Sipolay 10 - Seysyo No Tao

¹ O iwawalam na ni Moyse am ji makanet pa ori. Ta ori rana am akma ney avwavong pa ori no pangangasyan na ni Yeso a itoro na jyaten. Akman sang o da patanangen a yajyates do awawan a kagling a kano baka. Ta makongo ori a mapeypapya so tao a mangay do tangain ni Ama ta do to. Jyabo o kapakasidong na so tao a.

² No manoyong o kato na rana vonasan no raraten da no rala no kagling a kano baka am manoyong o kaji da rana makanakman so raraten da. So to na rana zavaci no kapatanatanang so kagling a kano baka.

³ Am o yapatanangan so kagling a kano baka ji Ama ta do to am ipakanakem da no tao so raraten da do awawan.

⁴ Ta o rala no baka kano kagling am ji na vonas o raraten no tao.

⁵ Am ori an, pancyan na nya ni Kizisto ji Ama ta do to no kai na do teyrahem, “Mo jyakzan o yapatanangen a kagling a kano makakaday a nakem a patanangen jimo. Ta yamo rana nipanta yaken so kataotao a mahap so vazay mo.

⁶ Mo jyakzan o yatemtemen a kagling a kano baka. So mo ikakman so sang a yajyakza no rala no kagling a kano baka a ivonas so raraten no tao.

⁷ Am ori o ko pancyan no, ‘Oya ko do jya a yamangozay do nakenakem mo, mo Ama do to, akman so yadomket do Seysyo a yaomagaz jyaken a vazay.’ ”

⁸ O ney manma na nipanci ni Kizisto jya am, “Mo jyakzan o yapatanangen a kagling a kano makakaday, pacyangayan no rala a patanangen jimo a yamo ivonas so raraten.” Tana yada pangozayan o iwawalam a yamapatanang so makakaday am yakman sang o ciring na ni Kizisto.

⁹ Maniring pa am, “Mo Ama do to, oya ko do jya a yamangozay do nakenakem mo.” Am ori o mina to na rana nastasi ni Ama ta do to so adan a iwawalam ni Moyse. Ta na rana nyalitan ni Yeso Kizisto no kataotao na o adan a iwawalam ni Moyse.

¹⁰ Na nipangononongan ni Yeso o nakenakem ni Ama ta do to a yamahap so vazay na a yamapasansan so kataotao na do jyojika. Am yaipisaha na kato miminan so raraten ta yanivonas.

¹¹ O yamapatanatanang nira so nakem da no tao do Yotay am mangday so araw sira a yameytatanek a yamahap so vazay ni Ama ta do to a mapatanang so kagling a kano baka. Am yameyyangangay do araw o da patanangen. Tana todangay no makwa am ji na vonas o raraten no tao no rala no kagling a kano baka.

¹² Am o nipatanang na ni Kizisto a kataotao na am ipisaha. Am tey rako oyowyat na amvonas so raraten ta mangay do kaidan no karawan. So yana ilisna do wanan ni Ama ta do to.

¹³ Sicyaikwa rana ya am na rana panalahen si Ama ta do to a yamharag so yamacioya jya tao.

¹⁴ Ipisa si Yeso a nimvoyog so rala a kavonas na rana no raraten da no omanoyong jya tao a mangay do kaidan no karawan.

¹⁵ O ciring na jyaten no Seyzi do Seysyo am,

¹⁶ “Maniring si Ama ta do to am, Ipatnek ko sira so vayo a pangozayan a ciring no makwa. Peydednahen ko o iwawalam ko do oo da a kapangay ko sya do onowned da.”

¹⁷ Maniring pa am, “Ji ko na peyyana do onowned ko o raraten da kano karatan da.”

¹⁸ Am no mavonas rana o raraten am todabo rana o patanangen da makakaday a ivonas da so raraten da.

Omanop ji Ama ta do to a tao

¹⁹ Manga kakteh, o peypeypangayan no cinawakwak na ni Yeso am ipakateneng ta do kaji ta rana vokahawan a mangay do tangain ni Ama ta do to.

²⁰ Na nipeywadwad yaten ni Yeso so vayo a rarahan ta. Ori rana am rarahan ori a mangay do tangain ni Ama ta do to.

²¹ Yamyan so yata ipeyhanhan a ney manhama na mapatanatanang so nakem a mapasyasi nyaten ji Ama ta do to. Iya rana am si Yeso a yatomalamozong nyaten a macikaop jya.

²² Am ori o ikanoyong ta jyablis so onowned a akmey nioyasan so onowned a kano kataotao a omanop ji Ama ta do to.

²³ Am ori o ji ta na ablisi so nakem a to ngotokot no kararalay ta ni Ama ta do to. Ta o mina ciring na jyaten ni Ama ta do to am abo kalasan na.

²⁴ Manakem ta o kapait ta so nakenakem do kadwan jyaten. Manakem ta o kasidong ta so kadwan jyaten a mapatwaw so pangangarilawan na ni Ama ta do to.

²⁵ Ji ta nginara sira o yatatasa ka tao a yato nazibo no da kararalay ni Ama ta do to do kalwalovotan no tao. So ipasipapait ta, ta tamo na katenngan o na kasngen rana no araraw na no na yai ni Yeso. So ikakdekdeng tamo pa a mapait so kadwan jyaten.

²⁶ No katenngan ta na o nanao ni Ama ta do to a kapeyngongyod ta meyparai ji Ama ta do to a ji rana meysinaoli so onowned am abo rana o patanangen ta makavonas so akman sang a raraten.

²⁷ Sira rana to nazibo ni Ama ta do to a tao am kapananala da rana so peyoyaoyyan na ni Ama ta do to do makotokotod a lila no apoy a ombalinas sira.

²⁸ O mapasobna do iwawalam ni Moyse a tao am no si myan so rarwa a tatlo o nimakacita sira meyraraten am ji rana asyan sira, ta to rana wakwaka sira.

²⁹ O to ngolala so Anak na ni Ama ta do to a kano rala na a makavonas so raraten na, kato na nazibo no yamanta no tao so pangangasyan a Seyzi am o akman rana sang a tao am makongo so wanjin. Naknakmen nyo pala. Jyabo kaji nakdengan no ipasingsingkad na sya ni Ama ta do to a.

³⁰ Ta tamo katenngan o ciring na ni Ama ta do to a manci no, “Amyan so ipasingkad ko so meyraraten a tao.” Maniring pa am, “Ioya ko sira o marahet so iwawalam a omanod jyaken a tao.”

³¹ Si Ama ta rana do to am to meyyonong a mavyay. Am ori o to da makasii no pasingsingtan na tao!

³² Manakem nyo no kakwa. Tana aro o alalaw nyo no kavayo nyo pa a omanoyong ji Yeso am jyabo kanimaharag nyo no alalaw nyo a.

³³ Tomakatakaw o kapasnesnek da jinyo a peyrarehten do tangain no aro a tao. Tomakatakaw o kapazasing da jinyo do peyrarehten da tao.

³⁴ Akma kamoy to macizanod so alalaw do paneban da tao. No katakaw da so kangangay nyo a nyahap no tao am mina to nyo peykabobwa do onowned nyo. Ta katenngan nyo o kapakahap nyo so apyapya pa a peymeymasaodan nyo do teyngato.

³⁵ Am ori o ji nyo ablisi no onowned. Ta no si akman kamo sang so onowned am mahap nyo o rako a nakem na jinyo ni Ama ta do to.

³⁶ Ji kamo macimazikna do vazay na ni Ama ta do to. Ta ori o ipakahap nyo so mina ciring na jinyo ni Ama ta do to no makwa.

³⁷ Ta o ciring do Seysyo am, “Maniring si Ama ta do to am, ‘Makeykai rana a kapakaranes na rana no pananalahen nyo a mai. So ji na mapainini jya.

³⁸ O tao rana a omonot do nakenakem ko am mahap da o to meyyonong a ikavyay no pahad da do kanoyong da jyaken. Am o omlikod jyaken a tao am ji ko nakzan o akman sang.’ ”

³⁹ Jyabo kapya ta so kapeydedna na jyaten no peyoyaoyyan na ni Ama ta do to, do kalikod ta jya. Ta yaten rana am ta anoyngan o kapatazadang na jyaten ni Ama ta do to do teyngato.