Yowani 4 - Seysyo No Tao

Si Yeso a kano asa ka Samadiya a mavakes

¹ Mamizing da no tao a macyagom do Vadisay si Yeso a manara so macilocilolo jya a kapakamizing da sya arwaro pa so nitaktakan a kani Yowani.

² Am beken a si Yeso o manaktak, ta o macinanao jya am ori o manaktak.

³ Mamizing na ni Yeso o akman sang a ciring am karwan na rana do Yotay a kangay na rana do Cyadidi,

⁴ a kapeyliktaw na do Samadiya.

⁵ Makaranes do Samadiya am amyan dang so asa ka ili a meyngaran so Siha. O ili rana ori am masngen ori do hakawan ni Yoseyvo a nyamoon na ji ama na a meyngaran so Yakebo.

⁶ Amyan dang o atbod a imong na ni Yakebo no kakwa. Ikongo do nimazikna si Yeso a omalam, am ori o nilisna na do katangked no atbod ang. No kano nang am akmey meyigen o araw.

⁷ Amyan so Samadiya mavakes a mangay tomavo. Maniring si Yeso jya am, “Ney pa dang so ranom a inomen ko.”

⁸ O macinanao jya am nimangay sira manazang so kanen da do ili.

⁹ Maniring o mavakes am, “Imo am tao do Yotay ka. Yaken am tao do Samadiya ko. Ikongo o mo to macyami jyaken so ranom.” (O tao do Yotay a kano tao do Samadiya am ji sira masyakan so kanekanen.)

¹⁰ Maniring si Yeso am, “No mo katenngan o itoro na jimo ni Ama ta do to a mo kapakateneng do yamacyami jimo so ranom am ka ji mapasyasi jya. Ji na mantan imo so to meyyonong a ikavyay no pahad mo a ranom a.”

¹¹ Maniring o mavakes am, “Mo kahakay, yamarahem o tovong eya a yabo o tatano mo. Makongo ka mangap so to meyyonong a ikavyay a ranom.

¹² O tovong rana ya am nyamoon namen ji Yakebo a inapo namen. Sira rana am nimamimin sira asa ka vahay a kano vinyay da a niminom so ranom do jya. Manngwa, ka mahamahama pa ka nya?”

¹³ Maniring si Yeso am, “O amyop so ranom eya am mawaw pa sira.

¹⁴ Am o amyop so itoro ko a ranom am to sira meyyonong a ji rana awaw. O itoro ko jya ranom am akmey atbod do onowned na a komalangboy. So ikanoyong na makahap so to meyyonong a ikavyay no pahad na.”

¹⁵ Maniring o mavakes am, “Mo kahakay, itoro mo jyaken o ranom mo ori an, kato ko meyyonongan a jyawaw a kaji ko na ngayyan do jya tomavo.”

¹⁶ Maniring jya si Yeso am, “Angay pancyaney o kahanghangan mo a kai nyo do jya.”

¹⁷ Maniring o mavakes am, “Yabo kahanghangan ko.” Maniring si Yeso am, “Yamanoyong na kabo no kahanghangan mo.

¹⁸ Am imo rana am yalalima rana sira o kahanghangan mo. O katovong mo sicyaikwaya am beken a meyngongyod a katovong mo do vahay. Yamanoyong o ciring mo jyaken.”

¹⁹ Maniring o mavakes am, “Mo kahakay, ko imo citahen eya am ala panoyonoywan na imo so ciring ni Ama ta do to.

²⁰ O ineynapo namen a Samadiya am niraralay da si Ama ta do to do tokon eya. Am kwan nyo a tao do Yotay am do Yelosaleng o raralayan ni Ama ta do to.”

²¹ Maniring jya si Yeso am, “Mo kavakes, anoyngan mo yaken. No si marateng rana o araraw na am jyabo rana o tao a mai do tokon eya kado Yelosaleng a amraralay ni Ama ta do to a.

²² Inyo rana tao do Samadiya am nyo jyatenngi o yanyo iraralay. Yamen a tao do Yotay am namen katenngan o namen iraralay. Ta o mapatazadang so tao a mangay do teyngato am apo do tao do Yotay.

²³ So na ikanoyong sicyaikwaya yanimakaranes. O manoyong a omraralay ni Ama ta do to a tao am oyatan no Seyzi o onowned na omraralay ni Ama ta do to. Ta o akman rana sang a tao am isaray na ni Ama ta do to.

²⁴ Jyakman so tao si Ama ta do to a amyan so kataotao. Am ori o iyapo na do Seyzi no omoyat do tao a manoyong a omraralay ni Ama ta do to.”

²⁵ Maniring o mavakes jya am, “Ko katenngan na kai no Misayya. No si mai ori am miminen na o vazay a ipanci jyaten.”

²⁶ Maniring si Yeso am, “Yaken o mo ipanci ang. So na ika iya no yamacisirsiring jimo.”

²⁷ Mai rana sira o macinanao ji Yeso am macita da si Yeso a macisirsiring do asa ka mavakes. Am ori o nyeyyakan da nya. Am abo o asa ka tao jira a manci nya do mavakes so, “Ikongo mo icyakza.” Abo jira o manci nya ji Yeso so, “Ikongo mo sirsirngan sya.”

²⁸ Iptad na no mavakes o peraranom na kangay na rana do ili a manci nya do aro a tao.

²⁹ Maniring am, “Citahey kamo o yasa ka tao a yato mimin so mina vazay ko a yapatwawen. Ala Misayya o ito.”

³⁰ Karahan am karwan da o ili da no aro a tao a mangay tomita si Yeso.

³¹ Meyratateng am gacigatan da si Yeso no macinanao jya a omoran do velek na.

³² Maniring si Yeso am, “Yana myan so kanen ko, am nyo jyatenngi ori.”

³³ Maniring sira do ipeykalakalavaten da am, “Ala yamyan so tao a yanimanta nya so kanen na an?”

³⁴ Maniring si Yeso jira am, “O kanen ko am onotan ko a pakavosen o vazay no yanitomovoy jyaken.

³⁵ No kamo maniring am, ‘Yamakapat rana vehan a yakapanlangi.’ Am to ko na macitangayan jinyo am cita kamo pala o nihakawan nyo a yarana mazako. Jyapiya rana ori a langin a.

³⁶ O mapanop so tao a omanoyong do nanao ko am arako o nakem ko jya. Sira rana omonot do nanao ko am mahap da o to meyyonong a ikavyay no pahad da. Katonodan no nang o amhakakaw a tao. Ta o pamowahen no asa ka tao am macivonong sira o karwan tao. So ikanoyong da tey masaray a tomaham do nihakawan da. Akman so meylimwang no ciriciring na ni Ama ta do to a kano omanop so tao a omanoyong jya an, ta tey masaray sira an.

³⁷ O ciriciring da no tao no kakwa am, ‘Pamowahen no asa ka tao. Macivonong sira o tao do nihakawan na.’ So ikatey manoyong no akman sang a ciring da.

³⁸ Ko inyo ipanoyon a yamangay omlangi so beken a zikna nyo. Am manoyong kamo a macivonong do zikna da no tao.”

³⁹ Aro do ili ang o niomanoyong rana ji Yeso. Ta maniring o mavakes do aro a tao am, “Na to mimina rana o mina vazay ko a yapatwawen.”

⁴⁰ Macita da no aro a tao do Samadiya si Yeso am gacigatan da macisan jira. Ori o nisan na dang so kadwa araw.

⁴¹ Nikarapan o tao a omanoyong do nanao na ni Yeso.

⁴² Ta maniring sira do mavakes am, “Beken a ciring mo an o namen ipanganoyong rana sicyaikwaya. Ta namen nipacimatan a yaniomamizing so ciring na. Am ori o namen anoyngan rana jya a mapatazadang so tao do karawan.”

Niwakwakan na ni Yeso o ingingnen na no anak na no meynakem a tao

⁴³ Kadwa araw si Yeso a nimisan dang a kangay na rana do Cyadidi.

⁴⁴ Nipanci na rana ni Yeso no kakwa o kaji da panadnadan so panoyonoywan na so ciring ni Ama ta do to no macikeylyan jya.

⁴⁵ Am makaranes si Yeso do Cyadidi am aro tao a somaray nya. Ta no kangay da do Yelosaleng a macipamaring so kanen do Iyeci am nimacita da o vazay na.

⁴⁶ Meysinaoli si Yeso do Cyana a macinapnap do Cyadidi. Do dang rana am nipeyvaliw na so ranom a potaw cyo. Am amyan so asa ka meynakem a tao. O anak no nang am meyngen do Cyapaynong.

⁴⁷ Mamizing na si Yeso a nimakaranes rana do Cyadidi apo do Yotay am mangay ji Yeso a manci nya a mangay do Cyapaynong a omiwakwak do anak na a toda jyangangay so inawan.

⁴⁸ Maniring si Yeso jya am, “No si macita nyo o vazay a yongkad no kayapo ko ji Ama ta do to am, ori o ipanganoyong nyo.”

⁴⁹ Maniring o meynakem a tao ori am, “Mo kahakay, macihza ka pa jyaken do yana ikavyay pa no anak ko.”

⁵⁰ Maniring si Yeso jya am, “Angay rana. Ta yarana nimapya o anak mo.” So nyanoyngan na rana no tao ang do ciring ni Yeso a mangay rana.

⁵¹ Amyan pa do rarahan am masinmo na rana o lamlamsoy na. Maniring sira do meynakem a tao am, “Yapya rana o anak mo.”

⁵² Karahan am pacicin na sira. Maniring am, “No kango o kapya na no anak ko.” Maniring sira am, “Ikasa na vatvatek no kakyab do makoyab am nimacipinda dang o kaji na rana paingwatan sya.”

⁵³ Naknakmen na am todey meyyangay o cinapya na no kapacisirsiring na jya. Ta maniring si Yeso jya no kano nang am, “Yapya rana o anak mo.” Am ori o nipacipindan no kanoyong da na jya nira ori a asa ka vahay.

⁵⁴ O vazay rana ori am ikadwa na no vazay ni Yeso do Cyadidi no kapo na do Yotay a yongkad no kayapo na ji Ama ta do to.