Sipolay 6 - Seysyo No Tao

¹ Yaten rana am meypahagnat tamo rana so nakem ji Ama ta do to. Taosya o kato ta oliolyan sya amizngen so ta na katenngan a nanao ni Ama ta do to do kapamlis a manganoyong,

² a kano nanao na jyaten do manaktak a kano panlanlagan da nyaten no tao a mapaopta so lima da jyaten a kano nanao a omaing do mirwa mavyay a kano nanao na omaing do peykapyapinpinan na so tao ni Ama ta do to. Ta o akman rana sang am yatey masangib rana ori a yata mamizing.

³ Am ori an, ipeypahagnat tamo a macinanao do makdeng a nanao ni Ama ta do to. Ta ori o isaray na ni Ama ta do to.

⁴ Ta o yamlikod do nanao ni Ama ta do to a tao am makongo sira ori a mamlis, do katenngan da rana si Ama ta do to, a nimakahap rana so karilawan na nira ni Ama ta do to, a yanan rana no Seyzi.

⁵ Sira rana am mapeyneynara da rana o katey yapya na no ciriciring na ni Ama ta do to. So da ipakateneng do mapeyzokab a oyowyat ni Ama ta do to.

⁶ Sira rana ya a to ngaro do manoyong a nanao ni Ama ta do to am abo rana o tao a makapeysinaoli so nakenakem da. Ta sira rana am akmey to da oliya o Anak ni Ama ta do to a padketen do jyojika a peyleylaken do tangain no tao.

⁷ No masangib a kacimoyan o nihakawan am isaod na. O akman rana sang am tey yapya do mata no mapeynihakawan sya. Am ori rana am si Ama ta do to o mapasaod sya.

⁸ Am no maday a tamek omlida do nihakawan am to rana wagwaga o akman sang. O akman sang a tao am balinasen na ni Ama ta do to.

⁹ Am inyo rana manga keypong am tana akman sang o ciring ko am yako anoyngan o kapyapya na pa no mahap nyo a patazadangen na ni Ama ta do to do teyngato.

¹⁰ Ji mapeycyakaban si Ama ta do to. So na ji makahamangi do pangangarilawan nyo a kano vazay nyo. Ori rana am vazay nyo do karwan no sinjya a yajimtad a yasomidong sira.

¹¹ O ney makdeng na yako kakzeben jinyo am mamimin kamo a jyablis so kakdekdeng so nakem a mangay no makwa. Ta ori o ipangononong no makakaday a kakdain nyo no nakem a itoro na jinyo ni Ama ta do to.

¹² Namen ji mamyapyan inyo a malma so onowned. Inarahen nyo sira o yaji macizizikna a yaomanoyong ji Ama ta do to a tao. Ta ori o ipakahap nyo so makakaday a nakem na jinyo ni Ama ta do to.

O mina ciring na ni Ama ta do to am pangononongan na

¹³ Nipanci na ni Ama ta do to ji Apolahan o keyyan no nakem na jya. Am to na mangozai o ngaran na a manci no keyyan no nakem na ji Apolahan, do kabo no makahad si Ama ta do to do karawan.

¹⁴ Maniring am, “Pangononongan ko o aryarilaw ko jimo a mapasaod so sivosivovoong mo.”

¹⁵ Ji na macimangsahi ni Apolahan a pananalahen. Makarahan am mahap na rana o nakem na sya ni Ama ta do to.

¹⁶ O tao rana do karawan am no amyan so makdeng a ciring da am manara sira so meynakem a tao a omamizing so ciring da a omagaz do ikazyak da a izavat da so masalit a vazay.

¹⁷ Mina to na rana mancyan ni Ama ta do to o kaji na ablisan no nakenakem na sira so tao a omamoon so mina ciring na jira. Am ori o nyaitan na do ciring na ni Ama ta do to akma ney yongkad. O nipasongsong na ciring am ngaran na ni Ama ta do to,

¹⁸ a ipadnadna na so nakem ta a yameyhanhan nya. Ta iya rana am jyabliblis o ahahapan na sya.

¹⁹ Yamyan rana jyaten so yata ipeyhanhan. So icyakma ney nitkehnan a lalitan no pahad ta, yarana jyagonagonay a meypangay nyaten do tangain na ni Ama ta do to.

²⁰ Si Yeso am yarana nimanmanma a nimangay do tangain ni Ama ta do to a mapasyasi nyaten. So ikanoyong na ney manhama na mapatanatanang nyaten so nakem ta ji Ama ta do to a mangay do kaidan no karawan, akman si Mocisete.