Tito 1 - Seysyo No Tao

¹ Yaken rana am si Pawlo ko a lamlamsoy na ni Ama ta do to a nipamnekan ni Yeso Kizisto a omlivolivon no ciriciring na. O na nipamnekan jyaken am yana tovoin yaken a mapait so onowned da no nipamnekan na tao ni Ama ta do to a omanoyong ji Yeso. So palolwan ko sira a kapakateneng da rana do nanao na no yatamo iraralay.

² O peypeypangayan na rana no nanao eya am ipakahap ta so to meyyonong a ikavyay no pahad ta. Manoyong o nipanci na a itoro na jyaten no kaji na pa mangamaogan so karawan. Ta si Ama ta do to rana am abo kalalasan na.

³ So peylimwangan no akman sang sicyaikwaya. Ori ko pangozayan do ngaran na ni Ama ta do to a nitomovoy jyaken a yameylimwang no akman sang a nanao na. Ta iya rana am mapatazadang jyaten do teyngato.

⁴ Ko ipeyteygami imo, mo Tito. Imo rana do ta raralayan ni Ama ta do to am ka manoyong a akma koy anak. Inaoy no si itoro na jimo ni Ama ta do to a kani Yeso Kizisto o pangangarilawan na kano ikapiya no onowned mo. Ta si Yeso Kizisto rana am mapatazadang jyaten do teyngato.

Vazay na ni Tito do Kedite a pongso

⁵ Nivezed ko imo do Kedite a pongso no kakwa, ta pakavosen mo pa o ji ta pa nipakavos a vazay a kapamnek mo pa do peycyeylilyan na so tomalamozong no kyokay a tao, akman so mina ciring ko jimo no kakwa pa.

⁶ O tomalamozong rana no kyokay am abwata o karatan na. Asa o kahanghangan na. O ananak na am mamimin sira omanoyong ji Yeso. Abwata o iraherahet da sira no tao a kamizing da so ciring no inyapwan da.

⁷ Ta o manoyong a yamahap so vazay na ni Ama ta do to a yatomalamozong no kyokay am abo o karatan na. Ta iya rana am ji mapahama so nakem. Jyaoyaoyahen. Ji mapeyvazay so keyyop so saki. Ji mamakbak so tao. Ji mangamkam so nizpi no icyatatao na.

⁸ Isaray na o kapanaotao na so tao. Isaray na o kapanidong na so tao. Apzatan na o onowned na, kapiya na no icicirawat na. Akmey mazngang o onowned na a ji nala so nakenakem.

⁹ Pangozayan na o manoyong a nanao a apo ji Ama ta do to. Ta ori o ipakananao na so amraralay ni Yeso a tao a kano mangalalas a ji manganwanoyong a tao.

¹⁰ Ta yaro o tao a yaji manganoyong a yamapeyzavozavoz so ciring da a omalalas do manoyong a nanao. Da ipanci o beken a tao do Yotay a amyongkad do kataotao.

¹¹ Ji mo mamyapyan sira o akman sang a tao a meyzezyak an. Ta sira rana am da naknakmen o da kapangamkam so nizpi do icyatatao da. So na ikaro rana no tao do peykavakavahayan na nipeykaraherahet no malas a nanao da.

¹² Amyan so nipanci no asa ka meynakem a tao do Kedite no kakwa. Maniring ori am, “Sira mamimin o tao do Kedite a yamangalalas. So da ikatey manginanawa. Yatey malma sira. Da kakan so yada naknakmen.”

¹³ Yabwata o kalalasan na no ciring na. Am ori o ji mo anigi nira ioya. Ta ori o ikanoyong no nakenakem da ji Ama ta do to,

¹⁴ a kaji da nganoyngan do yamalas a kavavatanen da no tao do Yotay a kano yokoyokod da no ji nganoyong do nanao na ni Ama ta do to.

¹⁵ Ta o ji meypinarek so onowned a tao am abo marahet jira kanekanen da. Am o meyraraten a ji manaralay a tao am abwata o asa ka vazay da apya, mangay do nakenakem da kano onowned da ji macipayok.

¹⁶ O akman rana sang a tao am o ciriciring da am akmey macyanoyong ji Ama ta do to. Am o aktokto da am ori o omalalas jya. So ikanoyong da pacioyyan na ni Ama ta do to, do kaji da ngahapan so nanao na. So ikabwata no apya vazay a peyvazain da.