Yowani 14 - Seysyo No Tao

Si Yeso am rarahan ta mangay ji Ama ta do to

¹ Maniring pa si Yeso jira am, “Ji kamo a rahet so onowned an. Ta anoyngan nyo si Ama ta do to a ka nyaken an.

² Yaro o yanan do vahay ni Ama. O ko yangay am ko mangay peykala inyo so yanan nyo. No si jyanoyong o akman sang am ji ko mancyan jinyo.

³ No si manoyong o kangay ko a meykala ninyo so yanan nyo am meysinaoli ko pa a mangay a omahap jinyo a kapacitovong nyo jyaken.

⁴ Nyo katenngan o rarahan do yako angayan ang.”

⁵ Maniring jya si Tomase am, “Namen jyatenngi mo angayan, mo Panirsirngen. Am ori o namen ji makatenngi do rarahan ang.”

⁶ Maniring si Yeso am, “Yaken am rarahan nyo. Yaken am yanan no manoyong a nanao. Yaken am yapwan no to meyyonong a ikavyay no pahad nyo. No ko abo am abo tao a makatanggeh ji Ama ta do to. So ika yaken no ipakatokod nyo ji Ama ta do to.

⁷ No kamo manoyong a yamakateneng jyaken am akman sang si Ama a katenngan nyo. Papwan nyo sicyaikwaya o ipakateneng nyo na jya, ta nyo na nimacita.”

⁸ Maniring si Veydipo ji Yeso am, “Pacitaney jyamen, mo Panirsirngen, si Ama ta do to, ta ori namen kakzeben.”

⁹ Maniring si Yeso am, “Mo Veydipo, ko na mownay a yamacikaop jinyo. Manngwa, mo pa jyatenngi yaken? O makacita jyaken am nimacita da na si Ama. Ikongo mo pancyan no kapacita ko ni Ama jinyo.

¹⁰ Manngwa, mo anoyngan yaken, mo Veydipo an? Do ko kapacikaop ji Ama a na kapacikaop jyaken ni Ama? O ciring ko jinyo am beken a yapo jyaken. So na icyakman sang no vazay ko. Ta vazay na ori ni Ama a yamacikaop jyaken.

¹¹ Anoyngan nyo o ko kapacikaop ji Ama. Ta akman sang si Ama a yamacikaop jyaken. Am no si ji nyo nganoyngi am to nyo na nita o mina vazay ko an.

¹² “To ko na macitangayan jinyo am mapeyvazay da o mina vazay ko no omanoyong jyaken a tao. So iyan no makapeyvazay so rakorakwan pa kano nang. O ikakman na sang am amyan ko na ji Ama do teyngato.

¹³ No mapasyasi kamo a meyhanhan no ngaran ko am amizngen ko inyo. So ikanoyong no azwazway ni Ama ta do to a mangay tomwaw jyaken a Anak na.

¹⁴ No mapasyasi kamo jyaken do makakaday a meyhanhan no ngaran ko am amizngen ko inyo.

Ipanci na o Seyzi a somidong jyaten

¹⁵ “No si manoyong o kaglaw nyo nyaken am pangononongan nyo o nanao ko.

¹⁶ Ipanci ko ji Ama a kapanta na ninyo so somidong jinyo a Seyzi, kato na rana meyyonongan a macikaop jinyo.

¹⁷ Iya rana am yamapatwaw so manoyong a nanao ni Ama ta do to. Am da to nazibwan no yaji nganoyong jyaken a tao. Ta da jyacita. Am ori o da ji makatenngi jya. Am inyo am nyo katenngan o Seyzi a macikaop jinyo a Rarey nyo a yaji macisyay jinyo.

¹⁸ “Ji ko mamyapyan inyo a akmey minaminasbang, ta meysinaoli ko pa jinyo.

¹⁹ Alikey rana kaji da na makacittan jyaken no ji nganoyong jyaken a tao. Am inyo am macita nyo pa yaken no si mirwa ko pa a mavyay. So ikakman nyo sang a makahap so to meyyonong a ikavyay no pahad nyo.

²⁰ No si marateng o araraw no nang am katenngan nyo o kapacikaop ko na ji Ama. So ikakman nyo sang a macikaop jyaken. Akman jyaken a yamacikaop jinyo.

²¹ O mangononong do nanao ko am manoyong o akman sang a maglaw nyaken. O maglaw nyaken a tao am akman sang si Ama a marilaw nira. So karilawan ko nira. So ika yaken no somidong sira a manoyong a makateneng jyaken.”

²² Maniring si Yota (am beken a nimanazang ni Yeso a si Yota tao do Isecyadi) am, “Mo Panirsirngen, ikongo na ika yamen no makateneng jimo a yaji zagom so tao do karawan.”

²³ Maniring si Yeso am, “O maglaw nyaken am pangononongan da o nanao ko. Ta ori o karilawan na nira ni Ama. So ipacikaop namen si Ama jira.

²⁴ O jyaglaw nyaken am ji da mangononongi o nanao ko. O nyo nimamizing a nanao am beken a apo jyaken, ta yanimapo ji Ama a yanimapahanhan jyaken.

²⁵ “No kapacikaop ko pa jinyo am nipanci ko na ya jinyo.

²⁶ O yasomidong jinyo a Seyzi am tovoin na jinyo ni Ama ta do to a kapalit ko a kananao na jinyo no makakaday a vazay a kapakanakem nyo na so mina ciring ko jinyo no kakwa.

²⁷ Ko itoro jinyo o ikapiya no onowned nyo. So na ikanoyong a yapo jyaken no apiya onowned nyo. Am meytarek ori a kano ipanci da no tao do karawan ikapiya no onowned. Am ori an, ji nyo a raci so onowned. Ji kamo anyahey.

²⁸ Nimamizing nyo na o ciring ko an. Tana ko karwan inyo am meysinaoli ko pa jinyo. No si ikaglaw nyo yaken am isaray nyo yaken a mangay ji Ama, ta iya rana am mahamahama pa ka nyaken.

²⁹ Nipanci ko na jinyo, do ji na pa makaranesi no vazay ang. Ta no si makaranes ori am anoyngan nyo na yaken.

³⁰ Alikey rana o yako ipacikaop jinyo a macisirsiring jinyo. Ta yarana myan o yamimong no karawan. Am ji na harag yaken no oyowyat na.

³¹ Am katenngan da no tao do karawan o ko kaglaw ni Ama, do yako kahap so makakaday a vazay a nipanci na jyaken ni Ama.” Meyratateng am maniring pa jira si Yeso am, “Mangay tamo na.