Sipolay 3 - Seysyo No Tao

Mahamahama pa si Yeso a kani Moyse

¹ Inyo rana akma koy kakteh do cinai a yana rana nipamnekan ni Ama ta do to a omanop jya am naknakmen nyo si Yeso a yana nitovoy ni Ama ta do to do teyrahem. Iya rana am ney manhama na mapatanatanang so nakem ta ji Ama ta do to a yata pangozayan a yamraralay ni Ama ta do to.

² Si Yeso rana am na ji pasalai si Ama ta do to a yanimamnek jya, akman si Moyse a ji mapasala do vazay ni Ama ta do to a tomalamozong no amraralay ni Ama ta do to a tao.

³ O tao rana mapatnek so vahay am arakorako pa o kazwayan na kano vahay na. Akman sang ta arakorako pa o kazwayan ni Yeso a kani Moyse.

⁴ Yamamimin o vahay a yanyamaog no lima no tao. Am si Ama ta do to am nimangamaog so makakaday.

⁵ Ji mapasalasala si Moyse a lamlamsoy ni Ama ta do to do vazay na. So ikanoyong na no ciring na ni Moyse a meylimwang no meypanam pa ciring na ni Ama ta do to.

⁶ Akman sang si Yeso Kizisto a ji mapasala do vazay ni Ama ta do to a tomalamozong no amraralay ni Ama ta do to a tao. Am iya am Anak na ni Ama ta do to. No ji ta hayo a meyhanhan nya a omapanala so nakem na jyaten no makwa am manoyong ta macikaop ji Ama ta do to.

Ipaziman so mabliblis so nakenakem ji Ama ta do to

⁷ Am ori o peycirngan na sya no Seyzi. Maniring am, “No si mamizing nyo o ciring na jinyo ni Ama ta do to sicyaraw eya am,

⁸ taosya o keynara nyo so ineynapo nyo a to nazibo no ciring na ni Ama ta do to a mapasobna jya a niomileylamdam sya do kabwan no nihakawan no tao.

⁹ Maniring si Ama ta do to am, Tana yarana makasikapat (40) so awawan o ineynapo nyo a yanimakacita so vazay ko am alalasan da pa yaken a askadan do yanan da.

¹⁰ Am ori o nioyyan ko no tao no kanang. Maniring ko rana am, ‘Da pasobnan yaken a ji ngamiznga so ciring.’

¹¹ To ko na mancyan o kapeyoyaoya ko a kaji da makaransan do ipanci ko a pamahamahan da.”

¹² Inyo rana akma koy kakteh do cinai am meypepzat kamo an. Ta kalittan o onowned no tatasa jinyo a meyparai do to meyyonong a Tao do to ta a ji manganoyong.

¹³ Mangday kamo do araraw a amvavaga do kadwan jinyo do yanyo ikavyay pa ya. Ta kalittan o tatasa jinyo a to nazibo ni Ama ta do to.

¹⁴ No ji ta haha so nakem ji Ama ta do to am manoyong ta macizanod ji Kizisto a mahap so vazay na.

¹⁵ Ta maniring do Seysyo am, “No si mamizing nyo o ciring na jinyo ni Ama ta do to sicyaraw eya am taosya o keynara nyo so ineynapo nyo a to nazibo nya a ji ngamizing si Ama ta do to.”

¹⁶ Sino sira o mapasobna a tao. O nyagag ni Moyse a tao saon apo do Ayci am.

¹⁷ Sino sira o nioya ni Ama ta do to a makasikapat (40) so awawan. Sira saon o nimawakwak do kabwan no nihakawan no tao am, do kanimeyraraten da.

¹⁸ Am sino sira o mina to na rana mamneki ni Ama ta do to a ji zagpit do pamahamahan da. O jya nimangamizing a tao saon am.

¹⁹ Tamo katenngan o kaji da nimakatokodan so pamahamahan da a angayan na jira ni Ama ta do to, do kaji da manganoyngan.