Yowani 21 - Seysyo No Tao

Mapacita si Yeso do papito a ka macinanao jya

¹ Kadadayan na so araraw am mangay pa mapacita do macinanao jya do ngaranan da Tipilyo a rako a meybebneng a ranom. O mina vazay da no kano nang am yata malavat do jya an.

² No kano nang am nimalovot sira Simong Pite a kani Tomase a meyngaran pa so Nimeytovong a nimatazak a tao a kani Natannay a tao do Cyana do Cyadidi a kano rarwa ka anak ni Sipitay a kano rarwa pa dang a kararay da a macinanao ji Yeso.

³ Maniring si Simong Pite do karwan da am, “Ko mangay mangahahap.” Maniring o karwan da am, “Macihza namen jimo.” Am ori o nilwas da do asa ka vazangay. Am abo inahahapan da kasahep.

⁴ Domada o araw am meytatanek si Yeso do pamsan na. Am ji da pa singkaji no macinanao jya si Yeso.

⁵ Maniring si Yeso jira am, “Kokay kamo. Kamo nimakamong an?” Maniring sira am, “Jyabo yasa namen nimamong a yakasahep a!”

⁶ Maniring si Yeso jira am, “Zoywan kamo o tawaz nyo do kawanan, ta ori na yanan no among.” Karahan am izoyo da na o tawaz am ji da rana anat a pazagpiten, ta tey yaro rana o among do tawaz.

⁷ Maniring ji Pite o ney kaglaw na ni Yeso a macinanao jya am, “Si Yeso ya a Panirsirngen ta.” Mamizing ni Simong Pite o ka si Yeso na am meyyayob a kaokso na.

⁸ Karwan da am kaoden da o vazangay makarala. Karahan am alikey rana kaji da makaransan do pamsan na am lolwen da na o tawaz a yanan no aro a among.

⁹ Makaranes sira do pamsan na am macita da o myanpaw a kano inmala rana a yanan no panazaban ni Yeso so among.

¹⁰ Maniring si Yeso jira am, “Pangap kamo pa do yanyo nimamong so apeleh.”

¹¹ So nyangay na ni Simong Pite do vazangay amngingit so tawaz a ipakarala. Am mamimin a rarako a among o nimatawaz. Vilangan da na am atlo o ikasikanem na so ikarwa poo (153). Am jya nimapising o tawaz da no among ang.

¹² Maniring si Yeso jira am, “Sijya kamo a karyag nyo.” Am abo o asa ka tao do macinanao jya o makadket jya pacicin, ta katenngan da o ka si Yeso na.

¹³ Karahan am mangay jira si Yeso a kavonong na so myanpaw jira. Akman sang o among a vonongen na jira.

¹⁴ Ipitlo na rana ya ni Yeso a mapacita do macinanao jya no keypirwa na rana mavyay.

Si Yeso a kani Pite

¹⁵ Teyka sira romyag am maniring si Yeso ji Simong Pite am, “Imo rana mo Simong a anak ni Yowani am manngwa, ka makdekdeng pa kano karwan nyo eya a maglaw nyaken an?” Maniring si Pite am, “Noon. Mo katenngan yaken a yatey maglaw nimo, mo Panirsirngen.” Maniring si Yeso jya am, “Peyveyveknen mo o yaomanoyong jyaken a tao a akma koy lilikta kagling.”

¹⁶ Ipidwa na pacicin am, “Imo rana mo Simong a anak ni Yowani am manngwa, yamo ikaglaw yaken an?” Maniring si Simong am, “Noon. Mo katenngan yaken a yatey maglaw nimo.” Maniring jya si Yeso am, “Peyveyveknen mo o omanoyong jyaken a tao a akma koy kagling.”

¹⁷ Ipitlo na pacicin ni Yeso am akman sang o ciring na. Maniring am, “Imo rana mo Simong a anak ni Yowani am manngwa, mo ikaglaw yaken an?” Mina todarahet o aktokto na ni Pite do keypipitlo na mapacici sya no kaglaw na nya, kaji na aglawan nya. Maniring rana ji Yeso si Pite am, “Mo katenngan o makakaday. So mo ipakateneng jyaken a yatey maglaw nimo, mo Panirsirngen.” Maniring si Yeso jya am, “Peyveyveknen mo o yaomanoyong jyaken a tao a akma koy kagling.

¹⁸ To ko na macitangayan jimo am no kalavayo mo pa am to mo meyneynakman o angangayan mo. Am no rarakeh ka na am abo rana oyowyat mo a mapatozatozak do amvaod jimo a tomaosya so ji mo akzakzan a angayan.”

¹⁹ O peycirngan na so sang ni Yeso am pazimanen na ji Pite o pangavosan na no inawan na no makwa do kazwazway na si Ama ta do to. Maniring si Yeso ji Pite am, “Macilolo ka jyaken.”

Si Yeso a kano ney kaglaw na macinanao jya

²⁰ Meyvazingowngaw si Pite am macita na o ney kaglaw na macinanao ji Yeso a macihza jira. Iya rana ori am nimacitangked ji Yeso no kakan da a mapacici sya do keyyan no tao a manazang nya.

²¹ Macita na ni Pite am maniring ji Yeso am, “Meypanngonngo si Yowani eya no makwa.”

²² Maniring si Yeso jya am, “No si ipanci ko kato na avyayan a mangay no yai ko na am ikongo mo kazyakan nya. To ka macilolo jyaken am.”

²³ Karahan am o akman sang a ciring am todavangovangon. Ori malavat da no macinanao ji Yeso o kaji na wakwakan no asa ka macinanao ji Yeso. Am ji na nipanci ni Yeso o kaji na wakwakan no nang. Ta kapanci na no, “No si ipanci ko kato na avyayan a mangay no yai ko na am ikongo mo kazyakan nya.”

²⁴ O ney kaglaw na ni Yeso a macinanao jya o yamapatwaw so aro a vazay eya a na kavatvatek jya. So namen pacyanoyngan do ciring na a tey manoyong.

Ney manowji rana ciring na

²⁵ Aro pa o mina vazay na ni Yeso. Am no ko naknakmen am no si mamimin a vatvatkan am ji rana makangay do karawan o karwaro no vakong.