Tito 2 - Seysyo No Tao

Ipanvavaga so amraralay ni Yeso a tao

¹ Am imo rana am ji mo palasa o ipanvavaga mo so amraralay ni Yeso a tao an. Ta to mo mangozai o manoyong a nanao na ni Ama ta do to.

² Vavagan mo sira o rarakeh a mahakay, ta apzatan da o onowned da an. Ji da pasala o nakenakem da ji Ama ta do to an. Ji sira hayo so nakenakem ji Ama ta do to. Ta naknakmen da o pangarilawan da so icyatatao da a kato da peykabobwan so alalaw da.

³ Vavagan mo sira o rarakeh a mavakes a kapiya da so nakenakem. Ji sira manamwad. Ji da macikeyyani o saki. Ta naknakmen da o kapeycitacita da jira no malalavayo a mavavakes.

⁴ Nanawen da sira o malalavayo a mavavakes a marilaw no kahanghangan da kano ananak da.

⁵ Apzatan da o kataotao da a kateneng da meyvazay do kavavahay da apya so nakenakem a ji mapasobna do kahanghangan da. Ta ori o ji da rehrehci sya no tao so nanao na ni Ama ta do to.

⁶ Akman sang, ta vavagan mo sira o malalavayo a mahakay a amzat do kataotao da.

⁷ Imo rana am tana makakaday o vazay mo am ji ka rahet so icicirawat an. Ta manakem mo o kapeycitacita da jimo no tao. Makapiya ka so nakenakem a omnanao sira an.

⁸ Ji mo palasa o ciring mo. Ta ori o ji da namwaji jimo no tao. No si makman ka sang am ji sira todasnek rana o macioya jyaten a tao a ji makakala so karatan ta, do kabo no kalalasan ta.

⁹ Nanawen mo sira o peylamlamsoin da tao, kownot da do ciriciring no peyvazayan da tao. Ji sira mapatongtonggalan, ta kowyat da meyvazay a ipasaray da so lawpan da.

¹⁰ Ji sira manakaw, ta ori o peyhanhanan da nira no mapeyvazay sira mahap so vazay na. No akman sang o makakaday a vazay a apiya am jyabo kaji da azwazwayan so nanao na ni Ama ta do to a mapatazadang jyaten do teyngato a.

¹¹ Peyvazain ta o yamakakaday ang. Ta yarana mapengkad o pangangarilawan na ni Ama ta do to a mapatazadang jyaten a tao do karawan.

¹² O akman sang a pangangarilawan na ni Ama ta do to am ori o ipakateneng ta do kakaro ta do raten na ni Ama ta do to a vazay ta kano meykamadadayan a ikakza ta do karawan. So ipakateneng ta do kapzat ta do onowned ta a mapeypahagnat so nakenakem ta ji Ama ta do to.

¹³ So ikanoyong ta mapananala so ipeygegcin na no Tao do to ta si Yeso Kizisto a kapacizanod ta somaray do azwazway na. Ta iya o mapatazadang jyaten do teyngato.

¹⁴ Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

¹⁵ Nanawen mo sira no yamakakaday a vazay. No myan so ivavaga mo jira kano oyaoyyan mo nira am manakem mo o yada kownot jimo a yamizngen so ciring. Ta ji mo akwan o kalavayo mo.