Sipolay 2 - Seysyo No Tao

Oyowyat na ni Ama ta do to a mapatazadang jyaten do teyngato

¹ Am ori an, peyyanan ta so nimamizing ta a nanao na ni Ama ta do to do onowned ta. Ta ori o ji ta macisyai do manoyong a nanao na ni Ama ta do to.

² O nipeylimwang no tinsi do ineynapo ta a iwawalam na ni Ama ta do to am yamanoyong rana. Ta sira rana yaji ngahap so nanao eya am yarana nimeydedna jira o peyoyaoyyan na ni Ama ta do to.

³ No yamanoyong o akman sang am no si to ta nazibwan si Ama ta do to a mapatazadang jyaten do teyngato am makongo ta tomayo no peyoyaoyyan na ni Ama ta do to. Ta nipeylimwang na rana jyaten ni Yeso a Panirsirngen ta o kavyay na jyaten ni Ama ta do to. So nipancyan da rana nya jyaten no nimakamizing sya tao.

⁴ Yakman sang, ta nioyatan na sira ni Ama ta do to a mapeyvazay so makakaday a yamapeyzokab a vazay a yongkad no kanoyong no ipangnanao da. So yana ikakman sang ni Ama ta do to a yamangozay do nakem na a yamvonong so teneteneng a kano oyowyat no Seyzi do omanoyong jya tao a isidong da so icyatatao da.

Si Yeso o meypalanginan nyaten a mangay ji Ama ta do to

⁵ O yaomanam a yana amaogen a vayo a karawan ni Ama ta do to am beken a tinsi o nipamnekan na a tomalamozong nya.

⁶ Ta tao o nipamnekan na a tomalamozong nya, yakman so ciring a yadomket do Seysyo. Maniring am, “Mo Ama do to, ikongo da peypeypangayan no tao do karawan a yamo kanakenakem sira. Ikongo yamo peyveyveknan sira.

⁷ No kamaog mo sira am maveveveh pa sira kano tinsi. Am kanisomakop mo jira no azwazway mo,

⁸ a tomalamozong no makakaday do karawan.” O na ipanci do jya yakatalamozong no tao so makakaday am yamapengkad do jya o kabo no ji da nalamozongan no tao no makwa. Am ta jyacita sicyaikwaya o tao a yatomalamozong no meycyamadadayan.

⁹ Am o akman sang a vazay am nimangononong rana do mina katazak na tao ni Yeso a yamaveveveh pa kano tinsi. Am jya nimeyyonownay. Na pangozain ni Yeso o pangangasyan ni Ama ta do to so tao do karawan a mawakwak no raraten ta. So nipantan na nya ni Ama ta do to so azwazway na.

¹⁰ O alalaw na ni Yeso Kizisto am ori o na nipazanodan jyaten akma ney anak ni Ama ta do to a macikasaray do azwazway na. Ta si Ama ta do to rana a nimangamaog so karawan a tomketken do karawan am yatey manoyong o vazay na. Ta si Yeso Kizisto o meypalanginan nyaten a mangay ji Ama ta do to.

¹¹ Na nivonas o raraten no tao do karawan. So yada rana ipacingay ji Kizisto a mapeyyama si Ama ta do to no yarana nimavonas so raraten a tao. Am ori o na rana ji macimasneki nira ni Yeso a akma ney kakteh do cinai.

¹² Maniring am, “Mo Ama do to, ipeylimwang ko do akma koy kakteh o ngaran mo. Anooden ko imo do tangain no aro a tao.”

¹³ Maniring pa am, “Ipeyhanhan ko si Ama ta do to.” Maniring pa am, “Cita pala yamen a yamalovot do jya kano yana nitoro jyaken a yaomanod jyaken a tao.”

¹⁴ Yaten rana akma ney anak ni Ama ta do to am tao ta do karawan. So nicyakman na jyaten ni Yeso a yamyan so kataotao. Am mawakwak rana o kataotao na ni Yeso am haragen na o oyowyat ni Satan a omwakwak so tao.

¹⁵ O jyojika na ni Yeso Kizisto am isidong na so manyahey no kawakwak da do karawan a tao a kabo na rana no ikanyahey da do ikamavyay da pa.

¹⁶ Na ji nidonga o tinsi. Ta na sidongen yaten a sivosivovoong ni Apolahan.

¹⁷ O peypeypangayan no kapeyngongyod na tao ni Yeso Kizisto am amyan rana so peyneynaran na sya do alalaw no tao do karawan a kapakateneng na rana do ahahapan na sya a marilaw nyaten a mapasyasi nyaten ji Ama ta do to, do ka iya na no ney manhama na mapatanatanang nyaten so nakem ta ji Ama ta do to. Am ori o ikanoyong ta na nivonas na rana ni Ama ta do to so raraten.

¹⁸ Ikongo do nimapeyneynara na rana o alalaw na kano littan na jya ni Satan, am ori o na ikanoyong a makasidong so littan ni Satan a tao.