Yake 1 - Seysyo No Tao

¹ Yaken rana am si Yake ko a lamlamsoy na ni Ama ta do to a kani Yeso Kizisto a Panirsirngen ta. Yako ipeyminaminasi o yamavonong do peycyavanovanwan na a yamraralay ni Ama ta do to a tao.

To ngotokot so nakem

² Manga kakteh, tana amyan so alalaw a mangay jinyo am somaray kamo an.

³ Ta no myan so alalaw nyo a kaji nyo rana ablisan so onowned ji Ama ta do to am ji nyo na nyaheyan o meyteytotoro a alalaw nyo. Ta mapeyneynara nyo na.

⁴ Manakem nyo o kato nyo nazibwan no alalaw nyo. Ta ori o ikanoyong nyo a meypahagnat so nakenakem a abo so karatan.

⁵ No amyan jinyo so makza no karapa do teneteneng na am makowyowyat pa mapasyasi ji Ama ta do to a kapanta na nya ni Ama ta do to so teneng na. Ta iya rana am tey mazonos a apiya so nakenakem a marilaw no mapasyasi jya tao.

⁶ Am no meynozi kamo am to kamo ngotokot so onowned an. Ta o ji ngotokot so nakem a tao am akman so azda a ji meyhanahanang a pavyovyoten no pagpag.

^7-8 O tao a ji ngotokot so nakem ji Ama ta do to am ji na tenngi o manoyong a zokzokan no nakenakem na. Ta abo mapsek a pamnekan na. O akman sang a tao am ji na ngakzeba o keyyan no mahap na ji Ama ta do to.

Makcin a kano mabsoy

⁹ Tana abo o peymeymasaodan no manaralay a tao am somaray, ta sidongen na ni Ama ta do to.

¹⁰ Akman sang ahan. No akasen na ni Ama ta do to o peymeymasaodan da no omraralay nya tao am isaray da o akman sang an. Ta o peymeymasaodan no tao am akman so savong no tamek a mahayo a mababalinas.

¹¹ No domada o araw a kazidangdang no sinazawsaw na am ji meyyahahay a mahayo. Akman sang o meynakem a tao, ta makeykai a mababalinas.

To nazibo no alalaw

¹² No amyan so alalaw a kajyablisan so nakenakem ji Ama ta do to am tey masaray o akman sang a tao. Ta no jyablis o nakem na am mahap na o to meyyonong a ikavyay no pahad na a nakem na sira ni Ama ta do to so amraralay nya tao.

Kalittan so onowned

¹³ No myan so tao a kalittan so nakenakem am ji na to patolina ji Ama ta do to amlita jya a meyraraten. Ta si Ama ta do to am abo makalita jya. Iya am ji manlita so tao.

¹⁴ O kalittan a tao am littan no marahet a ikeykakza na do onowned na.

¹⁵ No amlida do onowned na o marahet a ikeykakza na am meytotwaw rana o raraten na. Ori rana am yapwan no kangay na do makotokotod a lila no apoy a mangay do kaidan no karawan.

¹⁶ Manga kakteh, naknakmen nyo an.

¹⁷ O makakaday a yatey pipya a vazay am yamamimin a yapo ji Ama ta do to a yanimangamaog so araw a kano vehan a kano mata no hanit. Iya rana am jyabliblis so pamnemnekan.

¹⁸ Na to mangozai o nakem na a manci nyaten akma ney anak. Ta yaten rana am ipeyhanhan ta o manoyong a nanao na. Am ori o yata iyan do ney manokdwan na do makakaday a nyamamaog na.

Patwawen ta do icicirawat ta o nimamizing ta

¹⁹ Manga kakteh, no mangamizing kamo so ciring no tao am taosya o kato nyo maciogtwan do ciring da jinyo. Ji kamo to meyoyaoya.

²⁰ No meyoyaoya o tao am ji na rana tenngi a peyvazain o apya vazay a isaray na ni Ama ta do to.

²¹ Am ori an, vonasan nyo so marahet a nakenakem nyo a kano marahet a icicirawat nyo a omonot ji Ama ta do to a omahap so ciriciring na a na akmey nipamowa do onowned nyo a mapatazadang jinyo do teyngato.

²² Taosya o kamizing so ciriciring na ni Ama ta do to a ji peyvazaya. Ta o akman rana sang am alalasan o kataotao.

²³ O kamizing sya a ji mapeyvazay sya am akman so tao a tomita so avwavong na do kagami,

²⁴ a makapengkad so lolit no moing na, kato na rana angayan, ji na rana nakem o kapeyramon na.

²⁵ Am beken a kamizing ta so Ciriciring na ni Ama ta do to. Ta peyvazain ta o nimamizing ta a Ciriciring na a yamapahawa jyaten do peyraratenan ta. Ta o manoyong a mangozay jya tao am isaray na ni Ama ta do to o akman sang.

²⁶ No myan so tao a mapakakdekdeng so nakem ji Ama ta do to a kaji na amzatan do ciring na am alalasan na o kataotao na. So ikabo no peypeypangayan na no kararalay na ni Ama ta do to.

²⁷ O ipanci na ni Ama ta do to a manoyong a omraralay nya tao am ji manginanahet do nimasbang a kano vao a mavakes a makapzat do onowned na, ji macikza do tao do karawan a meyraraten.