Veydipi 3 - Seysyo No Tao

Abo so raraten a tao do tangain na ni Ama ta do to

¹ O ney manowji a ciring ko jinyo akma koy kakteh do cinai am somaray kamo, ta kamo macikaop rana ji Kizisto. So yako papirwan pa so mina ciring ko jinyo no kakwa pa. Ta beken a ikarahet nyo, ta ipeypapya nyo ori.

² Azimanen nyo sira o meyraraten a tao a omalalas do nanao na ni Ama ta do to. Sira rana am tao do Yotay a yamanci no kayongkad do kataotao.

³ Ta yaten rana am manoyong a niyongkadan na rana ni Ama ta do to, do kasidong na jyaten no Seyzi a yamraralay ni Ama ta do to. So ta ji mangozai do makakaday a iwawalam da no tao do Yotay a mapeypapya jyaten do tangain na ni Ama ta do to, ta si Yeso Kizisto o ozain ta. Am ori o yata ikasaray rana a yamacikaop jya.

⁴ No myan so tao a manci no kapeypapya na no apya vazay na do tangain na ni Ama ta do to am apyapya ko pa manci no akman so sang.

⁵ Kawao araw ko pa nimatazak a tao am niyongkadan da na yaken no iweywawalam ta. Ta manoyong ko a Isedi a tao a macitetngehan ji Penyaming. So ikanoyong ko a macikownongan do Sipolay a tao. No hapen ta do iwawalam ta tao do Yotay am makdekdeng ko pa a mangozay jya, do kapacitetngehan ko do tao a macyagom do Vadisay.

⁶ No hapen ta do kakdekdeng ta no onowned am nimacivosoy ko rana do niomanoyong ji Yeso a tao. Am no si pangozayan ta o iwawalam na ni Moyse a cittan ta so kapyapya ta am jyabo karatan ko a.

⁷ Am o ipanci ko no kakwa apiya am ko rana nilikodan a ko kararalay ni Kizisto sicyaikwaya.

⁸ Beken a ori an. Ta yamaharahara rana o nakem ko ji Yeso Kizisto sicyararalay ko na nya. Yako ipanci o makakaday a vazay a yabwata so angangayan, do yako kapyapya pa so ko kapakateneng ji Kizisto a Panirsirngen ko.

⁹ Ko manoyong a yamacikaop jya. So ko na peymakarwan do mina vazay ko no kakwa. So ikanoyong ko na abo so karatan do tangain na ni Ama ta do to. O yako icyakman sang am ko ipeyhanhan si Kizisto. Beken a ko kahap so iwawalam na ni Moyse. Ta yamanoyong ya nitoro ni Ama ta do to o ikapya ko do tangain na.

¹⁰ Am ori o ko naknakman so ko kapakateneng ji Kizisto a kano arako a oyowyat na jyaken. Ta iya rana am tey mowyat, ta nimirwa a mavyay. Yako ikakza o ko kapacizanod jya so alalaw, akman sya ji rahet so kawakwak na.

¹¹ Inaoy no si akman ko sang a mavyay a apo do heseb ko no makwa.

¹² O ko peycirngan sang am beken a ko rana nimimin a yamahap o yamakakaday a yamyan ji Ama ta do to. So ko ikakdekdeng pa yaominara si Yeso Kizisto do na katalamozong nyaken.

¹³ Manga kakteh, ko ji naknakma o ko kanimakahap rana so sang. Ta yasa ka vazay o ko naknakmen. Ko na ji paolya o mata ko do mina vazay ko no kakwa. Ta ko na naknakmen o yako kahap so yaomanam a vazay.

¹⁴ Am ori o ko icyakmey malayo a tao a yasomazap so ko angayan, do ko kanakenakem so ko kapakahap so azaw ko ji Ama ta do to a to meyyonong a ikavyay no pahad. Ori rana am nipamnekan na yaken ni Ama ta do to a omanoyong ji Yeso Kizisto a kapakahap ko na sang.

¹⁵ Am ori o ikamimin ta yamakdeng so nakenakem ji Ama ta do to a makateneng do akman sang an. No si macitarek o nakenakem nyo am cyaha, ta si Ama ta do to o mapananao nya jinyo.

¹⁶ Am ji ta ablis so nakenakem a mangozay do manoyong a nanao a nimamizing ta.

¹⁷ Inarahen nyo yaken, manga kakteh an. Panginginaran nyo sira o yaominara jyamen a tao an, ta yanamen rana nipacita jinyo o manoyong a icicirawat namen.

¹⁸ Beken a ko ipisa inyo a yavavagan. So ko to lavii a yamapamizing jinyo an. O icicirawat da no aro a tao am yamacisala ji Kizisto a nimawakwak do jyojika. So da ikanoyong a akmey mapeykavosoyan si Yeso.

¹⁹ O mapeyvazay so sang a tao am mangay sira do kararatan. Ta o isovo da kanen o da naknakmen. Da azwazwain o yamacimanig a vazay. Da ji ngawawan o kasasaodan da do karawan.

²⁰ Am yaten rana am italamozong na yaten ni Ama ta do to. So pananalan ta si Yeso Kizisto a Panirsirngen ta a meygegcin a apo do teyngato. Ta iya o mapatazadang jyaten do teyngato.

²¹ Pangozayan na do oyowyat na ipanod na so makakaday do sinokob no hanit a iblis na so kataotao ta do karawan. So icyakman takamo so kataotao na ni Yeso a maniray a ji rana wakwak.