Yowani 5 - Seysyo No Tao

Mangiwakwak si Yeso so meyngen do meybebneng a ranom

¹ Makanateng so araraw am macinao do pamarmarngan da so kanen no tao do Yotay o yangay na ni Yeso do Yelosaleng.

² Amyan do Yelosaleng so ngaranan da Pazezevngen no kagling. Am amyan do siri na so meybebneng a ranom. O ingaran da jya no Sipolay a tao am Peyseta. O livolivon no meybebneng a ranom am meykalima o tezantehed do dang.

³ O tezantehed rana ori am meycyeyreyray sira dang o meykeyngeyngen a tao. Sira rana ori am amyan jira ang so mavota kano ji makakalam a kano ji makapeygonagonay a tao. [Sira rana ori am panalahen da o kapeygonagonay no ranom.

⁴ Ta o tinsi ni Ama ta do to am mangay na gonagonain o ranom ang. Anoyngan da o kato na rana apyan no ingingnen no ney manma a somivoz do ranom ang.]

⁵ Amyan dang so asa ka tao a nimeyngen so wao so ikasikapat (38) so awawan.

⁶ Macita na ori ni Yeso a ji meyvangon am katenngan na o kownay na rana nimeyngen. Maniring jya am, “Kokay. Mo ikakza o kavonas rana no ingingnen mo an?”

⁷ Maniring o meyngen a tao ori am, “Mo kahakay, no kapeygonagonay no ranom am yabo yamarilaw nyaken a yamapangay jyaken do ranom. Yako naknakmen o yako kagonagonay so peyvongvongwan ko a somivoz do ranom am yarana myan so tao a yanimanmanma pa ka nyaken a nisomivoz.”

⁸ Maniring si Yeso jya am, “Tanek rana kahap mo na so atpil mo a omalam.”

⁹ Makarahan am jya nimeyyahahay a mapya o tao ang, kahap na rana so atpil na omalam rana. No kanang am nimacinao do araraw no ipeywalam no tao.

¹⁰ Maniring sira o panipanirsirngen no tao do Yotay do nimapya rana tao ori am, “Sicyaraw eya am ipeywalam no tao. So ji mo ngapi so atpil mo.”

¹¹ Maniring am, “Yamaniring jyaken o tao a niomiwakwak jyaken am, ‘Ahap rana o atpil mo a kangay mo rana.’ ”

¹² Maniring sira am, “Sino o yanimanci nimo a yamahap so atpil a mangay rana.”

¹³ Am ji na tenngi no nimapya rana a tao ang o niomiwakwak jya. Ta nikarwan na rana sira o aro a tao do dang ni Yeso.

¹⁴ Mownay am masinmo ni Yeso o tao a nikeywakwakan rana do rako a panaralayan. Maniring jya am, “Yaka na manoyong a yapya rana. Ji mo na peyneynama o kapeyraraten mo. Ta arakorako pa o alalaw a mangay jimo.”

¹⁵ Karahan am mangay rana o tao ori a manci nya do tao do Yotay o mina keywakwak na jya ni Yeso.

¹⁶ Nimacipinda no kano nang o kapacioya da rana ji Yeso do kato na mangiwakwakan do ipeyweywalam no tao.

¹⁷ Maniring si Yeso jira am, “Yato meyvazay si Ama. So ko to nginarai sya.”

¹⁸ To da na mamneki no tao do Yotay o kawakwak da si Yeso do kapakamizing da so ciring na. Ta ji na ngahapa o icicirawat da, do kaji meyvazayan do ipeyweywalam no tao. Maciyoman pa o kapakamizing da so ciring na manci no kapeyyama na si Ama ta do to a mapakto so kataotao na ji Ama ta do to.

Oyowyat na ni Yeso a Anak na ni Ama ta do to

¹⁹ Maniring pa jira si Yeso am, “To ko na macitangayan jinyo am no ko to mangozai o kataotao ko am abo mahap ko a vazay. Am ko na nimacita o vazay ni Ama. Am ori o ko to ngamooni sya peyvazain. O vazay ni Ama na am vazay no Anak na.

²⁰ Am yatey rako o aryarilaw na jyaken ni Ama. Yana mamimin o vazay na yana nipacita jyaken, mangay katoro na nya jyaken so arakorako pa vazay a isavasavak nyo.

²¹ O vazay na ni Ama mapeyvangon so nimawakwak a tao am akman ko sang a to mangozay do nakenakem ko a omvyay so tao.

²² Beken a si Ama o mapacici a mapeykapyapinpin so tao. Ta na nitoro rana jyaken o oyowyat a mapacici a mapeykapyapinpin so tao do karawan,

²³ mangay kazwazway da jyaken no tao do karawan. Akman sang si Ama a azwazwain da. Am o to nazibo nyaken a Anak na ni Ama am akman sang si Ama a da to nazibwan.

²⁴ To ko na macitangayan jinyo am omamizing so ciring ko a tao a omanoyong do yanitomovoy jyaken am mahap na o to meyyonong a ikavyay no pahad na. So ikanoyong na ji na meydednai no peyoyaoyyan na ni Ama ta do to. Ta nimaliklik na rana o apwa kawakwakan no pahad na.

²⁵ “To ko na macitangayan jinyo am oya rana o araraw na. So na rana ikanoyong a yarana nimakaranes no ipakamizing da so ciring ko no kabwan na pa no to meyyonong a ikavyay no pahad da a tao. Am o mahap so ciring ko o makahap so to meyyonong a ikavyay no pahad da.

²⁶ Si Ama ta do to o yapwan no to meyyonong a ikavyay no pahad no tao. So icyakman na sang no Anak na.

²⁷ Na nitoro jyaken ni Ama ta do to o oyowyat a yamapacici a mapeykapyapinpin so tao. Ta yaken rana am Nipamnekan na ni Ama ta do to a tao.

²⁸ Ji nyo ngyakan, ta no marateng rana o araraw am mamimin sira o nibobo a tao a makamizing so ciring ko,

²⁹ a kapeyvangon da do heseb da. O apya so mina vazay no kamavyay da pa am mavyay sira a kapacitovong da rana ji Ama ta do to do teyngato. O nimeyraraten no kamavyay da pa am peyvangonen ko sira kapanci ko no raraten da.

³⁰ “Abo angangayan ko ya no si to ko mangozai o nakenakem ko. Ko to mangozai o ciring na jyaken ni Ama ta do to a mapacici a mapeykapyapinpin so tao. So na ikanoyong no ko ahahapan sya. Ta ko ji mangozai o nakenakem ko do kataotao ko, do ko kahap so vazay no yanitomovoy jyaken.

³¹ No si ipeylimwang ko o kataotao ko am ji makanet ori a ipanop so tao.

³² Am na keyyan no yameylimwang nyaken. So ko pakatenngan do na kanoyong no ciring na yamacyanoyong jyaken.

³³ Nimanovoy kamo so tao a mangay ji Yowani. So nipakamizngan nyo so ciring na meylimwang no manoyong a ciring na jyaken.

³⁴ Ko ji ngakzeba o keyyan no tao a macyanoyong jyaken. O ko pakalavatan so mina vazay ni Yowani am ipakateneng nyo jyaken a kapakahap nyo rana so to meyyonong a ikavyay no pahad nyo.

³⁵ Kapalangayan no zampo si Yowani a amlila maniray. Am ji meyyonownay o sarayan nyo no zezak na.

³⁶ Am patwawen ko pala o makdekdeng pa vazay ko a kano mina ciring ni Yowani. O vazay rana ori am nitoro na jyaken ni Ama a pakavosen ko. O vazay rana ori am yongkad ko ori a nitovoy ni Ama.

³⁷ Na ipeylimwang yaken ni Ama a nitomovoy jyaken. Abo pa jinyo o nimakamizing so ciring na. Abo pa jinyo o nimakacita so moing na.

³⁸ O nyo ji mapeyyani so ciriciring na do onowned nyo am nyo ji nganoyngi o yana nitovoy a yasa ka tao.

³⁹ O nyo ipeyvilang a Seysyo am nyo naknakmen o nyo kapakahap do dang so to meyyonong a ikavyay no pahad nyo. Am na malavat no Seysyo am yaken.

⁴⁰ Am yatey masalit o onowned nyo a yaji nganoyong jyaken a yamanta ninyo so to meyyonong a ikavyay no pahad nyo.

⁴¹ “Ko jyakzan o da kazwazway jyaken no tao.

⁴² Ko katenngan o onowned nyo a yajyakza ni Ama ta do to.

⁴³ O ko nyai do teyrahem eya am nakenakem na ni Ama. Am nyo ji ngonoci yaken. Am o yamacitarek a tao a yamangozay do ngaran da am nyo onotan.

⁴⁴ Nyo ikeykakza pa o da kazwazway jinyo no kadwan jinyo. Nyo jyakzan o azwazway a yapo ji Ama ta do to. Ori o yanyo ji nganoyngi jyaken.

⁴⁵ Ji nyo mancyan o ka yaken no mapatwaw so raraten nyo do tangain ni Ama ta do to. Ta o iwawalam ni Moyse yanyo pangozayan am ori o yamapatwaw so raraten nyo.

⁴⁶ No si anoyngan nyo si Moyse am akman kamo sang a omanoyong jyaken. Ta o ciriciring na yadomket do Seysyo am yaken na paingan sya.

⁴⁷ No nyo ji nganoyngi o ciriciring na ni Moyse a yadomket do Seysyo am makongo kamo a omanoyong jyaken.”