Veydipi 2 - Seysyo No Tao

Inarahen ta si Yeso Kizisto a mapehbo so kataotao na

¹ Manngwa, yanikarapa do onowned nyo o yanyo ipacikaop rana ji Kizisto an? Manngwa, yanikait jinyo o pangangarilawan na an? Manngwa, nyo katenngan o Seyzi a yasomidong jinyo an? Manngwa, nyo ikarilaw o kadwan jinyo an?

² No kamo nimeypahagnat am ko kakzeben inyo akmey yasa so anodan a kano pangangarilawan a kano nakenakem. Ta ori o ikanoyong ko na a somaray so onowned.

³ Ji nyo pakaranga o nakenakem nyo an. Ji nyo akzan o keynakem nyo a tao an. Ikanig nyo o kadwan jinyo an. Naknakmen nyo o keyyan no tao a apyapya pa ka ninyo an.

⁴ Beken a o kataotao mo o manakem mo an. Ta manakem mo o kapanidong mo so icyatatao mo an.

⁵ Inarahen nyo si Yeso Kizisto an.

⁶ Ta si Yeso rana am Tao do to. Am na jyangai no nakem o kapeyyangay da kani Ama na a Tao do to.

⁷ Ta iya rana am na nipaveveh o na nyahapan sya a na kapyapya pa so na kakmey lamlamsoy a nimalikey a tao. So na icyakman jyaten a tao do karawan so kataotao.

⁸ Na pavevehen o kataotao na a omamizing si Ama na a mahap so vazay ni Ama na a mangay a mawakwak do jyojika.

⁹ Am ori an, nyazwazway na ni Ama ta do to si Yeso a kapanta na nya so ney mazway a ngaran na. O nitoro na jya a ngaran na am Panirsirngen.

¹⁰ Ori an, tana do teyngato a tana do teyrahem a tana mavyay a tao a tana nimawakwak rana am abwata o ji meylilitod do tangain na,

¹¹ a manci ni Yeso Kizisto a Panirsirngen. So ikanoyong no azwazway a mangay ji Ama ta do to.

Akma kamoy zezak no tao do karawan

¹² Manga kakteh, no kapacikaop ko pa jinyo am masangib kamo a omamizing jyaken. Am ori o ikakdekdeng nyo pa omahap so ciring ko do ikabo ko jinyo do dang an. Makapzat kamo an. Makowyowyat kamo a mahap so vazay na ni Ama ta do to. Ta ori rana am manoyong a vazay no nimamlis so nakenakem a tao.

¹³ Ta yameyvazay do onowned nyo si Ama ta do to. So ikasasaray nyo a mapeyvazay so kakdain na jinyo ni Ama ta do to.

¹⁴ O makakaday a vazay nyo am ji nyo a ratan. Ji nyo a zyakan.

¹⁵ So nyo ji meylimotengi so onowned a abo so karatan a akma ney anak ni Ama ta do to a yamacikaop do meyraraten a tao do karawan. Ta inyo rana am akma kamoy zezak da, akman so mata no hanit a amzezak so kasarisaryan,

¹⁶ a kapakateneng da do ciriciring na ni Ama ta do to a manta nira so to meyyonong a ikavyay no pahad da. Ta no si akman kamo sang am amyan rana so kakownongan no zikzikna ko jinyo no si marateng o araraw no yai na ni Kizisto.

¹⁷ O raralayan nyo ni Ama ta do to am akmey nakem nyo a patanangen nyo jya. Tana wakwaken da rana yaken a pavoyogen so rala am cyaha, ta akmey nakem ko rana ori a patanangen ko ji Ama ta do to. So ko isaray, ta macizanod kamo jyaken a somaray.

¹⁸ Akman kamo sang an. No somaray kamo am manakem nyo yaken a macizanod jinyo a somaray an.

Si Timotay a kani Ipaloti

¹⁹ No si apyahen na ni Yeso a Panirsirngen ta am makeykai ko a tovoin si Timotay a mangay jinyo do dang. So ipakateneng ko do vazay nyo do dang.

²⁰ Ta iya ori o yamacizanod jyaken so onowned a yamanoyong a yamarilaw ninyo.

²¹ O karwan no tao am o kataotao da o da naknakmen. Da jyanakem o vazay na ni Yeso Kizisto.

²² Nyo katenngan o mina vazay na ni Timotay. Ta yanamen akmey meyyama a yamazikna a yameylimwang no Mapasaray a Ciriciring.

²³ No si katenngan ko o araraw na no ipakowbot ko do pamemtengan eya am makeykai ko a tovoin si Timotay a mangay a tomita jinyo.

²⁴ Ko anoyngan si Ama ta do to a makeykai rana tomovoy jyaken a mangay a tomita jinyo.

²⁵ Ko naknakmen o katovoy ko so akma tey kakteh do cinai a si Ipaloti a mangay jinyo do dang. Ta iya rana am arako o nisidongan na jyaken do kanitomovoy nyo sya jyaken, do katey mowyat na a macipeyvazay jyaken.

²⁶ Yateywara o apapaw na jinyo. Na ikarahet no onowned o nyo kapakamizing sya yameyngen so kataotao.

²⁷ Manoyong o kanimeyngen na a toda jyangay so inawan. Am mina kasi na nyamen ni Ama ta do to. So ji ko nimazababi nya no onowned.

²⁸ Am ori o ko naknakman so kakeykai ko rana tomovoy sya do vahay da. So ikasasaray nyo a macikaop rana jya. So ikapyapya na rana no akman sang.

²⁹ Am ori an, isaray nyo a tomaotao sya, do nyo kakmey meyketeketeh do cinai. So kanigan nyo no akman sang a tao an.

³⁰ Ta na kajyawakwakan rana, do yana kahap so vazay ni Kizisto a kano vazay nyo a yasomidong jyaken.