Yowani 16 - Seysyo No Tao

¹ “Ji kamo na haha so nakem, ta nipanci ko na ya jinyo.

² Mangay kapasyay da jinyo do peyneynozyan. Amyan so araraw no iwakwak da jinyo. Am ipanci da ori a agoman da ni Ama ta do to.

³ O ikakman da sang so vazay jinyo no tao am ji da tenngi si Ama ka nyaken.

⁴ No makaranes rana o akman sang a vazay am cyaha, ta nipaziman ko na jinyo. Ji ko nipeycicinda nipanci jinyo o akman sang a vazay, ta macikaop ko pa jinyo.

Vazay no Seyzi

⁵ “Ko meysinaoli rana sicyaikwaya do yanitomovoy jyaken an. Am yabo jinyo o yanimapacici jyaken a manci no, ‘Do wanjin mo angayan.’

⁶ Am yako ipanci rana jinyo sicyaikwaya am kamo na marahet so nakenakem.

⁷ Am to ko na macitangayan jinyo am no si mangay ko am apya ori jinyo. No si ji ko angay am ji makaranes jinyo o somidong jinyo a Rarey nyo. Am no si mangay ko am tovoin ko a mangay jinyo.

⁸ Si mai ori am patwawen na do tao do karawan o meyngongyod a raraten a kano meyngongyod a apya vazay a kano ipasingkad na so tao ni Ama ta do to.

⁹ O raraten da no tao do karawan am da ji nganoyngi yaken.

¹⁰ Da jyatenngi o manoyong a vazay. Ta yaken rana am yako mangay ji Ama. So ji nyo rana makacitai jyaken.

¹¹ Yamalas o yada naknakmen a na ipasingkad so tao ni Ama ta do to. Ta yarana nimeydedna o peyoyaoyyan na do mimong no karawan.

¹² “Yaro pa o yako ipanci jinyo am ko ihawa kaji nyo makatenngan jya sicyaikwaya.

¹³ No mai rana o Seyzi a yamapatwaw so manoyong a nanao ni Ama ta do to am ipeypalanginan na inyo. Am ji na mangozai o oyowyat na. Ta nimamizing na o ipanci na jinyo. So pancyan na nya jinyo so omanam pa vazay.

¹⁴ Azwain na yaken, ta ahapen na o ciring ko a ipanci jinyo.

¹⁵ Yatodamimin o nanao ni Ama yamyan jyaken. Am ori o ko pancyan no na kayapo jyaken no inanao na jinyo no Seyzi.

Sarasaray a kano alalaw

¹⁶ “Alikey rana kaji nyo na makacittan jyaken. Am ji meyyonownay ori a kapakacita nyo na jyaken.”

¹⁷ Maniring o tatasa ka macinanao jya am, “Ikongo peypeypangayan no nang. A na kapanci no kalikey na rana kaji ta na makacittan sya, a na kapanci pa no na kangay ji Ama na do to. Ikongo peypeypangayan no ciring na ang.

¹⁸ Ikeykongo peypeypangayan no na ipanci ori a kalikey na rana. Tamo jyatenngi o na hetehtawan no ciring na.”

¹⁹ To na tenngi ni Yeso o kapacici da sya. Am ori o nipancyan na nya jira. Maniring am, “Nyo ikazyak o ko kapanci no na kalikey rana no kaji nyo na makacittan jyaken? A kano, ‘Ji meyyonownay a kapakacita nyo na jyaken?’

²⁰ To ko na macitangayan jinyo am mangay kalavi nyo a meykaoo. Am somaray sira o tao a ji nganoyong jyaken. Am cyaha, ta o lavyan nyo am no meyvoga am sarasaray nyo na.

²¹ No marateng rana o araraw no kapaw no totowang no mamlis so kanen a mavakes am manoyong karako no alalaw na. Am no mapaw rana ori am kahamangan na rana o alalaw na, do katey masaray na a makacita so anak na nimatazak rana tao do karawan.

²² Ori an, nyo ikakman sang an. Tana kamo marahet so aktokto sicyaikwaya am cyaha, ta mai ko pa tomita jinyo a kasaray nyo a makacita jyaken. So ikabo no tao a makapehes sya jinyo so sarasaray nyo.

²³ No si marateng o araraw ori am abo rana asa ka ciring a ipacici nyo jyaken. To ko na macitangayan jinyo am no mapasyasi kamo ji Ama kapeyhanhan nyo no ngaran ko am itoro na jinyo.

²⁴ Sicyaikwaya am yanyo pa ji meyhanhanan o ngaran ko a mapasyasi ji Ama ta do to. So amin nyo sya an, ta itoro na jinyo. Am ori o ikanoyong nyo a tey masaray rana.

Haragen ni Yeso o marahet do karawan

²⁵ “Amyan rana so nipehngehngay ko a ciring ko jinyo. Am yarana makeykai o araraw na a makaranes. So ji ko rana mapowzibi so ciring ko. Ta ko na pasononga o vazay ni Ama a ipanci ko jinyo.

²⁶ No si marateng rana o araraw am mapasyasi kamo ji Ama ta do to a meyhanhan no ngaran ko. So ikabeken a yaken o mapasyasi ninyo.

²⁷ Ta na ikarilaw inyo ni Ama ta do to. O na karilawan ninyo am nyo ikaglaw yaken a yaomanoyong jyaken a apo ji Ama ta do to.

²⁸ Ko apo ji Ama ta do to a yanimai do teyrahem. Sicyaikwa rana ya am ko na karwan o karawan a yamangay rana ji Ama ta do to.”

²⁹ Maniring o macinanao jya am, “Ka manoyong a yaji manayotayo so ciring, ta namen katenngan rana o peypeypangayan no mo ipanci.

³⁰ Namen katenngan imo a yabo so yajyatenngi. Mo katenngan o yamyan do onowned namen. Ori o namen anoyngan jimo a yapo ji Ama ta do to.”

³¹ Maniring si Yeso jira am, “Nyo na anoyngan yaken sicyaikwaya?

³² Naknakmen nyo an. Ta makeykai rana o kasyasyay nyo rana mangay do peycyavakavahayan nyo a ika yaken rana no yamaveyvow. Am ko jyaveyvow, ta macikaop jyaken si Ama.

³³ O ko pancyan no nang jinyo am ko ipadnadna so nakem nyo a macikaop jyaken. Am mangay o kalalaw da jinyo no ji manaralay a tao. Am ji kamo a zabab so onowned an. Ta ko na niharag o yamrahet so karawan.”