Yowani 20 - Seysyo No Tao

Abo rana si Yeso do heseb na

¹ Madagdag do niciyo am ji pa dada o araw. O meyngaran so Matelyan Madiya am nimangay do heseb ni Yeso. Am to na cita o rako a veysen do ngoso na nimapakaro.

² Karahan am malalayo a mangay ji Simong Pite a kano ney kaglaw na ni Yeso a macinanao jya. Maniring jira am, “Da nyahap si Yeso do heseb na. Namen jyatenngi o da nipangayan sya.”

³ Karahan am mangay si Pite a kano asa ka macinanao ji Yeso do heseb na.

⁴ Sira rana ori a rarwa am meyheza sira malalayo. Am magzagza pa o asa kani Pite. So nipanmanma na makaranes do heseb ni Yeso.

⁵ Icingi na am milakayob rana o macita na. Am jya nimangay do sahad na.

⁶ Makaranes si Simong Pite am mina to meytopos a somdep do heseb na. Am o milakayob macita na,

⁷ kano milakayob a nipongos da do oo ni Yeso a makowkoo pa matarek so kazomtadan.

⁸ O nimanmanma nimakaranes do heseb ori am somdep ori. Macita na am to na rana anoyngi do mina kapirwa na rana mavyay.

⁹ Am ji da pa tenngi o peypeypangayan no ciring do Seysyo do kawakwak na keypirwa na mavyay.

¹⁰ Karahan am meyoli rana sira a mangay rana do vahay da.

Mapacita si Yeso ji Matelyan Madiya

¹¹ Meytatanek si Madiya a amlavi do pantaw na no heseb ni Yeso. Meyratateng am icingi na a meypangay do heseb na a tomita sya.

¹² Am to makacita so rarwa ka tinsi ni Ama ta do to a meyyayob so malavang a amlisna do nipangayan da si Yeso. Asa am amyan do nipeypaowan da sya. Asa am amyan do niyanan no ai na.

¹³ Maniring sira ji Madiya am, “Ikongo mo ilavi.” Maniring si Madiya am, “Da nyahap o kataotao na ni Yeso a Panirsirngen ko. Ko jyatenngi o yada nipangayan sya.”

¹⁴ Iptad na o ciring na am to na cita si Yeso a meytatanek do tangain na. Am ji na tenngi o ka si Yeso na.

¹⁵ Maniring si Yeso jya am, “Ikongo mo ilavi. Sino mo kalahen.” Manakenakem si Madiya am, “Ala iya o yatomalamozong no peymowamowan eya.” Am ori o nipancyan na nya jya so, “No imo yanimapeylis so kataotao ni Yeso am pancyaney jyaken mo nipangayan sya, ta mangay ko hapen do jya.”

¹⁶ Maniring si Yeso am, “Mo Madiya.” Citahen na ni Madiya am sirsirngen na no izezyak da no Sipolay. Maniring am, “Laponi!” O peypeypangayan na am, “Mangnanao.”

¹⁷ Maniring si Yeso am, “Ji mo minani yaken, ta yako pa jya nimangay ji Ama. Angay da kakteh ko do cinai a kapanci mo nya jira so ko kapeysinaoli a mangay ji Ama a Tao do to ta. Ta iya rana am ta kalovotan a Tao do to.”

¹⁸ Karahan am mangay rana si Matelyan Madiya manci nya do macinanao ji Yeso do kanimakacita na si Yeso a kapanci na no mina ciring na sya ni Yeso.

Mapacita si Yeso do macinanao jya

¹⁹ Ahep no niciyo am malovot sira o macinanao jya. No kanang am nipakapya da o pangengneban a nisletan, ta ikanyahey da o panipanirsirngen da no tao do Yotay. Karahan am to meytatanek si Yeso do tangain da. Maniring am, “Makapiya kamo so onowned an.”

²⁰ Teyka na o ciring na am ipacita na jira o lima na kano tagtagzang na. So nikasasaray da nimakacita si Yeso a Panirsirngen da.

²¹ Maniring si Yeso jira am, “Makapiya kamo so onowned an. To ko mangozai si Ama a nitomovoy jyaken. So ikakman ko sang a tomovoy jinyo.”

²² Karahan am ahahan na sira. Maniring pa jira am, “Ahapen nyo o Seyzi na ni Ama ta do to.

²³ No si vonasen nyo o raraten no tao am todavonas rana. O ji nyo vonasa so raraten am jyavonas o raraten da.”

Si Yeso a kani Tomase

²⁴ Asa do rarwa so ikakarwan a macinanao ji Yeso o meyngaran so Tomase. (O kasaing no ngaran na am si Nimeytovong a nimatazak a tao.) Iya rana am jya nimacikaop jira no kai ni Yeso.

²⁵ Maniring sira o karwan da am, “Namen nimacita si Yeso a Panirsirngen ta.” Maniring si Tomase jira am, “No si macita ko na a kapatoz ko so rokap ko do nipayorayan da so lima na do jyojika kapinan ko do tagtagzang na am ori saon o anoyngan ko jya am.”

²⁶ Ikawao na araw am malovot pa sira o macinanao ji Yeso. No kanang am macilovot rana jira si Tomase. Mangneb sira do kalovotan da vahay am to meytatanek si Yeso do tangain da. Maniring jira am, “Makapiya kamo so onowned an.”

²⁷ Maniring ji Tomase am, “Patozey o lima mo do jya. Cita pala o lima ko. Pacisngen a kapinan mo do tagtagzang ko. Taosya rana kaji mo manganwanoyngan an. So ipanganoyong mo an.”

²⁸ Maniring si Tomase ji Yeso am, “Mo Panirsirngen a Tao do to ko.”

²⁹ Maniring jya si Yeso am, “Mo na anoyngan yaken, ta mo na nimacita yaken? Am o to nganoyong jyaken a ji nimakacita jyaken am tey yapya sira ori.”

Peypeypangayan no vakong eya

³⁰ Aro pa dang o mina vazay na do tangain no macinanao jya mapeyzokab a vazay. Am yajya nipadket do vakong eya.

³¹ O yanipadketan so karwan na do vakong eya am anoyngan nyo ji Yeso a Misayya a Anak ni Ama ta do to. O manganoyong a tao am mahap da o to meyyonong a ikavyay no pahad da.