Veydipi 1 - Seysyo No Tao

¹ Yaken rana am si Pawlo ko a kani Timotay a lamlamsoy na ni Yeso Kizisto. Namen ipeyteygami inyo a yameyili do Veydipi a yamraralay ni Ama ta do to a yaomanoyong ji Yeso Kizisto a ka ninyo a panipanirsirngen do kyokay.

² Inaoy no si itoro na jinyo ni Ama ta do to a kani Yeso Kizisto a Panirsirngen ta o pangangarilawan na kano ikapiya no onowned nyo.

Ipeynozi na sira ni Pawlo o omvilang do teygami na

³ No ko manakem inyo am ko isaray inyo ji Ama ta do to.

⁴ Yako masaray so onowned a meynozi ninyo.

⁵ Ta nimeycicinda no kakwa na kai sicyaikwaya o yanyo sidongan jyaken a yameylimwang no Mapasaray a Ciriciring na ni Ama ta do to.

⁶ Ko anoyngan o na kapeyvazay do onowned nyo ni Ama ta do to icyakma ney kanapnapan a ovid. Jyabo kakavos no nya vazay na jinyo a mangay no si komavos o akman sya no si ipirwa pa mai si Yeso Kizisto.

⁷ Manoyong o kapaw ko ninyo. Ta tana ko na myan do pamemtengan sicyaikwaya, tana no kasaliway ko pa a macinekanekad no manoyong a Mapasaray a Ciriciring na ni Ama ta do to am yabo nyo jya nisidongan jyaken a mahap so vazay na ni Ama ta do to.

⁸ Katenngan na ni Ama ta do to o karilaw ko ninyo no pangangarilawan na ni Yeso Kizisto do kapaw ko ninyo. So ikanoyong no nya ciring.

⁹ O ko peynozyan ninyo am kaji na meypahahayan no pangangarilawan nyo a meypahagnat. Akman sang o teneteneng nyo a makapatak no makakaday a vazay.

¹⁰ So ipakateneng nyo rana do ney yapiya na vazay. No si makman kamo sang am manoyong kamo na a ji meylimoteng so onowned a abo so karatan do araraw no ipirwa na mai ni Kizisto.

¹¹ So ikasasaray nyo a mapeyvazay so apiya vazay do kowyat na jinyo ni Yeso Kizisto. Ta si makman kamo sang am azwazwain da rana si Ama ta do to no aro a tao.

Ahapen o vazay ni Kizisto

¹² Manga kakteh, ko kakdain inyo a makateneng jyaken a yamyan do pamemtengan. Cyaha, ta na ikapyapya a yasomidong jyaken a meylimwang no Mapasaray a Ciriciring na ni Ama ta do to.

¹³ Am ori o da ikaro no mamzat a tao do vahay no panirsirngen eya kano aro a tao do jya do Loma a yamamimin a yamakateneng jyaken a nipteng da do kahap ko so vazay na ni Yeso.

¹⁴ Ta yada ikowyowyat so nakenakem ji Ama ta do to no akma tey kakteh do cinai a yajyanyahey a meylimwang no ciriciring na ni Ama ta do to.

¹⁵ Manoyong o keyyan no tatasa ka tao a manginanahet a meynenenet a meylimwang no ciriciring na ni Kizisto. Am amyan so tatasa ka tao a apiya so nakenakem a meylimwang nya.

¹⁶ Sira rana ya am sira mamimin a yamarilaw nyaken a yamakateneng jyaken a yana nipamnekan ni Ama ta do to a yamacinekanekad no Mapasaray a Ciriciring na.

¹⁷ Am o yatatasa ka tao a yameylimwang ni Kizisto am yasomala o onowned da. Yada naknakmen o yada karapa do alalaw ko, do yako iyan do pamemtengan eya.

¹⁸ Am cinakongo na. Tana somala rana o onowned da am cyaha, ta si Kizisto o ipeylimwang da. Am ori o sarayan ko nya sicyaikwaya mangay no makwa.

¹⁹ Ta katenngan ko o kapakowbot da jyaken, do peynozyan nyo nyaken a kano sidongan na jyaken no Seyzi a nitovoy na jinyo ni Yeso Kizisto.

²⁰ Ko ipeyhanhan si Ama ta do to a somidong jyaken a mapeyvazay so isaray na vazay. Tana sicyaikwaya kano kakwa am meyyangay o kaji ko anyaheyan. Tana mavyay ko a tana mawakwak ko am jyabo kaji ko azwazwayan si Kizisto do kataotao ko a.

²¹ Ta o ko ikakman sang no nakenakem am si Yeso Kizisto o ney makdeng na a yako naknakmen. Si mawakwak ko am apyapya pa, ta ahapen na yaken a mangay a macitovong jya.

²² Am no si mavyay ko pa am apiya pa, ta makapeyvazay ko pa. Am ko jyatenngi sicyaikwaya o ko pamnekan.

²³ Ko ikakza o ko kakaro rana do karawan a mangay a macilovot rana ji Kizisto. Ta abo rana o apyapyan pa kano nang.

²⁴ Am ko kapakanakem jinyo a yamakdekdeng pa a yako sidongen.

²⁵ Katenngan ko o kasidong ko jinyo. So ikanoyong nyo a ikataid ko do karawan a peypakatkaten so nakenakem a kano pasarain so onowned.

²⁶ Am ori an, no si mangay ko pa jinyo do dang am jyabo kaji na rakorakwan pa no sarasaray nyo ji Yeso Kizisto, do kanisomidong na jyaken a meysinaoli pa jinyo.

²⁷ O ahahapan nyo so onowned nyo do araraw am pehngehngain nyo do Mapasaray a Ciriciring na ni Kizisto an. Tana ji ko angay a tomita jinyo a kapakamizing ko jinyo a akmey asa so pangtoktwan a kano onowned a mowyat a meylimwang no Mapasaray a Ciriciring,

²⁸ a jyanyahey no macioya jinyo a tao. No si akman kamo sang am yongkad na no kapeygegcin na jira no peyoyaoyyan na ni Ama ta do to a keyyan na no to meyyonong a ikavyay no pahad nyo.

²⁹ O na nipamnekan jinyo am beken a nyo kanoyong ji Kizisto an, ta ahapen nyo o alalaw na a mahap so vazay na,

³⁰ akman so nimacita nyo rana do kataotao ko a kano nimamizing nyo. So yana to ngaii sicyaikwaya.