Sipolay 12 - Seysyo No Tao

O peypeypangayan na no kananao na jyaten ni Ama ta do to

¹ So yada ikatey yaro no tao a ta rana nimacita so kakdekdeng a meyhanhan ni Ama ta do to no kakwa. Am ori an o akasan ta na so makakaday a ikasengseng jyaten a kano raraten ta yakmey omvaod jyaten a kowyat ta so onowned a akman so malayo a ji macimaza do palaywan na angayan.

² To ta peyyononga a peyyanen do onowned ta si Yeso Kizisto. Ta iya rana am nimapapo so kapeyhanhan ta ni Ama ta do to. So ika iya na no mapeynyangavosan syaha. Ji na nikamama o jyojika do tangain na. To na nazibwan o peyleylakan da sya a wakwaken do jyojika. Ta katenngan na o kapeyvoga no sarasaray na no makwa. So na rana ilisna do wanan na ni Ama ta do to sicyaikwaya.

³ Naknakmen nyo o mina vazay na to nomok so avavay da sya no meyraraten a tao. Ta ori o ji nyo a vokahawi no ingalaw da jinyo.

⁴ Ta kamo pa ji nimangay so inawan a yamacilimaliman ji Satan a yamapeyraraten jinyo.

⁵ Manngwa, nyo na todahamangi o na ivavaga jinyo akman so inyapwan a amvavaga do anak na? Ta no maniring am, “Imo rana anak ko am azimanen mo o nanao ni Ama ta do to. Ji ka todarahet rana so onowned a nanawen na.

⁶ Ta si Ama ta do to am vavagan na sira o ikarilaw na tao. Nanawen na sira o abneken na anak.”

⁷ Ahapen nyo o inanao na jinyo ni Ama ta do to. Ta o nanawan na jinyo am anak na inyo an. Ta abo inyapwan a ji nanao so anak.

⁸ No si ji kamo nanao am ji kamo meyngongyod a anak na.

⁹ O meysinogat a ama ta do karawan am ta hapen o nanao da. So tamo kanigan nira. Am imanngo rana si Ama ta do teyngato. Jya mahamahama pa o onotan ta jya, do kahap ta so ikavyay no pahad ta.

¹⁰ O meysinogat a ama ta do karawan am to da mangozai o ahahapan da sya amnanao jyaten. Am alinged ori an. Am o nanawan na jyaten ni Ama ta do to am ipeypapya na jyaten. Ta ori o ipacizanod ta jya abo so karatan.

¹¹ No nanawen na yaten am akma tey marahet so aktokto. Am o makapeyneynara rana so nanao ni Ama ta do to a tao am masasaray rana o onowned da a ji rana meylimoteng so onowned.

Nanao a ipaziman na so tao

¹² Am ori o yokayan nyo rana so onowned nyo a meyhanhan ni Ama ta do to. Ta ori o ikowyat nyo na so onowned.

¹³ Ji nyo pasala o pangonongan nyo. Ta ori o ji da tahaciji no makasapa so ai a tao. So ikanoyong nyo na karapan so onowned.

¹⁴ Makowyowyat kamo pa mapeypyapya so nakenakem nyo a kano tao. Ahapen nyo o ji meylimoteng a onowned nyo a macikaop jira. No abo o akman sang jinyo am abo jinyo o makacita si Ama ta do to do teyngato.

¹⁵ Makapzat kamo, ta mapehes jinyo o pangangarilawan ni Ama ta do to. Makapzat kamo, ta amlida do onowned nyo o raraten nyo. Ta no meyparako ori am makangingit so tao a meyraraten.

¹⁶ Taosya o kapasagpyan nyo so aktokto nyo. Ji nyo nginara si Isaw a meyparai ji Ama ta do to a mangazaw no ngaran na kabnekan ni ama na, do kaooo na no pinaring na kanen ni wari na.

¹⁷ Meyratateng am kakzeben na si ama na manlanlag nya am ji na pakongo ni ama na. Ta masalit ji ama na a mapaoli so nimaskad rana vazay. Tana to lavi a maneseh si Isaw am ji na nimapaoli o nakem na ni ama na a manlanlag nya.

¹⁸ Inyo am kamo ji nimakaranes do tokon a meyngaran so Sinay. So nyo jyakmani so Isedi a tao a nimakaranes do dang a yanan no lila no apoy a kano cinalab a kano rako a sari a kano akmey hangin a pagpag.

¹⁹ Amyan dang so meyzapa kano izezyak ni Ama ta do to. Mamizing da ori no aro a tao am to da na pakeka si Ama ta do to. Ta manyahey sira.

²⁰ Ta ji da na pakongo a amizngen o ciring na ni Ama ta do to a manci no, “Tana asa ka omalalam o to macidnet do tokon am wakwaken no vato.”

²¹ So ikanoyong na tey manganyahey no nimacita da. Am ori o nipancyan na nya ni Moyse so, “Ko na to zikzik a yamanyahey.”

²² Am inyo am kamo nimai do Sian a tokon. Ori rana am to meyyonong ori a yanan na ni Ama ta do to, akmey Yelosaleng do teyngato. Do dang rana am yajyavilangi o tinsi ni Ama ta do to amraralay nya.

²³ Inyo rana am kamo na nimakaranes do da kalwalovotan no yamraralay ni Ama ta do to a tao a yadomket so ngaran do teyngato. Inyo rana am kamo nimakaranes do yanan ni Ama ta do to a mapeykapyapinpinan so aro a tao. So yanyo ikanoyong rana yarana nimakaranes do na kabwan no yameyraraten a tao.

²⁴ Inyo rana am kamo rana nimakaranes do tangain ni Yeso a yanimanta ninyo so vayo a pangozayan a ciring na ni Ama ta do to a na rana nitaktakan no rala na. Ta o rala na ni Yeso o mapanop jyaten ji Ama ta do to a omagaz do kapyapyan. Ta o rala na ni Yapo am omagaz do kararatan.

²⁵ Am makapzat kamo. Ji nyo to nazibwan o ciriciring na ni Ama ta do to amnanao jinyo. Sira rana ya a to nazibo no yanipeylimwang ni Moyse a ciriciring na ni Ama ta do to am abo taywan da do peyoyaoyyan na ni Ama ta do to. No si to ta nazibwan o ciriciring na ni Ama ta do to a yapo do teyngato am teywara rana o raraten ta.

²⁶ Taiden na ni Ama ta do to no iwawalam na ji Moyse am mina todagnoz o teyrahem no ciring na ni Ama ta do to. Am o na nipanci pa sicyaikwaya am, “Ipisa ko pa gomnoz so teyrahem a kapazanod ko so hanit.”

²⁷ O ciring na, “Ipisa ori,” am mamimin o nyamaog na magnoz a mabalinas. O teyngato rana jyabalinas.

²⁸ Am ori o sarayan ta no to meyyonong a ji rana gonagonay a italamozong na ni Ama ta do to a yanan ta do teyngato. To ta mangozai o isaray na ni Ama ta do to a peyvazain, kowyat ta amraralay nya.

²⁹ So ikakdekdeng ta pa so onowned a mahap so vazay na. Ta o peyoyaoyyan na ni Ama ta do to am akmey lila no apoy a manemtem so meyraraten a tao.