Yake 2 - Seysyo No Tao

Nanao so mapeycyakaban so tao

¹ Manga kakteh, no kamo manoyong a yamraralay ni Yeso Kizisto a yatey mazway a Panirsirngen ta am taosya o kapeycyakaban nyo so tao.

² No amyan so meynakem a tao a meygagaling so ovay a meyyayob so apipiya ayob a makaranes do panaralayan nyo a kai no makasi a tao a mapisipising so ayob am

³ no si teywara o anyanig mo so apiya so ayob a tao a manci no, “Lisna do jya, mo keypong,” a kapanci mo nya do makasi a tao so, “Kangay mo do kwang a amlisna.”

⁴ No si makman kamo sang am malas o nakenakem nyo, do kapeycyakaban nyo so tao.

⁵ Amizngen nyo manga keypong an. Na nitenngan ni Ama ta do to sira o makasi a tao do karawan a makdeng so nakem a omraralay nya. So da ikanoyong a makahap so nakem na sira ni Ama ta do to a macikaop rana do italamozong na.

⁶ Am inyo rana am nyo panyanigen sira o yamakasi a tao. Am o yamapasnesnek jinyo a yamangay ninyo do pacicicyan am sira o katenngan a tao a yaro so nizpi.

⁷ Sira rana o katenngan a tao a aro so nizpi am da rehrehten o mazway a ngaran ni Yeso Kizisto a nyo pacingaranan.

⁸ No si manoyong kamo a mangozay do ciring do Seysyo am, “To mo mangozai o aryarilaw mo so kataotao mo a marilaw no icyatatao mo.” Ta ori rana am ney makdeng na a iwawalam na ni Ama ta do to. No si peyvazain nyo ori am manoyong kamo na so ahahapan sya.

⁹ Am no si mapeycyakaban kamo so tao am raraten nyo ori. So ikanoyong nyo a pazasingen no iwawalam na ni Ama ta do to do meyraraten a tao.

¹⁰ Tana asa nipasobnan no tao do iwawalam am akma ney to zagoma o iwawalam a nipasobnan.

¹¹ Ta o yamanci no kaji mapasagpyanan so kataotao am ipanci na o kaji mangapan so tao. Tana ji ka mangap so tao a kasagpyan mo so aktokto am pavilangen na imo a meyraraten a mapasobna do iwawalam na ni Ama ta do to.

¹² Am ori an, apzatan ta do ciring ta kano icicirawat ta. Ta katenngan ta o kapacici na jyaten ni Ama ta do to. Am cyaha, ji ta nyaheyan, ta onotan ta o Ciriciring na ni Ama ta do to a yamapahawa jyaten do peyraratenan ta.

¹³ Ta no mapacici si Ama ta do to am ji na arilawan sira o ji mangarilaw a tao. Ta o mangarilaw so icyatatao na o avyain na. So ikabo no ikanyahey da no mangarilaw a tao do tangain na ni Ama ta do to.

Apya vazay a kano nakenakem si Ama ta do to

¹⁴ Manga kakteh, no myan so tao a manci no kakdeng na so nakem ji Ama ta do to a kaji na mapatwawan sya do icicirawat na am ikongo peypeypangayan no akman sang so nakem ji Ama ta do to. Manngwa, ikavyay no pahad na o akman sang?

¹⁵ No myan jinyo so akma nyoy kakteh do cinai a ji makarapya do kanen da abo so ayob am,

¹⁶ manngwa, kasirisiring nyo sira a manci no, “Makapiya kamo so kataotao. Inaoy si mabsoy kamo. Inaoy si myan so ayob nyo,” kwan nyo a abo so isidong sira am ikongo ayyaingan no akman sang.

¹⁷ Akman sang o nakenakem ta si Ama ta do to. Ta no ji ta patwawa do icicirawat ta am akmey ji ta manaralay a tao.

¹⁸ Ala no maniring o tatasa ka tao am, “Imo am ka makdeng so nakenakem ji Ama ta do to. Yaken am yako apiya so vazay.” No si maniring ko am, “Pacittan pala jyaken o nakenakem mo si Ama ta do to. Am yaken am to mo na cita do apya vazay ko. Ta ori o ipakateneng mo do nakenakem ko si Ama ta do to.”

¹⁹ Apya o kanoyong ta ji Ama ta do to a abo so ikararwa. Am ji pa makanet o akman sang. Ta tana o kalamsoyan ni Satan am anoyngan da o keyyan na ni Ama ta do to. Am kazikzik da a manyahey nya.

²⁰ Nyo jyatenngi o kabo no peypeypangayan no ji mangononong do nakenakem na ji Ama ta do to?

²¹ Nimakongo si Apolahan a ineynapo ta kabnek na sya ni Ama ta do to a abo so raraten do tangain na. Manngwa, yaji monganay do kaniomonot na ji Ama ta do to a nitomoro no anak na a meyngaran so Isa?

²² Si Apolahan rana am no mangay o kapeyhanhan na ni Ama ta do to am mangay o kapatwaw na sya do vazay na.

²³ Nimangononong rana o ciring eya, ta maniring do Seysyo am, “Nipeyhanhan na ni Apolahan si Ama ta do to. Am ori o nibnekan na sya ni Ama ta do to a abo so raraten do tangain na” a akma ney kagagan.

²⁴ Am ori an, o abnekan na jyaten a abo so raraten ta do tangain na ni Ama ta do to am omagaz do kapatwaw ta sya do icicirawat ta. So ji na veyvowi no nakenakem ta sya, ta pazagomen ta o kapeyvazay ta sya.

²⁵ Akman sang si Laha a nisomagpyan a mavakes. O nibnekan na sya abo so raraten do tangain na ni Ama ta do to am nitaotao na o nitovoy da no tao do Yotay a mangamizing a kasidong na pa sira mapasala so angayan da rarahan a tomayo no omwakwak sira tao.

²⁶ Akman so kataotao ta. Ta no ji rana ngineynawa o tao am mawakwak o akman sang. Akman sang o nakenakem ta ji Ama ta do to. Ta no ji peyvazaya am abo o peypeypangayan no akman sang.