Yowani 19 - Seysyo No Tao

¹ Karahan am ipanci ni Pilato o tao a somipsipzot ji Yeso.

² Karahan am nimamalikawag sira o itaysang no Loma so akmey tazici a pasakopen da ji Yeso a kapeyyayob da sya so akmey ayob no panirsirngen,

³ kangay da do tangain na ni Yeso. Maniring sira am, “Makapintek ka panirsirngen no tao do Yotay an,” kasipsiplang da na sya.

⁴ Meyratateng am makowbot pa si Pilato. Maniring do aro a tao am, “Citahen nyo an, ta to ko na powbota yangay jinyo, do ko kaji makakalan so yana karatan.”

⁵ Karahan am makowbot rana si Yeso a nipasakopan da so akmey tazici a kapeyyayob na so akmey ayob no panirsirngen. Maniring si Pilato jira am, “Citahen nyo o tao eya.”

⁶ Macita da si Yeso no panipanirsirngen no mapatanatanang so nakem da si Ama ta do to a kano omzat do rako a panaralayan am amlololos sira manci no, “Padketen do jyojika. Padketen do jyojika.” Maniring si Pilato jira am, “Ahap kamo na a kapadket nyo sya, ta yabo yako makala na karatan.”

⁷ Maniring sira o tao do Yotay am, “Cyaha, ta amyan so iwawalam namen pangozayan ta amwakwak sya. Ta na to mancyan o kataotao na Anak na ni Ama ta do to.”

⁸ Mamizing ni Pilato am to rana nyahey.

⁹ Karahan am somdep do vahay a kapacici na si Yeso. Maniring am, “Do wanjin mo kapwan.” Am ji na nitovisan ni Yeso.

¹⁰ Maniring si Pilato ji Yeso am, “Mo ji novisi yaken? Naknakmen mo keyyan no oyowyat ko a mapasaway jimo. So iyan no oyowyat ko a manci no kawakwak da jimo.”

¹¹ Maniring si Yeso am, “O na iyan no oyowyat mo am si Ama ta do to. Am o yanitomoro nyaken jimo a tao am to makasi, ta tey arako o raraten na.”

¹² Mamizing na ori ni Pilato am ji na rana tenngi a sidongen si Yeso a pasawain, ta yoyoywan da no tao do Yotay. Maniring sira am, “No si pasawain mo am beken a kagagan na imo ni Kaysa a rako a panirsirngen do Loma. O manci no kataotao na panirsirngen am kavosoyan na o akman sang ni Kaysa.”

¹³ Mamizing na o aro a ciriciring ori ni Pilato am ipakowbot na si Yeso a kalisna na rana ni Pilato do lilisnan na no mapacicici so tao a ngaranan da Niherahedan no Vato. O ingaran da jya no Sipolay a tao am Cyapata.

¹⁴ Omanam o araraw no ipamaring da so kanen do Iyeci. Meyigen o araw no kano nang am maniring si Pilato do aro a tao do Yotay am, “Cita kamo pala o panirsirngen nyo.”

¹⁵ Karahan am amlololos sira o aro a tao. Maniring sira am, “Wakwaken! Wakwaken! Padketen do jyojika.” Maniring si Pilato jira am, “Nyo kakzeben yaken a mapadket so panirsirngen nyo?” Maniring sira o panipanirsirngen no mapatanatanang so nakem da si Ama ta do to am, “Si Kaysa saon o panirsirngen namen a yasa ka tao am.”

¹⁶ Karahan am itoro ni Pilato si Yeso jira mangay padketen do jyojika.

Padketen da si Yeso do jyojika

¹⁷ Karahan am yangay da na si Yeso, kapeyrara na rana so jyojika makowbot a meypangay do asa ka tokon a ngaranan da so Yanga no oo no tao. O ingaran da jya no Sipolay a tao am Keketa.

¹⁸ Do dang nipadketan da si Yeso. Amyan dang so rarwa ka marahet so yangay a nipazasing da. O asa am amyan do wanan na. O asa am amyan do ozi na a keyyan na ni Yeso do avak na.

¹⁹ Amyan so nivatvatkan no lamlamsoy ni Pilato a nipayoray na do jyojika ni Yeso. O peypeypangayan no vatvatek am, “Si Yeso rana am tao do Nasale a Panirsirngen da no tao do Yotay.”

²⁰ Aro tao do Yotay a nimakacita so sang, ta masngen o nipadketan da si Yeso do ili. O vatvatek ori am Sipolay a kano Lating a kano Sila o kavatvatkan na. So ipeykatlo no ciring a domket do dang.

²¹ Maniring o panipanirsirngen no mapatanatanang so nakem da si Ama ta do to ji Pilato am, “Ji mo padketa da kapeypanirsirngen sya no tao do Yotay. Ta apyapya pa o kapadket mo so mina ciring na a manci no kataotao na Panirsirngen no tao do Yotay.”

²² Maniring si Pilato am, “Ji ko na ablisi o ko nipadket a vatvatek.”

²³ Mateyka da padketen si Yeso no itaysang no Loma am ahapen da o mina ayob na kapeykapat da sya vonongen. So nikaponged da teyhesa ka vovonongan. Karahan am ahapen da o katapil no ayob na. O ayob rana ori am ji da nitapang, ta asa ka ayob ori so kamamaogan a nicinon da.

²⁴ Maniring sira o itaysang no Loma do kadwan jira am, “Ji ta misipisinga. Apyapya rana o kapasipangoyongoyot ta jya makahakahap rana sya.” O ikakman na sang am mangay mangononong o ciring do Seysyo. Ta maniring am, “Da nivonong o nipeyyayob ko a da kapasipangoyongoyot do magorogod ko.” So nikanoyong no nang a mina vazay da no itaysang no Loma.

²⁵ O meytatanek do katangked no jyojika ni Yeso am si ina na kani kaminan na kani Madiya a mavakes ni Kelopo a kani Matelyan Madiya.

²⁶ Macita na ni Yeso si ina na kano ney kaglaw na a macinanao jya a meytatanek do dang am maniring ji ina na am, “Mo ina, to mo na abneka anak mo.”

²⁷ Maniring do macinanao jya am, “To mo na abneka a ina mo.” Nimacipinda no kano nang o kapavahay na rana so ina na ni Yeso.

No kawakwak ni Yeso

²⁸ Katenngan na rana ni Yeso o kanikomavos no makakaday a vazay na. Maniring am, “Ko mawaw.” O ikakman na sang am mangay mangononong o ciring do Seysyo.

²⁹ Amyan dang so asa ka panay a kapnowan no nipatavayan da so makopad a ranom. Karahan am pasivozen da o akmey tapaik do makopad a ranom a kapataroy da sya do akmey kamanakaoy a pasngenen do ngongoy na.

³⁰ To na nahamtama ni Yeso. Maniring am, “Yarana nikomavos o vazay ko,” kalogod na rana a mazavat so inawan.

Nisobsob da no cinalolot o tagtagzang na

³¹ Karahan am ipanci da ji Pilato no kamanrarakehan da no tao do Yotay o kavaci da so ai da no nipadket da do jyojika a tao a kakeykai da mawakwak a kapeypakas da rana so kataotao da do jyojika. O hapan da so akman sang a vazay am raten da o kato na ngyanan no kataotao da do jyojika do ipeywalam no tao do Yotay. Ta do ikadwa na araw am makdeng a ipamaring da so kanen.

³² Am ori o nyangay da no itaysang no Loma amvaci so ai da no rarwa ka tao a nipazasing da do jyojika ni Yeso.

³³ Am mangay sira ji Yeso am macita da na nimawakwak rana. Am ori o ji da na amvaci so ai na.

³⁴ Am asa ka itaysang no Loma o nisomobsob no cinalolot so tagtagzang ni Yeso a kavoyog no rala na kano aswasoy no kataotao na.

³⁵ Ori rana am ciring na no nimakamatamata sya tao. So ikanoyong no akman sang a ciring na. Ta akma ney yongkad ori. So anoyngan nyo jya.

³⁶ O peypeypangayan no nang am mangay mangononong o ciring do Seysyo. Ta maniring am, “Abo asa ka totowang na mavaci.”

³⁷ O asa ka ciring pa do Seysyo am, “Pacimatan da o nisobsob da tao.”

Nipakakasa da si Yeso

³⁸ Makarahan am o tao do Adimatay a meyngaran so Yoseyvo am ipanci na ji Pilato o kahap na so kataotao ni Yeso. Am iya rana am anoyngan na no nang si Yeso. Am ji nadkeci o kapanci na nya do tao, ta ikanyahey na o panipanirsirngen no tao do Yotay. So nipyan na sya ni Pilato a mangay omkas so kataotao na ni Yeso a kahap na rana sya.

³⁹ O meyngaran so Niketemo a nikomala si Yeso do mahep no kakwa pa am nimacihza ji Yoseyvo. O nyahap na ikoris na ji Yeso a mahangno a haneng am akmey asa ka rako a vaklit so karwaro.

⁴⁰ Karahan am pakasen da si Yeso, kakoris da rana jya no haneng a kapongos da jya no malavang a milakayob. Ta ori rana am iwawalam da ori no tao do Yotay do nimapoling so peylingalingayan a tao.

⁴¹ O nipadketan da si Yeso am masngen ori do peymowamowan no tao. Amyan dang so vayo a heseb a nidokdokan da mao. Am abo pa do dang o nimrakeh a tao a nipangay da do dang.

⁴² Ikongo do omanam pa o araraw no ipeywalam da no tao do Yotay. Masngen o heseb do nipadketan da si Yeso. Am ori o to da rana pakakasai sya do dang.