Tito 3 - Seysyo No Tao

Icicirawat no amraralay ni Yeso a tao

¹ Pazimanen mo jira o kownot da do vazay no makayokod nira tao. Amizngen da o pipya vazay a ipanci da.

² Vavagan mo sira ji manamwad so icyatatao da, kaji da macivaivaitan. Manganyanig sira so tao. Ji sira mapahama so nakem do icyatatao da.

³ Yaten rana no kakwa pa am abwata o katatenngan ta a ji mangamizing a akmey mavozaw pa so aktokto a to mangozangozay do onowned ta a makza no meycyamadadayan do karawan. So ikanoyong ta amyan pa do peyraratenan ta kano panginanehtan ta kano pasikaokaoyyan ta.

⁴ O ipakateneng ta do pangangarilawan na kano pangangasyan na ni Ama ta do to am

⁵ na patazadangen yaten do teyngato, do na karilaw nyaten. So ikabeken na omaing do apya icicirawat ta. O Seyzi na ni Ama ta do to am ori o nikaro ta do raraten ta. So icyakma tey nimalikey a avayo rana so aktokto. So iyan na rana jyaten no to meyyonong a ikavyay no pahad ta.

⁶ Si Yeso Kizisto am nimawakwak no raraten ta. Am ori o ji na ingbeywani do Seyzi a itoro na jyaten ni Ama ta do to.

⁷ O pangangarilawan na ni Ama ta do to am ori o ikapya ta na so nakenakem jya, ta abwata rana o raraten ta do tangain na. So ikanoyong ta mapananala so kapakahap ta rana so to meyyonong a ikavyay no pahad ta.

⁸ So ikabo no kalalasan no ciriciring eya. Pakanakmen mo a ipanci jira oya an, a kowyat da no amraralay ni Ama ta do to a tao a meyvazay so apiya vazay. Ta o akman rana sya vazay am tey yapya a makasidong so tao.

⁹ Am ji mo pasngena o kapacinekanekad da a macivaivait no iwawalam na ni Moyse a kano katatapilan nyo. Ta o akman rana sang am abo o peypeypangayan no akman sang.

¹⁰ O yapwan no ipeygalagal a ipeyvwak da no sinjya a tao am ipidwa nyo sira pazimanen. No mirwa pa sira am to nyo na ngaroi sira.

¹¹ Katenngan nyo an, ta o akman rana sang a tao am peymakarwan da o nanao na ni Ama ta do to. O yongkad no kalasan da am raraten da.

Ney manowji na ciring

¹² Ko naknakmen a tovoin si Atema no beken a si Ticiko a mangay jimo do dang. So ji mo meypahahai a mangay do Nikepodi a mapananala jyaken. Ta nipamnekan ko na o kato ko ngyanan do dang sicyamyan eya.

¹³ Sidongen mo o mapacicici a tao a meyngaran si Sena kani Apolo a yaomavat do da kapangilili. So ikabo no kahamangan da palolwen.

¹⁴ Ipanci mo do kakteh ta do cinai o kowyat da omhakakaw a amyaw no velek da a kasidong da so makasi a tao. Ji da nginara o to meyyowyaw a abwata so angangayan a tao.

¹⁵ Da ipeyminaminasi imo no kararay ko do jya. Ipanci mo do akma tey kakteh do cinai a yamanaralay ni Yeso, ta namen ipeyminaminasi sira. Inaoy no si itoro na ni Ama ta do to o pangangarilawan na jinyo.