Yowani 3 - Seysyo No Tao

Si Yeso a kani Niketemo

¹ Amyan so asa ka tao a macyagom do Vadisay a meyngaran so Niketemo a panirsirngen no tao do Yotay.

² Ipisa kahep na am mangay ji Yeso. Maniring jya am, “Mo Mangnanao, namen katenngan imo a mangnanao a nitovoy ni Ama ta do to a yamangnanao so tao. No yabo si Ama ta do to a yasomidong jimo a meyvazay a mapatwaw so kayapo mo jya am abo tao a makapeyvazay sya.”

³ Maniring si Yeso am, “To ko na macitangayan jimo am no si ji mirwa a matazak a tao o tao am ji macikaop do italamozong na ni Ama ta do to a tao.”

⁴ Maniring si Niketemo ji Yeso am, “Makongo so wanjin o rarakeh rana mangay pa matazak a tao. Manngwa, meysinaoli pa malikey ahanasen da?”

⁵ Maniring si Yeso am, “To ko na macitangayan jimo am no jya nimalikey o tao do ranom a kano Seyzi am ji macikaop do italamozong na tao ni Ama ta do to.

⁶ O nimapodpod do tao am tao saon am. Am no si mapodpod o tao do Seyzi na ni Ama ta do to am manoyong o akman sang a anak na ni Ama ta do to.

⁷ Ji mo ngyakan o kapanci ko no katazak mo a tao an.

⁸ Na to ngonongonongi o na pabzotan sya no pagpag. No nyo mamizing o na pavyoten a pagpag am nyo jyatenngi o na kapwan. Nyo jyatenngi o na angayan. O nimapodpod do Seyzi am akman sang an.”

⁹ Maniring si Niketemo am, “Ta to na akmani so sang!”

¹⁰ Maniring si Yeso am, “Imo am ka mangnanao do Isedi a tao. Manngwa, tolang ori a ji mo a tenngi a vazay?

¹¹ To ko na macitangayan jimo am o namen katenngan a kano namen nimacita o namen patwawen. Am yanyo ji ngapa o yakman sang a yanamen patwawen.

¹² O yako ipanci jinyo a vazay do karawan am nyo ji nganoyngi. No si ipanci ko jinyo o vazay do teyngato am jyabo kanoyong nyo jya.

¹³ Abo pa o tao a nimangay do teyngato. O Nipamnekan na ni Ama ta do to a tao am ori o nimapo do teyngato.”

¹⁴ Maniring pa si Yeso am, “No kakwa pa am nimapatnek si Moyse do kayo so nipariparing da mavowaw do kabwan no nihakawan no tao. So icyakman ko sang a Nipamnekan na ni Ama ta do to a padketen da do kayo a patneken no makwa.

¹⁵ So ikamimin no omanoyong jyaken a tao a makahap so to meyyonong a ikavyay no pahad da.

¹⁶ Yatey rako na karilawan no tao do karawan ni Ama ta do to. Mangay do na veyvowen a Anak na o yana nitoro. So ikamimin da no omanoyong jya tao a ji rana meydednai no peyoyaoyyan na ni Ama ta do to, ta mahap da rana o to meyyonong a ikavyay no pahad da.

¹⁷ Ta o nitovoyan na so Anak na do teyrahem am beken a pasingsingtan na o tao do teyrahem. Ta patazadangen na sira do teyngato.

¹⁸ “Omanoyong do Anak ni Ama ta do to a tao am ji na mancyan sira meyraraten. O ji nganoyong jya am ori o ipanci na amyan so raraten. Ta ji da nganoyngi o veyvowen na Anak ni Ama ta do to.

¹⁹ O Anak ni Ama ta do to am akmey zezak a nimai do teyrahem a amzezak so tao do karawan. Am ji dakzan no tao o kazngangan, ta ikeykakza da pa o kasarisaryan. Ta meyraraten pa sira. Ori o peypeypangayan no na pancyan nira a meyraraten.

²⁰ O meyraraten a tao am ikaoya da o mazngang. Am ori o ji da macisngeni do kazngangan, ta ikanyahey da o kapakateneng da jira meyraraten.

²¹ Am o apya so icicirawat a ji meyraraten a tao am ikakza da o kazngangan a mapatwaw so apya vazay da do kownot da ji Ama ta do to.”

Si Yeso a kani Yowani

²² Mavitos ori am meypangay si Yeso a kano macinanao jya do Yotay. So niseysan da dang so makanateng so araraw a manaktak so tao.

²³ Akman sang si Yowani, ta manaktak do meyngaran so Aynon a masngen do Saleng, ta arako do dang o ranom. So ikaro no tao a mangay jya kataktak na jira.

²⁴ No kano nang am ji da pa nipteng si Yowani.

²⁵ Tatasa ka macinanao ji Yowani o macinekanekad do asa ka tao do Yotay. O ikazyak da am kataktak do tao.

²⁶ Maniring sira ji Yowani am, “Mo pa manakem, mo Mangnanao, o mina kararay mo do Yotan a ayo asyo, a ipeylimwang mo so ngaran asyo? Ta iya rana am yamanaktak sicyaikwaya. Da karo no tao a yamangay komala sya.”

²⁷ Maniring si Yowani am, “No abo si Ama ta do to a omoyat do tao am abo do tao o makapakavos so vazay.

²⁸ Kamo mamimin a makateneng jyaken a beken a Misayya. Ta nipanci ko na jinyo. Ta yaken rana am nitovoy na yaken ni Ama ta do to a meywadwad so rarahan na.

²⁹ Akman so meysinmo a tao. No mapasakay o tao am masaray sira o kagagan na makamizing sya. Am o nitomamtamek jya tao o angayan no mavakes ang. Yaken rana am yako akman so kagagan na yatey masaray a makamizing sya.

³⁰ Mangay o kapeyparo da no tao a mangay amrapong si Yeso. Mangay o kapeypapereh no tao a omanod jyaken.”

Yapo do teyngato si Yeso

³¹ O nimapo do teyngato am to na pa meyhavasi o makakaday do karawan. O nimapo do karawan am teyrahem o malavat na. Am o apo do teyngato am to na pa meyhavasi o makakaday.

³² Patwawen na o nimacita na kano nimamizing na. Am to da nazibwan no tao o nanao na.

³³ Am o mahap so nanao na tao am pacyanoyngan da si Ama ta do to a tey manoyong.

³⁴ O nitovoy ni Ama ta do to o mapatwaw so ciriciring na ni Ama ta do to. Ta oyatan no Seyzi.

³⁵ O Ama na am marilaw no Anak na. So na nitorwan no makakaday jya a italamozong na.

³⁶ Omanoyong do Anak na am mahap na o to meyyonong a ikavyay no pahad na. O ji nganoyong do Anak na am abo jya o ikavyay no pahad na, ta meydedna jya o peyoyaoyyan na ni Ama ta do to.