Veydipi 4 - Seysyo No Tao

Ipanvavaga na ni Pawlo

¹ Am ori o ikakdeng nyo pa so onowned a meyhanhan ni Ama ta do to, manga keypong an. So ko sarayan ninyo a akma koy kakteh do cinai. Ta yamyan so kakownongan na no vazay ko jinyo. Inaoy no si macita ko pa inyo.

² Inyo rana yararwa akma nameney kakteh do cinai a mavakes a meyngaran so Yoati a kani Sentihe am to nyo peykabobwa o raraten nyo do kadwan jinyo.

³ Imo rana mo kahakay a kararay ko am sidongen mo sira an. Ta sira rana am mina kararay ko a kani Kedimong a kano kadwan jyamen. Sira ori o nimahap so vazay na ni Ama ta do to. Ta sira rana am yana domket o ngaran da do vakong na ni Ama ta do to a yamanoyong a makahap rana so to meyyonong a ikavyay no pahad da.

⁴ Mangday kamo do araraw a somaray a yamacikaop ji Yeso. So papirwan ko pa sya ipanci jinyo an. Somaray kamo an.

⁵ Manakem nyo o kapangarilaw nyo so tao an. Ta yana makeykai si Yeso a yamai.

⁶ Ji nyo a ratan o makakaday a vazay nyo an. Ta ipanci nyo do inozi nyo o kakzeben nyo ji Ama ta do to a kasaray nyo so onowned a mapasyasi jya an.

⁷ Ta itoro na jinyo o ikapiya no onowned nyo a ji da tenngi no karwan no tao. Mangay na irapa do nakenakem nyo do nyo kararalay ni Yeso Kizisto.

⁸ Am ori manga keypong an, ahapan nyo so apipiya vazay a isaray na ni Ama ta do to a kano ji meypareki so onowned a kano tey mazway a vazay. O akman rana sang am peyyanen nyo do onowned nyo a patwawen do icicirawat nyo.

⁹ O nimamizing nyo a kano nimacita nyo a icicirawat ko am miminen nyo a peyvazain an. Ta ori o ipacitovong na jinyo no yamanta nyaten so ikapiya no onowned ta a si Ama ta do to.

Sarasaray na

¹⁰ Ko masaray do ko kararalay ni Yeso. Ta yapa mirwa o nakenakem nyo a yasomidong jyaken. So ko ipakateneng jinyo a yamasangib a yamnakenakem jyaken. Am na kabo no tao a yanyo pararan so aryarilaw nyo jyaken.

¹¹ O ko peycirngan so sang am beken a nyo kaji mapanadnadan jyaken. Ta ko rana mapeyneynara no abo o amyan do kataotao.

¹² Nimasapa ko rana o kakcinan ko, kabsoyan ko. Tana mabsoy ko a tana makcin ko a tana abo o kalahen ko am amyan rana so ko peyneynaran sya.

¹³ Ta si Yeso Kizisto a yaomoyat jyaken am ori o ko ipakownong do ko ahahapan sya, do yameycyataretarek a ko masapa.

¹⁴ Am tey yapya o nisidongan nyo jyaken do alalaw ko.

¹⁵ Naknakmen nyo a tao do Veydipi an. No ka ori pa so kapeylimwang ko no Mapasaray a Ciriciring am karwan ko o pongso do Maciton. No kano nang am sinjya nyo o nisomidong jyaken a mapatodeh jyaken.

¹⁶ No keyyan ko pa do Tesalonicya am beken a ipisa kamo a nisomidong jyaken.

¹⁷ Ji ko ngakzeba o kazaw nyo jyaken. Ta tey kakza ko ji Ama ta do to o karwaro na pa no isidong na jinyo do kapiya no nakenakem nyo jyaken.

¹⁸ O nyo nyazaw jyaken a apzapzatan am ko na nimamimin a yanimahap. So ko to meypanpani jya. Si Ipaloti a akma tey kakteh am ori o yanimai no aro a azaw ko. So na sarayan nya ni Ama ta do to so akma nyoy nakem jya.

¹⁹ Si Ama ta do to o tomoro no makakaday a apyahen nyo no nakem, ta kamo na macikaop ji Yeso Kizisto. Ta ji nyo a giji o kangangay na ni Ama ta do to a itoro na jinyo.

²⁰ Inaoy no azwazwain ta si Ama ta do to a mangay do kaidan no karawan. Amin.

Ney manowji rana aryarilaw na sira

²¹ Ipeyminaminasi nyo sira o akma tey kakteh do cinai a yamraralay ni Yeso Kizisto. Akman sang sira o kararay ko a meyminaminasi ninyo.

²² Sira mamimin o sinjya do jya kano tao do vahay na ni Kaysa a yameyminaminasi ninyo.

²³ Inaoy no itoro na ni Yeso Kizisto a Panirsirngen ta o pangangarilawan na jinyo.