Yowani 1 - Seysyo No Tao

Si Yeso o to meyyonong a Ciring ni Ama ta do to

¹ No kaji na pa amaogan no karawan am amyan rana o Ciring ni Ama ta do to. O Ciring rana am macilovot ji Ama ta do to. O Ciring am manoyong a Tao do to.

² Nimakalapo no kakwa o kapacilovot no Ciring eya ji Ama ta do to.

³ Ciring o nyamaog na ni Ama ta do to so makakaday. So ikabo no asa ka maoran no karawan a ji na nyamaog no Ciring eya.

⁴ O Ciring ni Ama ta do to am ori o yapwan no inawan no tao. O inawan rana am zezngang a ikavyay no tao.

⁵ O zezak am cirain na o kasarisaryan. So ji na makahespi so mazngang no masari.

⁶ O meyngaran so Yowani a tao am nitovoy na ni Ama ta do to a lamlamsoy na.

⁷ Iya rana am ipanci na do tao o zezngang a kamimin no tao a makamizing sya kapanganoyong da rana.

⁸ Am beken a iya ori o zezak ang, ta o kapangnanao na no zezak ang.

⁹ O zezak rana am manoyong a zezngang apo do teyngato a tomiray so tao do karawan.

¹⁰ O Ciring rana am amyan rana do karawan a nipangamaog na ni Ama ta do to so karawan. Am kaji da makatenngan jya no tao do karawan.

¹¹ Mangay do pacikeylyan na am to da nazibwan no tao do dang.

¹² Sira rana ji nazibo nya tao a kano omanoyong jya tao am abneken na sira akma ney anak ni Ama ta do to.

¹³ Am beken a meyngongyod sira ori a nimapodpod so kataotao ji Ama ta do to, ta omaing do kanoyong da ji Ama ta do to. Am ori o abnekan na sira akma ney anak.

¹⁴ So nipeyvaliw no Ciring a tao a macikaop jyaten a tey rako so pangangarilawan a tey manoyong. So nipakacittan namen rana so azwazway na. So ikanoyong na abo so ikararwa angayan no azwazway. Ta iya rana am veyvowen na Anak ni Ama ta do to.

¹⁵ Iya o ipeylimwang ni Yowani amlololos a manci no, “Iya o nimalavat ko na a manownowji pa a mai a ka nyaken. Am mahamahama pa ori ka nyaken. Ta amyan rana no kaji ko pa tazakan do karawan.”

¹⁶ Yateywara o pangangarilawan na a na itoro jyaten. O aryarilaw na jyaten am yabo yakasaraw a na ipeywalam.

¹⁷ O iwawalam na ni Ama ta do to o nipangnanao na ni Moyse a onotan ta. Am o pangangarilawan na kano manoyong a nanao na ni Ama ta do to am ori o nyai na ni Yeso Kizisto do tao do karawan.

¹⁸ Abo pa o tao a nimakacita si Ama ta do to. O Anak na yamacikto ji Ama ta do to a yamlisna do katangked na am ori o nipakateneng ta ji Ama ta do to.

Nanao na no nimanaktak a meyngaran so Yowani

¹⁹ No kano nang am o meynakem a tao do Yotay do Yelosaleng am nimanovoy sira so mapatanatanang so nakem da si Ama ta do to a kano Diwey a tao a mangay a tomita si Yowani. Maniring sira jya am, “Sino ka ya.”

²⁰ Maniring jira am, “To ko na macitangayan jinyo am beken a Misayya ko.”

²¹ Maniring sira am, “Si Idiya ka ya an?” Maniring jira si Yowani am, “Beken a yaken nyo ipanci ang.” Maniring sira pa am, “Manngwa, panoyonoywan na imo so ciring ni Ama ta do to a namen nanalahen a mai?” Maniring am, “Beken.”

²² Maniring pa sira am, “Pancyan pa jyamen, sino ka. Ta itovis namen do yanimapahanhan jyamen. Pancyan pala wanjin mo kapwan.”

²³ Maniring si Yowani am, “Yaken o nipanci ni Isayya a omlololos do kabwan no nihakawan no tao. Ta maniring am, ‘Ipeywadwad nyo o Panirsirngen so rarahan na.’ ”

²⁴ Karahan am pacicin da pa si Yowani no nitovoy da no tao a macyagom do Vadisay.

²⁵ Maniring sira am, “Beken a Misayya ka? Beken a si Idiya ka? Beken a panoyonoywan na imo so ciring ni Ama ta do to? Am ikongo mo ipanaktak so tao.”

²⁶ Maniring si Yowani am, “Yako manaktak no ranom. Am amyan so asa ka tao a yamacikaop jinyo a yanyo jyatenngi.

²⁷ Iya rana am manownowji pa a mai ka nyaken. Am tana manownowji pa mai ka nyaken am yabo pacicingayan ko jya.”

²⁸ O vazay rana ya am no keyyan da do katovangan no Yotan a ayo a ili da do Potani. Do dang rana am nipanaktakan ni Yowani.

Katonodan no kagling si Yeso

²⁹ Ikadwa na araw am macita ni Yowani si Yeso a mai. Maniring si Yowani am, “Oya rana am akmey kagling a nitovoy na ni Ama ta do to a omahap so tao do peyraratenan da.

³⁰ Iya rana ya am nipanci ko rana jinyo a manownowji a mai. Am arakorako pa oyowyat na ka nyaken. Ta ji ko pa nimatazak a tao am amyan rana.

³¹ No kakwa am ji ko pa tenngi ori. O yako ipanaktak no ranom sicyaikwaya am ko panopen sira o Isedi a tao a kapakateneng da na jya.”

³² Maniring pa si Yowani am, “Ko nimacita o Seyzi a yakmey hato a yameyhekas do teyrahem a yamangay someyked do kataotao na.

³³ Ji ko a tenngi no kakwa o nitovoy na ni Ama ta do to. Am yamaniring jyaken si Ama ta do to a mapahanhan jyaken a manaktak no ranom am, ‘O macita mo a peyhekasan no Seyzi a tao am iya o manaktak no Seyzi.’

³⁴ Ko na nimacita. Am ori o ko pancyan nya jinyo o na kanoyong a Anak na ni Ama ta do to.”

Ney manma a nimacinanao ji Yeso

³⁵ Ikadwa na araw am mirwa pa mangay si Yowani a kano rarwa ka macinanao jya.

³⁶ Macita na si Yeso a meyhatay am maniring si Yowani am, “Iya rana am akmey kagling ni Ama ta do to.”

³⁷ Mamizing da o ciring eya no rarwa ka macinanao ji Yowani am to sira na macihza ji Yeso.

³⁸ Meyvazingowngaw si Yeso am to na cita o rarwa ka tao a macilolo jya. Maniring jira am, “Ikongo nyo kakzeben.” Maniring sira am, “Do wanjin o vahay mo, mo Lapi.” (O peypeypangayan no Lapi am Mangnanao so tao.)

³⁹ Maniring si Yeso am, “Sijya kamo a kapakateneng nyo jya.” So nipacihza da jya kapakacita da na so yanan na. So nipacisan da jya, ta makoyab rana.

⁴⁰ O rarwa nimacihza ji Yeso a tao am asa ka tao o kakteh na ni Simong Pite a meyngaran si Antele.

⁴¹ So nyangay na ni Antele a mangay komala si Simong. Maniring jya am, “Ko na nimacita o Misayya.” (O peypeypangayan no Misayya am Kizisto.)

⁴² Makarahan am yangay na si Simong ji Yeso. So nisingkadan na jya ni Yeso. Maniring am, “Imo rana mo Simong am anak na imo ni Yowani. O ngaran mo na am si Civa.” (O peypeypangayan no Civa am Pite. O Pite rana am lalitan.)

Rarahen ni Yeso si Veydipo a kani Natannay

⁴³ Ikadwa na araw am naknakmen na ni Yeso o kangay na do Cyadidi. Meyratateng am to na sazi si Veydipo. Maniring jya am, “Macihza ka jyaken.”

⁴⁴ Si Veydipo rana am meyvahay do Peysayta. Macikeylyan ji Antele a kani Pite.

⁴⁵ Makala ni Veydipo si Natannay. Maniring jya am, “Namen rana nimacita o yadomket do iwawalam ni Moyse a kano ciring da no panoyonoywan na so ciring ni Ama ta do to do Seysyo. Ori rana am si Yeso anak ni Yoseyvo a yameyvahay do Nasale a ili.”

⁴⁶ Maniring si Natannay am, “Sino ipanci a kato na ngyanan no meynakem a tao do Nasale.” Maniring si Veydipo am, “Sijya, kacita mo sya.”

⁴⁷ Macita ni Yeso si Natannay mangay jya am maniring jya am, “Yameysinogat ori a Isedi a tao. Yabo do onowned na o yamalahet.”

⁴⁸ Maniring si Natannay ji Yeso am, “Ikongo mo to makatenngi jyaken.” Maniring si Yeso jya am, “No kaji na pa mancyan nimo ni Veydipo am ko na nimacita imo a yamyan do teyrahem no ovako a kayo.”

⁴⁹ Maniring si Natannay am, “Mo Mangnanao, ka manoyong a Anak ni Ama ta do to a Panirsirngen no Isedi a tao.”

⁵⁰ Maniring si Yeso am, “O mo anoyngan jyaken am ko nipanci jimo no kapakacita ko jimo no keyyan mo pa do teyrahem no ovako a kayo? Naknakmen mo no makwa an, ta arakorako pa o yeyyak mo no mata a vazay ko.”

⁵¹ Maniring pa jira si Yeso am, “To ko na macitangayan jinyo am macita nyo na o teyngato a kacyangan a kapakacita nyo na so aro a tinsi ni Ama ta do to a meygegcin jyaken a Nipamnekan na ni Ama ta do to a meysisinaoli sira do teyngato.”