Yake 4 - Seysyo No Tao

Macikasngen ta ji Ama ta do to

¹ Do wanjin na kapwan no yamapeyliliman jinyo. Manngwa, beken a yapo do malas a onowned nyo?

² Nyo ikakza o karo no makadpeh jinyo. Am no yanyo jyahap am nyo naknakmen o nyo kapangap so tao. Yateywara o pangangagoman nyo am nyo kaji makahapan sya. Am ori o nyo ipeygalagalagal. Am o yanyo ji makahapi sya am nyo ji ngamya ji Ama ta do to.

³ No nyo amin ji Ama ta do to am nyo jyahap. Ta yamalas o aktokto nyo. Ta o kataotao nyo o nyo naknakmen.

⁴ To kamo makasi yaomalalas ji Ama ta do to a tao. Ta manngwa, nyo jyatenngi o kapeykavosoyan na si Ama ta do to no meyparai jya so nakem a tao? So ji na alasi no akman sang a tao a mapeykavosoyan si Ama ta do to.

⁵ Ji nyo akwan o kalas na no ciring do Seysyo a manci no kaji na mamyapyan nyaten no Seyzi amyan do onowned ta a mapatarek so iraralay ta.

⁶ Ta arakorako pa o sidongan na jyaten ni Ama ta do to. Ta maniring do Seysyo am, “Ji na nidonga ni Ama ta do to o mapahama so nakem na tao. Apyapyahen na pa sidongen sira o mapaveveh so nakem da tao.”

⁷ Am ori an, onotan nyo ji Ama ta do to. Pasobnan nyo si Satan a kakaro na rana jinyo.

⁸ Macikasngen kamo ji Ama ta do to a kapacikasngen na jinyo. Inyo a yameycyakawad so nakem ji Ama ta do to a tao am ablisan nyo na o malas a onowned nyo a kaji nyo na meylimotngan so onowned.

⁹ Amlavi kamo a meyngen so onowned a komaro do peyraratenan nyo.

¹⁰ Pavevehen nyo o nakem nyo do tangain na ni Ama ta do to. Ta ori o peypakatkatan na so onowned nyo.

Ipaziman so amraherahet so akma ney kakteh do cinai

¹¹ Ji kamo maciraherahet, manga kakteh an. No amyan so tao a amraherahet so kakteh na do cinai am akma ney to rehrehta o Ciriciring na ni Ama ta do to. No rehrehten nyo o Ciriciring na ni Ama ta do to am manoyong o kapasobna nyo ji Ama ta do to.

¹² Si Ama ta do to o manci no apya kano marahet a vazay. So ika iya na no mapacici. Iya o mapatazadang jyaten do teyngato. So ika iya na no mapasingsingkad. Sino ka a yamakadket do akma moy kakteh do cinai a yarehrehten.

Ipaziman so mapazway a tao

¹³ Ala no maniring kamo am, “Mangay ta sicyaraw eya ka simaraw a meyyowyaw do teyhesa ka ili a kapeyyawan ta dang a meyvazay a meynizpi.”

¹⁴ Am to ko na macitangayan jinyo am ji nyo a tenngi o inawan nyo simaraw an. Ta akman kamo so aob a ji meyyahahay a meyyopowpas.

¹⁵ Apyapya o kapanci nyo no, “No si apyahen na ni Ama ta do to a Panirsirngen ta am amyan ta pa a mapeyvazay so makakaday a vazay.”

¹⁶ Am ikeykongo kamo eya a yato mapahama so nakem a ji mangozay do nakenakem na jinyo ni Ama ta do to. O mapazway rana ya am malas ya a vazay.

¹⁷ Am ori an, o tao rana a makateneng do apya vazay a kaji na mapeyvazayan sya am raraten o akman sang.