Yowani 10 - Seysyo No Tao

Akmey mangonong so kagling si Yeso

¹ Maniring pa jira si Yeso am, “To ko na macitangayan jinyo am o jindep do aneb no amaot no kagling a kangay na meysopo jya am manakaw o akman sang.

² O somdep do aneb no amaot no kagling am manoyong a mapeyvinyay sya.

³ Iwangan na o aneb no amaot no vinyay na no pamzamzaten da a kasdep na no mapamangamangan so kagling na. Katovilan no kagling na o itawag na jira no mapeyvinyay sira. Teyteyhesahen na sira tawagan a powboten.

⁴ Powboten na sira am mangay do panoman da mamanong nira kapacihza da jya no kagling na, ta katovilan da o itawag na jira.

⁵ Ji sira macihza do ji da singkaji so itawag jira, ta ikeywam da, do kaji da makatovilan do igagan na sira.”

⁶ Ipanci na jira ori a pehngehngayan na sya ni Yeso. Am ji da azab o peypeypangayan no ciring na.

⁷ Am ori o nipancyan na nya jira. Maniring am, “To ko na macitangayan jinyo am yaken am akma koy asdesdepan do peyyamaotan so kagling.

⁸ O manmanma pa ka nyaken a macitarek so ipangnanao am akman sira so manakaw a tao. Am ori o ji da ngamizngi so nanao da no tao.

⁹ Yaken rana am akma koy asdesdepan. O somdep jyaken am patazadangen ko sira do teyngato. So ikanoyong da tey yapya, to ngonongonong do kasdep da, kapakowbot da a kapakakala da so apyahen da no nakem.

¹⁰ O isdep da no manakaw am manakaw sira, kapanwakwak da ambalinas sira. Am o peypeypangayan no ko nyai do teyrahem am ko ipanta inyo so to meyyonong a ikavyay no pahad nyo, kasasaray nyo rana abo so kalahen.

¹¹ “Yaken rana am akma koy mapamangamangan so kagling a makapzat do omanop jyaken a tao. Ta mangay o kangay ko no inawan no omanop jyaken a tao.

¹² O torwan da mapamangamangan so kagling am ji na pakapya apzatan o kagling, ta ji meyngongyod ori a mapeyvinyay sira. No myan so vozaw a ino a macisngen do kagling am to na rana ngaroi o kagling, a kakan na so kagling a peyvwaken no vozaw a ino.

¹³ O ikaro da do kagling no torwan da mapamangamangan so kagling am ji meyngongyod a mapeyvinyay sya. Am ori o ji na makakdengi jira apzatan.

^14-15 Yaken rana am akma koy mapamangamangan so kagling a makapzat jira. Si Ama ka nyaken am namen katenngan o kadwan jyamen. Yakman sang o kagling ko yamabwang jyaken. Yaken rana am ikakza ko o kangay ko nira no inawan.

¹⁶ O kagling ko a yapa ji macyamaot do jya am mangay ko kalahen sira kapakamizing da so itawag ko jira. So icyakma dey yasa a onongan ko.

¹⁷ “Ikarilaw na yaken ni Ama. Ta ko ji macimamman o kangay ko no inawan nira. O ikakman na sang am meysinaoli pa jyaken o inawan ko.

¹⁸ Abo o tao a makapehes so inawan ko, ta yaken o yatomalamozong no kawakwak ko, kaji ko a wakwakan. Nakenakem ko kangay no inawan ko. To ko ngonongonongi o keypirwa ko a mavyay, ta nakenakem ni Ama o kahap ko so akman sang a vazay.”

¹⁹ Mamizing da o aro a ciring ori no tao do Yotay am meyhatay sira so onowned a ji macipaswasovoy.

²⁰ Aro jira manci no, “Yakovotan ori. Yazomyak. Nyo amizngan sya.”

²¹ Maniring o karwan da am, “Mapatwaw na o akman sang a ciring no kovotan? Ta to na makeywangi do mata no mavota tao no yakovotan ang.”

Taosyahen da no tao do Yotay si Yeso

²² Teyka sira mamaring so kanen do Yelosaleng do kaniomyavayo da so rako a panaralayan da no kakwa pa am zosok no ahemyan no kano nang.

²³ Mangonong si Yeso do tezantehed no rako a panaralayan do ngaranan da Solomen am,

²⁴ limoten da no tao do Yotay. Maniring sira jya am, “Yanamen ipeykawad imo. Pancyan pala jyamen o mo ka Misayya.”

²⁵ Maniring si Yeso am, “Nipanci ko na jinyo am nyo ji nganoyngi. To nyo na novili o vazay a na nitoro jyaken ni Ama, ta ori o yongkad ko a yapo ji Ama ta do to.

²⁶ O nyo ji nganoyngi jyaken am beken a kagling ko inyo.

²⁷ O kagling ko am katenngan da o izezyak ko. So ipakateneng ko jiraha. So da ipacilolo jyaken.

²⁸ Ipanta ko sira so to meyyonong a ikavyay no pahad da. So ji rana meydednai jira no peyoyaoyyan na ni Ama ta do to. So ikabo no tao a makapehes sira do lima ko.

²⁹ Si Ama a yanitomoro nira jyaken am abo makahad sya. So ikabo no tao a makapehes sira do lima na.

³⁰ Namen akmey yasa si Ama.”

³¹ Karahan am mangap sira o tao do Yotay so veysen a igseh da jya.

³² Maniring si Yeso jira am, “Yaro rana o yanyo nimacita a ko pangarilawan a na nitoro a vazay na ni Ama. Am ikongo yamarahet dang a vazay ko a yanyo kato meyvatwan nyaken.”

³³ Maniring sira o tao do Yotay am, “Beken a vazay ang o namen agsahan jimo. Ta imo rana am mo jyasnesnekan si Ama ta do to. Ta yamo paka Tao do towen o kataotao mo a todna ka tao.”

³⁴ Maniring si Yeso am, “Yadomket do vakong nyo o ciring na ni Ama ta do to. Maniring am, ‘Inyo am tao do to kamo.’

³⁵ Tamo katenngan o kato na meyyonongan a jyablis no Ciriciring na ni Ama ta do to do Seysyo. Ipanci ni Ama ta do to o kakma dey tao do to no mahap so ciriciring na no kakwa pa.

³⁶ Am yaken rana am na nitovoy yaken ni Ama do teyrahem. Ko ipanci pa am Anak na yaken ni Ama ta do to. Ikongo nyo pancyan nyaken a yajyaninig ni Ama ta do to.

³⁷ No ko ji ngapa o vazay ni Ama am ji nyo nganoyngi yaken.

³⁸ Am tana ji nyo nganoyngi yaken am anoyngan nyo o vazay ko an. Ta ori o ipakateneng nyo ji Ama yamacikaop jyaken. Ta yako macikaop jya.”

³⁹ Makarahan am naknakmen da o karakep da sya am kanikomaro na rana jira.

⁴⁰ Karahan am mangay si Yeso do katovangan no meyngaran so Yotan a ayo do nipanaktakan ni Yowani a miseysan.

⁴¹ Aro tao a mangay komala sya. Maniring sira am, “Abo o mapeyzokab a vazay ni Yowani am manoyong o ciring na pakacirngen na do tao eya.”

⁴² Aro tao do dang a niomanoyong ji Yeso.