Yowani 12 - Seysyo No Tao

No kapaglo na ni Madiya do ai ni Yeso so mahangno a haneng

¹ Kanem pa araw o awang na do Iyeci am nimangay si Yeso do Potani. Do dang rana am peyvahayan no nipeyvangon ni Yeso a si Lasalo.

² Amyan do dang so tao a nimapowyab sya. Am o meyngaran so Marta kakteh ni Lasalo a mavakes am manaotao. Si Lasalo a kano aro a tao am macihanghang ji Yeso.

³ Karahan am mangai si Madiya so mahangno a haneng. Ori rana am tey masingat ori. Karahan am to na rana mimina paglowen do ai ni Yeso a kalinas na jya no avok na. So nikahangno no sahad a yanan da.

⁴ Maniring o asa ka macinanao ji Yeso a meyngaran so Yota a tao do Isecyadi a omavat do kapanazang na ni Yeso am,

⁵ “Apyapya rana o kapamalit nya so nizpi a ipanidong so ikasi a tao am. Ta tey masingat ori.”

⁶ To na mancyan ori am beken a meyngongyod o karilaw na no makasi a tao. Ta iya rana am manakaw a tao. Ta iya rana am masangib a tomakaw so italamozong na nizpi no kararay na.

⁷ Am maniring si Yeso am, “To mo macyozai, ta ori rana am yavat na jyaken no ibobo da yaken.

⁸ Yamasangib sira o makasi a tao a yamacikaop jinyo. Am yaken am yalikey rana ipacikaop ko jinyo.”

⁹ Mamizing da si Yeso no aro a tao a amyan do Potani am mangay sira jya. Beken a kanakenakem da so kangay da ji Yeso, ta naknakmen da pa o kangay da tomita si Lasalo a nyavyay na ni Yeso.

¹⁰ Karahan am naknakmen da no panipanirsirngen no mapatanatanang so nakem da si Ama ta do to o kapazanod da si Lasalo a wakwaken.

¹¹ Ta tey yaro o tao do Yotay a ji rana ngonot do mapatanatanang so nakem da si Ama ta do to a omanoyong rana ji Yeso, do kanimapeyvangon na si Lasalo do heseb na.

Mazway a mangay do Yelosaleng

¹² Ikadwa na araw am o macipamarimaring so kanen a aro a tao am mamizing da si Yeso a mangay do Yelosaleng.

¹³ Am ori o nipangap da so akmey voong no anyoy a mangay amrapong sya. Maniring sira amlololos am, “Isaray ta si Ama ta do to. Inaoy si ipanlanlag na o nitovoy na a yarana nimai. Inaoy si ipanlanlag na ni Ama ta do to o Panirsirngen no Isedi a tao.”

¹⁴ Makakala si Yeso so asa ka baka kavang na jya. So toney macipayoki no ciring do Seysyo. Ta maniring am,

¹⁵ “Inyo a tao do Yelosaleng am ji kamo anyahey. Cita kamo o Panirsirngen nyo a yamavang do likta baka a yarana mai.”

¹⁶ No kano nang am ji da tenngi no macinanao jya o peypeypangayan na. Makaranes rana o azwazway na ni Yeso a nimirwa a mavyay a kapeycyakavat na rana a mangay do teyngato am manakem da rana o ciring a domket do Seysyo a manoyong a pakacirngen na jya, do kapeyyangay na kano vazay da jya no tao.

¹⁷ Tawagan ni Yeso si Lasalo apo do heseb na am amyan dang so aro a tao. So nipeylimwang da no akman sang a nimacita da vazay.

¹⁸ Ori o nyangay da no aro a tao a mangay amrapong sya. Ta nimamizing da o kanimapeyvangon na si Lasalo.

¹⁹ Maniring sira o tao a macyagom do Vadisay do kadwan jira am, “Asyo tamo eya yabo so oyowyat a amzazat jira. Cita pala yatodamimin rana o tao do karawan a omanod jya.”

Kakdain da si Yeso a macita no tao do Sila

²⁰ Amyan so tao do Sila a nimangay do Yelosaleng a mamaring so kanen a omraralay ni Ama ta do to.

²¹ Sira rana am mangay da citahen si Veydipo a tao do Peysayta a ili a macinapnap do Cyadidi. Maniring sira jya am, “Mo kahakay, namen kakdain si Yeso a macita.”

²² Karahan am mangay na ipanci ni Veydipo ji Antele a kapeyheza da mangay manci nya ji Yeso.

²³ Maniring si Yeso am, “Yarana makaranes o araraw no ikazway no Nipamnekan na ni Ama ta to a tao.

²⁴ To ko na macitangayan jinyo am no ji pamowa do tana o mowahen am jyablis ori a asaha. Am no si pamowahen do tana am amlida rana kapalasi na rana.

²⁵ O ambeywan do inawan na a tao am mapehes jya o inawan na. O tongbo so inawan na do karawan eya am mahap na o to meyyonong a ikavyay no pahad na do teyngato.

²⁶ O mahap so vazay ko am macilocilolo jyaken. O yanan ko am amyan sira dang o kahanhanan ko. O mahap so vazay ko am azwain na ni Ama.

Malavat na ni Yeso o kawakwak na

²⁷ “Yako meyngen so onowned sicyaikwaya. Ikongo pa o ciring ko. Manngwa, apya o kapanci ko ni Ama mapaliklik so yaomanam a alalaw ko? Am o peypeypangayan no ko nyai do karawan am ahapen ko o alalaw ko ang.

²⁸ Mo Ama, inaoy si macita da no tao oyowyat mo.” Mina to ngyan so ciring apo do teyngato no kano nang. Maniring am, “Ko na nipatwaw o oyowyat ko. So pirwan ko paha mapatwaw sya.”

²⁹ Mamizing da o ciring ori no aro a tao am maniring sira am, “Ori am nimeykadey.” Am maniring o kadwan jira am, “Yamyan so tinsi a yanimacisirsiring jya.”

³⁰ Am maniring si Yeso jira am, “Beken a yaken o na aingan no ciring, ta inyo o na pamizngen.

³¹ Oya rana o ipacici so tao do karawan. Oya rana o isakeb ni Satan a yatomalamozong no tao do karawan.

³² No si padketen da rana yaken do jyojika keypirwa ko na a mavyay am panopen ko o aro a tao do karawan.”

³³ O peycirngan na sang am ipakateneng da jya no tao o kangay na mawakwak do jyojika.

³⁴ Maniring o aro a tao am, “O domket do Seysyo am to meyyonong a mavyay o Misayya. Am ikongo mo pancyan no kapadket sya do jyojika so Nipamnekan na tao ni Ama ta do to. Sino tao mo ipanci ang.”

³⁵ Maniring si Yeso am, “Alikey o iyan na jinyo no zezak. Makabezbez kamo a omalam do iyan na pa no zezak. Ta no masari rana am ji nyo na cita o pangonongan nyo.

³⁶ No myan pa o zezak am anoyngan nyo ori an. So ikanoyong nyo na mazngang so onowned.” Iptad na ni Yeso o ciring na am karwan na sira kangay na rana matarek do kabwan no tao.

Ji da nganoyngi no tao do Yotay

³⁷ Tana aro o yongkad na apo ji Ama ta do to am ji da nganoyngi si Yeso.

³⁸ O ikakman na sang am mangononong o mina ciring ni Isayya. Ta maniring am, “Mo Panirsirngen, sino o to nganoyong do ipeylimwang namen. Sino o to makacita so oyowyat na no Tao do to.”

³⁹ Nimalavat na rana ni Isayya o kaji da manganoyngan. Ta maniring am,

⁴⁰ “Si Ama ta do to o icyakma dey mavota. Icyakma ney vato o onowned da do kaji da mamlisan. Maniring si Ama ta do to am, ‘Yabo da kasngesngenan jyaken. Makongo ko so wanjin a mapatastas sira do teyngato.’ ”

⁴¹ O peycirngan na sya ni Isayya am nipacita na ni Ama ta do to o azwazway ni Yeso jya. Am ori o peycirngan na sya jya.

⁴² Tana akman sang am aro panipanirsirngen da no tao do Yotay a omanoyong ji Yeso. Am kanyahey da no tao a macyagom do Vadisay. Am ori o ji da makadkeci jya ipanci, do kanyahey da pasyain do peyneynozyan da.

⁴³ Ikeykakza da pa o icyatatao da zomwazway sira. Ji dakzan o kazwazway na sira ni Ama ta do to.

⁴⁴ Maniring si Yeso a amlolos am, “Omanoyong jyaken am beken a yakehen o anoyngan da. Ta akman sang si Ama a nimapahanhan jyaken o anoyngan da.

⁴⁵ O makacita jyaken am akman sang sira makacita si Ama a nimapahanhan jyaken.

⁴⁶ Akma koy zezak a mai do teyrahem. So ji da na ngyani do kasarisaryan no omanoyong jyaken a tao.

⁴⁷ O makamizing so nanao ko a ji mangononong jya am ji ko pacicya. Ta o ko nyai do teyrahem am beken a mapacici so tao do teyrahem, ta patazadangen ko sira.

⁴⁸ O tomaosya jyaken a ji ngahap so nanao ko am pangozayan ko o ciring ko a manci no keyyan no raraten na no masasnad rana o araraw no kapeykapyapinpin na so tao ni Ama ta do to.

⁴⁹ Ta ko ji mangozai o kataotao ko a yamapeyciring sya. Ta ko to mangozai o ciring no yanimapahanhan jyaken.

⁵⁰ Ta ko katenngan o ciring na yapwan no to meyyonong a ikavyay no pahad. O ciring ko rana am ciring na ori ni Ama.”