Nimlivolivon 6 - Seysyo No Tao

Nimanma nipamnekan da a somidong sira do vazay da

¹ No kanang rana am meyparo sira omraralay ni Yeso. Am amyan so tao do Yotay a mapeyciring so ciring da no Sila a meyoyaoya. Ta ikarahet da sira o tao do Yotay a mapeyciring so ciring da no Sipolay. Ta ano meyvonong sira so isidong da sira am ji da pa vononga sira o vao a mavakes a meyzezyak so ciring da no tao do Sila.

² Am ori o nilovotan da so aro a sinjya no rarwa so ikakarwan a nipamnekan ni Yeso a omlivolivon no ciriciring na a kapanci da nya jira so, “Si iptad namen o kapeylimwang namen no ciriciring na ni Ama ta do to a amvonong so isidong ta so tao am marahet o akman sang, ta ikasanga namen.

³ Am ori o ipamnek nyo so papito a ka tao a katenngan no tao apiya so icicirawat a kano mateneng a oyatan no Seyzi, ta sira rana o to namen rana pahanhana a omvonong sya.

⁴ Am yamen rana am kasazap namen so kapeynozi a meylimwang no ciriciring na ni Ama ta do to.”

⁵ Mamizing da no aro a sinjya am mamimin sira amya sya. Am ori o nipamnekan da ji Setiven, ta meysominogat o nakenakem na ji Ama ta do to a oyatan no Seyzi, a kapamnek da pa ji Veydipo a kani Polokelo a kani Nike a kani Timen a kani Pamona kani Nikela. Si Nikela rana am beken a tao do Yotay, ta tao do Antia a mahap rana so iwawalam da no tao do Yotay.

⁶ So nipancyan da nira meytatanek do tangain da no nipamnekan ni Yeso a omlivolivon no ciriciring na a meynozi nira maparapong so lima da jira ipowyat da sira do akman sang a vazay da.

⁷ Am ori o nipeylimwang na rana no ciriciring na ni Ama ta do to. Am ori o to da raparapai jira no omanoyong ji Yeso do Yelosaleng a karo da rana. Tana mapatanatanang so nakem da si Ama ta do to am aro sira omanoyong rana ji Yeso.

No karakep da si Setiven

⁸ Si Setiven rana am aro mapeyzokab a vazay na do tangain da no tao, ta sidongen na ni Ama ta do to a kowyat na jya no Seyzi.

⁹ Am amyan so tao a macioya jya a somkad jya. O tatasa jira am tao do Yotay apo do Cidinay a kado Yadisanta. Sira rana am manaralay do ngaranan da so Peyneynozyan da no somaliway rana tao. O karwan da am tao do Yotay apo do Cidicya kado Yasiya.

¹⁰ Am ji da tenngi a pasapan o ciring ni Setiven, ta nipanta na no Seyzi so teneteneng na.

¹¹ Am ori o nipeykala da so tao a katoro da jira so nizpi a meykala so karatan na ni Setiven. Maniring sira am, “O tao rana ya am namen nimamizing a yamraherahet si Moyse a kani Ama ta do to.”

¹² Ori o nisozi da no aro a tao a kano kamanrarakehan a kano mangnanao no iwawalam ni Ama ta do to. Ori o nirakpan da si Setiven a yangay do rako a peykeykaygyan.

¹³ So niyan da do dang no nipanta da so nizpi a tao a mangamaog so malas a ciring a iraherahet da sya. Maniring sira am, “O tao rana ya am yamangday a yamraherahet so rako a panaralayan ta ya kano iwawalam ni Moyse.

¹⁴ O nimamizing namen a nipanci na am si Yeso a tao do Nasale am kavahen na o rako a panaralayan eya, kablis na do iwawalam ni Moyse a nitaid na jyaten.”

¹⁵ So nikamimin da no myan do peykeykaygyan a tao a tomita si Setiven. Karahan am macita da o moing na akmey moimoing no tinsi.