitomovoy jyaken o yatomirara so tao am abo tao a mai jyaken. O mai jyaken a tao am avyain ko sira no makaranes rana o araraw no kapeykapyapinpin na ni Ama ta do to so tao.

⁴⁵ O ciring da no panoyonoywan na so ciring ni Ama ta do to am, ‘Mamimin o tao a vavagan ni Ama ta do to.’ Omamizing so nanao ni Ama a mapeyyan sya do onowned na am mamimin sira ori a mai jyaken.

⁴⁶ Am abo tao a nimakacita si Ama ta do to. O nimapo ji Ama ta do to am ori o nimakacita sya.

⁴⁷ To ko na macitangayan jinyo am omanoyong jyaken a tao am mahap da o to meyyonong a ikavyay no pahad da.

⁴⁸ Yaken am akma koy kanen a yapwan no to meyyonong a ikavyay no pahad nyo.

⁴⁹ Tana nikoman sira o ineynapo nyo so mana do kabwan no nihakawan no tao am nimawakwak sira.

⁵⁰ Am o apo do teyngato a kanen am no kanen no tao am mahap da o to meyyonong a ikavyay no pahad da.

⁵¹ Yaken rana am akma koy kanen a apo do teyngato a yapwan no to meyyonong a ikavyay no pahad nyo. O koman so kanen eya a tao am mahap da o to meyyonong a ikavyay no pahad da do teyngato. O itoro ko do tao a kanen da am kataotao ko, ta yangay ko inyo no inawan. Ori rana am ipakahap no tao so to meyyonong a ikavyay no pahad da.”

⁵² O ciring ni Yeso am nikazyak da no tao do Yotay. Maniring sira am, “Ikongo a kato na norwan no kataotao na jyaten a kanen ta.”

⁵³ Maniring si Yeso jira am, “To ko na macitangayan jinyo am no si ji nyo nganna o kataotao ko a ji ngyop so rala ko a Nipamnekan na ni Ama ta do to a tao am abo jinyo o to meyyonong a ikavyay no pahad nyo.

⁵⁴ O koman so kataotao ko a kano amyop so rala ko am amyan jira rana so to meyyonong a ikavyay no pahad da. No makaranes rana o araraw no kapeykapyapinpin na ni Ama ta do to so tao am peyvangonen ko sira.

⁵⁵ Ta o kataotao ko a kano rala ko am manoyong a kanen nyo am yopen nyo.

⁵⁶ O koman so kataotao ko a kano amyop so rala ko a tao am macikaop sira jyaken. So ikanoyong ko na macirapa do onowned da.

⁵⁷ Yamacikaop jyaken si Ama a yanitomovoy jyaken do teyrahem a yana yapwan no to meyyonong a ikavyay no pahad no tao. So icyakman da sang no koman so kataotao ko a macirapa jyaken so inawan.

⁵⁸ O ko ipanci a kanen a apo do teyngato am ji meyyangay a kano nyakan da no ineynapo nyo a mana. Ta nimawakwak sira a yanikoman so sang. Am o koman so kanen a apo do teyngato am mahap da o to meyyonong a ikavyay no pahad da.”

⁵⁹ O ciring rana ori am ciring ni Yeso no kapangnanao na do peyneynozyan do Cyapaynong.

Ciring na ni Yeso o yanan no to meyyonong a ikavyay no pahad

⁶⁰ Mamizing da ori no macinanao jya am maniring sira am, “Asyo nanao eya a yajyazab. Sino makateneng do dang.”

⁶¹ Katenngan ni Yeso sira mazyak nya am maniring jira am, “Nyo ikarahet o ciring ang?

⁶² Mangay kapeyzokab nyo nyaken si macita nyo yaken a Nipamnekan na ni Ama ta do to a tao a meysinaoli do teyngato.

⁶³ O yamanta no tao so to meyyonong a ikavyay no pahad na am Seyzi. So ikabo no oyowyat no tao a ipakahap sya. O ko ipanci jinyo a ciriciring am apo do Seyzi na ni Ama ta do to. Ori rana am ikavyay ori.

⁶⁴ Am yamyan jinyo so yaji manganoyong a tao.” O peycirngan na sang ni Yeso am nimeycicinda o kapakateneng na do ji manganoyong a tao a kano manazang nya a tao.

⁶⁵ Maniring am, “Ori o ko peycirngan so, ‘No beken a si Ama ta do to o yatomirara sira am abo tao a mai jyaken.’ ”

⁶⁶ Nimacipinda no kano nang o kapeymakaro da jya rana no aro a tao a ji rana nganop sya.

⁶⁷ Maniring do rarwa so ikakarwan a macinanao jya am, “Manngo kamo. Akman kamo sira ori a mangay rana an?”

⁶⁸ Maniring si Simong Pite am, “Mo Panirsirngen, imo saon na yanan no nanao no to meyyonong a ikavyay no pahad namen. Sino pa o pacilolwan namen.

⁶⁹ Namen anoyngan o yamo kanimapo ji Ama ta do to a ji meylimoteng so onowned.”

⁷⁰ Maniring si Yeso am, “Ko inyo nipamnekan a yararwa so ikakarwan am yamyan jinyo so yasa ka tao a yana italamozong ni Satan.”

⁷¹ O ciring rana ori am pakacirngen na ni Yeso do tao do Isecyadi a anak ni Simong a meyngaran so Yota. Iya rana am ikararwa da so ikakarwan a omanam pa o kapanazang na ni Yeso.